EFESUS 2 - ALLAH AKOT ATAKAM

Yesus, owe bambi bajotaer atakam

¹ Bonak ere, tare Allah atakam aooaarukum. Tanom dosa aemaarukum. Erarawa tare dambir owe emes tamen aemapaarukum.

² Tare ara aemansa tapirmi pota pak ajamkaiaarukum. Tare era wonamo oup juein kapar ipit aatakam ji aeaarukum. Era ipit ere, Allah atakam baoo owe aemomemar ipit erare.

³ Bonak ere, danom takes Allah atakam baoo owe takan aemapaarum. Danom dajak basenomem pota pak jipu aemaarum. Danom dabimak binip jipu pak aemaarum. Allaham, jokoman pak, dare wan owe awar baem, aememe.

⁴ Me, Allah owe soro daytinak ajiomem. Are daytinak afaimommaro.

⁵ Danom aatakam aooaarum. Erarawa dare dambir owe emes tamen aemapaarum. Me, Are dare Kristus takan ajaoromwasumtumero emes tamen are. Emesare, Allah asan akot bambi aemero. Erarawa Are dara ajortaerero.

⁶ Dare Kristus Yesus ajamkaiom. Erarawa Allah dare Kristus takan ajaoromwasumtumero emes tamen are. Are dare Kristus takan era Surga oup tapirmi ataapomtaro emes tamen are.

⁷ Are dara afaimero. Ararawa, asan akotnak bambi aemero. Are ere, era asep bareiin takes dara baporomtamkorom aememe. Erarawa Are era pak takes aemero. Emesare, dara afaimero pak Kristus Yesus aemero pak are.

⁸ Tare Armat Ipit eemnak ambesemkoromekem. Armat Ipit arawa, tara ajortaeren. Ere Allah asan akot bambi tara aemen pak are. Era ajoremekem pak, taoemekem pak apok. Ere Allah bambi atetamen pak are.

⁹ Ere era aemekem pak apok. Erarawa tare tamba baemetemtem asan apok.

¹⁰ Allah waa aememmarom pak aemapomero. Are dare Kristus Yesus takan aemapomero. Erarawa Are dare akot pak baemaar aemapomero. Emesare, Are dare era akot pak baemaar bimak binip bonak akukuretiie.

Kristus samane taka aemapome atakam

¹¹ Tanom bimak binip bajanimem bas. Bonak ere, tare Yahudi apok saman, emes ajisamsekem. Era Yahudi oweam, “Tare Yahudi owe pak tai tamane pitini basakamosom apok owe. Dare ere, Yahudi owe pak tai tamane pitini basakamosom, owe,” emes atakam aesimes. (Ere, era owe adamo pitini pisuu pak are.)

¹² Era baream tare Kristus apok aemapaarukum. Tanom Israel saman apok aemapaarukum. Me Allah, aowe ataaji aee atakamam, ere tapak apok. Tare jiirey baee pak apokam, Allah apokam, ara tapirmi bambi aemapaarukum.

¹³ Bonak ere, tare Allah setep apok aemapaarukum. Me, Kristus Yesus aesee ajirindae. Tanom Kristus ajamkaiekem. Erarawa waa tare Allah setepkope aemapmakam.

¹⁴ Emesare, Kristus era Yahudi saman oweam, era Yahudi apok saman oweam, samane takan aemapome. Erarawa Armat Ipit pai aeomero. Bonak ere, era Yahudi saman oweam, era Yahudi apok saman oweam, bifane ajamfeamaaris. Era bifane pak, ere tiri pak tamen, era owe waut atarame. Me, Kristus dambir ateme ere, Are era tiri pak atiiosome emes tamen are.

¹⁵ Are era samane jamnuk, samane taka baemapom, akot aeme. Are era samane, Ara bajamkai, akot aeme. Erarawa Are era Yahudi Basakamtam Atakam ajiosome. (Era Yahudi Basakamtam Atakam, emes atakam tanane.) Era pak aeme ere, Are era samane jamnuk pai aeome.

¹⁶ Kristus era salib oup dambir ateme ere, Are era samane jamnuk era bifane ajamfeamaaris pak etejiosome. Are era samane jamnuk, samane taka aemapome. Are era owe Allahpu aofasiome.

¹⁷ Are andae ere, Are Allah Akot Atakam, owe takes akoretame. Era Akot Atakam, pak bae atakamam, owejie bakipimtaer atakamam, ji baem jak atakamam. Are era atakam tare Yahudi apok saman owe akoretame. Tare Allah setep apok aemapaarukum owe tarare. Are era atakam Yahudi owe akoretame. Era Yahudi saman owe, Allah setepkope aemapaaris owe erare.

¹⁸ Waa ere, era Yahudi saman oweam, era Yahudi apok saman oweam, Allah bipu aememmarom. Era pak Kristus aeme pak are. (Emesare, dare takes atakam Allah ajanimemarom.) Me Allah Jip takaam dare era pak baem pi ajatmaro.

¹⁹ Emesare, tare waa jii owe boemem apok. Tanom kaaowe boemem apok. Tare ere, era turunak owe asamane taka owe. Tanom Allah arereis.

²⁰ Emesare, tare tame wus emes tamen are. Me Yesus atakam bakoretam bamirimemom oweam, Allah atakam bakoretam oweam, ere tame fesis emes tamen are. Me tii wus ere, Kristus Yesus are.

²¹ Allaham Kristus ajamkaimas owe takes, tame wus emes tamen ataakenemtiim. Are era owe atame akotnak akenemapomum. Era tame ere, Tuhan ajamkaimas owe are.

²² Tanom Armat Ipit ajamkaimakam. Allah, tanom, me wan oweam, Armat Ipit baemap tame, aeapomum. Era tame Allah Jip baemap tame.