YAKOBUS 1 - Kitta' Passitallikang Bau KAREBA BAJI'

Barasallang 1:1

¹ Sallang battu ri Yakobus, atanna Allataala na Karaeng Isa Almase, mange ri sampulorua pinangka' rie' injo ri tanana tau maraeng.

Katappakang surang pangisse 1:2-8

² Urang siana'ku, ampa anrumpakiko lohe rupanna passo'ri rapangi se're karannuang.

³ Saba' muisse'i ma'nassana passo'ri mange rikatappakammu injo appabattui kasabbarang.

⁴ Paa'jarilalo kasabbarang injo appabattu hassele nuappakasa'ga' nyaha, solanna kau a'jari sangka' na ganna' na gele rie' kakurangang manna se're.

⁵ Mingka ampa ri kau rie' tuso'di' pangisse'na, ia parallui ngera mange ri Allataala. Saba' Allataala assarei mange risikuanna tau lalang kalammorang pa'mai' na rassi pa'rikodongang, jari Allataala lalatambai passala injo mange ri ia.

⁶ Ia parallui laera lalang rikatappakang, na anda sikali rie' bata-batana, saba' tau bata-bata inni assimpolei bombang ri tamparang, nulapaembo-embo anging anrai' kalau'.

⁷ Tau appakonjo injo andalaloi larapang ma'nassana ia lanarimai se're battu ri Karaeng.

⁸ Saba' tau a'rua-rua inni atina gelei sannang tallasa'na.

Tuna na kalumannyang 1:9-11

⁹ Sibaji'na urang siana' julu katappakang turie' injo lalang rikatunaang rannu atina ampa ia ripakala'biri,

¹⁰ na tau kalumannyang injo rannu atina ampa ia ripakatuna saba' ia lalannya'i assimpole taju' ruku'.

¹¹ Saba' matanna allo ambassi'i surangang bambanna na appakalaju ri ruku' injo, jari a'dappe'mu taju'na na lannya'i kaballoanna. Appakonjo todo'i passala'na ri tau kalumannyang intu, lalannya'i riattangngana akkareso.

Panguji surang passo'ri 1:12-18

¹² Sunggulalo tau attahang injo lalang ripasso'ri, saba' ampa ia attahang ujimu, ia lanarimai songko' kakaraengang rikatallasang nulatallikang Allataala mange risikuanna tau ngamaseang ri Ia.

¹³ Ampa rie' se're tau riso'ri, andalaloi appau, ”Nakke riso'ri ri Allataala!” Saba' Allataala gelei akkulle riso'ri risipa' daa, na Ia gele todo'i assare passo'ri manna mange ri inai jua.

¹⁴ Mingka sikuanna rupatau riso'rii battu ria'ra'na to'jua, saba' ia rirenrengi na ripakasinnai battu ri injo.

¹⁵ Ampa nurikasinnai injo ripinahang, ia appa'rie'i kadorakaang; na ampa rie'mo kadorakaang, ia ngerangi kamateang.

¹⁶ Urang siana' mala'biri'ku, akolalo lingui!

¹⁷ Sikonjo passare nubaji' na sikonjo barakka' nusangka', assala'na nubattu ri suruga, nuripanaung battu ri Amma sikuanna sinara. Iamo Allataala gele appinra na gelei ngerang nukalammang.

¹⁸ Rikanara a'ra' kale-kaleNa Ia maeng lapaa'jariki passabakang ri pau kanabaang solanna ditte rihattu nulatantuang injo a'jariki ana' lihua battu risikonjo nulapaa'jari Allataala.

Tuappilangngeri iyareka tuanggeokang pau 1:19-27

¹⁹ Urang siana' mala'biri'ku, u'rangilalo passala inni: Sikuanna tau parallui lassiri appilangngeri, mingka na'na'i appau-pau, na lolo' todo'i lakuku';

²⁰ saba' kuku'na rupatau inni gele lapakaakkulle anggeokang nunaba ri a'rakanna Allataala.

²¹ Injomo saba'na, pela'i iangase'na nurammasa inni surang sipa' daa lohe injo na tarimai lalang rikalumuang nyaha pau nuta'lamung injo lalang ri atimu, nuakkahasa injo laappakasalama' ri batemmu.

²² Mingka paralluko a'jari tulaanggeokang pau na gele sangga laallangngere'na jua; saba' ampa gelei appakonjo kalemmu to'jua mubura-burai.

²³ Saba' ampa rie' se're tau sangga appilanggerinna jua pau na gelei lageokang, ia assimpole juai tau latili'-tilingi injo tappa' toje'na ri a'rakang sarammeng.

²⁴ Ia latilingi kalenna ampai a'lampa na lassiri juai lakaluppai anteekamua tollo tappana.

²⁵ Mingka inai maressa hukkung sangka' injo, iamo intu hukkung appakalappasa injo tau, na detto'i lageokang, jari gele sangga appilangngerinna jua ampai lakaluppai, mingka lageokang toje'i, ia languppai kasungguang battu ripanggeokanna.

²⁶ Rie' se're tau larapangi kalenna pasambajang, mingka gele lakatutui babana, injo ia kalenna to'jua labura-burai, na sambajanna tide'jua matu-matunna.

²⁷ Sambajang nutoje' na nugele injo rie' daana ri a'rakang Allataala, Ammanta, iamo intu appariati na a'lingka-lingka mange ri ana' kukang na tubalu-balu lalang risikonjo kasusaanna, na tulusu rikatutui solanna kalenta andai ripakarammasa ri lino.