TITUS 1 - Kitta' Passitallikang Bau KAREBA BAJI'

Barasallang 1:1-4

¹ Battu ri Paulus, atanna Allataala surang suro ri Isa Almase laappakajarre' katappakang ri tau ripile injo ri Allataala na pangisse' ripassala kareba baji' battu ri Allataala assimpole nukajanjangang injo ripassambajangangta,

² na asituru' pattajalliang languppa tallasa mannannungang numinang ripakaramulana jammang maemmu lasapattaang Allataala na Ia gelei ma'ring laa'bura-bura.

³ Rihattu lakaa'rakinNa, Ia maeng lapappisa'biammu pauNa lalang ripappala'bangang Injili numaeng lapassareang injo mae ri nakke assituru' riparentana Allataala, Pappasalama'ta.

⁴ Mange ri Titus, tukurapang injo ana' assituru' katappakang passuranganta: Barakka' pangamaseang na dame salehangang battu ri Allataala Amma, surang Isa Almase, Pappakasalama'ta, minahang ri kau.

Jama-jamaanna Titus ri Kreta – Atorang laa'jari tutoa-toa, pajaga jamaah 1:5-16

⁵ Kubokoiko ri Kreta lalang ritujunna inni, solanna muatoroi apa nuparallu injo juapa riatoro na solanna mupattantui sikonjo tutoa-toa ri sikonjo kota, assimpole numaeng injo kupappasangang mange ri kau,

⁶ iamo intu tau tide' injo sallaanna, tuse're injo jua bahinenna, nuana'-ana'na tallasai lalang rikatappakang na riisse'i baji' geo'na surang tide' geo' daana saba' baji'i ta'ra tallasa'na.

⁷ Saba' laa'jari padaha-daha ri sapo Allataala se'rei pajaga jamaah parallui tide' daana, gelei a'la'bi'-la'biri, gelei pakkukukang, gelei pa'hujaang, gelei pa'hussangang, gelei ngowa,

⁸ mingka langaii assare pamminsamboang, langai nubaji' inni, lumu nyahai, adelei, sanging pangera dowaangi, akkullei lakahasai kalenna

⁹ na a'bitantangi mange ripau naba, nuassituru' riajarang baji', solanna ia akkullei assare pappiu'rangi mange ri tau maraeng asituru' ajarang injo na akkullei appakatappa' risikonjo balinna.

¹⁰ Saba' lohemo tau gele baji' ta'ra tallasa'na, la'bipa pole ri iyai tua'bitantang injo ri agama Yahudi. Lalang ripau tide' matu-matunna, iyai injo appakalingumu pikkirang.

¹¹ Tau assimpole injo parallui rilampang babana, saba' iyai appakagunsarai lohe pakkalabiniang lalang rilapangajaranna nugele injo toje' languppa passahalang appakasiri'.

¹² Se're tau battu ri iyai, iamo intu nabbinamo appau, Tau Kreta inni sanging pabura-bura, binantang boang, jamalai napakese-kese.

¹³ Passa'bi inni nabai. Injomo saba'na piu'rangi terasa ngase'i solanna iyai a'jari nabai lalang riajarang baji',

¹⁴ nagelemo rie' tutappa' ritula-tulaang Yahudi surang riparenta rupatau laa'giling rikanabaang.

¹⁵ Mange ri tau tangkasa injo, sikuanna tangkasa; mingka mange ri tau rammasa surang mange ri tau gele injo tappa' manna siso'di' gele rie' nutangkasa, saba' baji' injo akkala pikkirang surang harasiana rammasa ngase'i.

¹⁶ Iyai injo laakui laisse' Allataala, mingka panggeokanna a'bokojuai ri Allataaa. Iyaimo turikalikkingang ri Allataala saba' gelei tunru' surang gelei akkulle anggeokang nubaji' manna siso'di'.