Tic Okwena 1 - Lango New Testament

Ociko pi bino a Cuny Acil

¹ I buk me agege, Teopilo, onwoŋo acoo kop ducu ame Yecu ogeo tiyo kede pwonyo,

² tuno kede i nino ame otere kede i polo, a doŋ otyeko miyo cik pi Cuny acil baŋ okwena ame eyero.

³ A doŋ otyeko kanyo cannere adwoŋ, en onyutte kene baŋgi kun moko i yo apal ni ekwo. Obedo ka nen baŋgi pi kare me nino pyeraŋwen, kun kobo pi loc Obaŋa.

⁴ I kare a en tye kedgi, ocikogi ni kur oya i Jerucalem, ento ni myero koŋ okur gin ame Papo ociko, ame okobo ni, “Rik iwinyo wunu i baŋa,

⁵ pien Lakana yam batakino jo kede pii, ento a mom ru nino okato apol wun obino batijawu kede Cuny Acil.”

Yecu oyito i polo

⁶ Ka rik okwena tye ocokere karacel, gin openye ni, “Rwot, i kare man en ame ibino dwoggo iye loc baŋ jo Icrael?”

⁷ En te gamo ni, “Mano gire mom megwu me ŋeyo kare kede nino ame Papo omoko pi twerrere.

⁸ Ento obino miyowu teko ka Cuny Acil obino i komwu; daŋ ibino wunu bedo cadenna i Jerucalem, kede i Judaya ducu, kede i Camaria, anaka i agikki lobo,”

⁹ Ka en otyeko kobo kop man, ote tiŋe oko malo a kun gin aneno, pol te game i waŋgi oko.

¹⁰ Ame gin ociko waŋgi i polo kun en ayi to, nen, oyotoyot co aryo ame oruko boŋŋi atar te cuŋ i laŋetgi;

¹¹ te penyogi ni, “Wun jo Galilaya, piŋo icuŋ kun ineno wunu polo? Yecu man ame otiŋo malo i polo iyi akinawu-ni bino dok dwogo amannano, i kite acalo inene wunu ayito i polo.”

Oyero ŋat a myero luny ka Juda

¹² Icennere gin te dwogo oko i Jerucalem kun oya i wi kidi ame olwoŋo Jeituni, ame ceggi kede Jerucalem, borrere romo wot ame oye ni wot kede i ceŋ cabit.

¹³ A doŋ gin otuno i Jerucalem, oyito malo i icika a malo kan ame gin bedo iye; Petero, kede Lakana, kede Yakobo, kede Anderiya, Pilipo gin kede Tomaci, Bartolomayo gin kede Matayo, Yakobo wot a Alipayo, kede Cimon me eryoŋet a jo a pyem i abumente, kede Juda wot a Yakobo.

¹⁴ Jo-ni ducu ojalle kede cuny acel i kwayo Obaŋa, karacel kede mon, kede Maliam tota a Yecu, kede omego mere.

¹⁵ I kare-nono Petero oya ocuŋ i akina omego a rik ocokere karacel, ame welgi romo mia acel kede pyeraryo, te kobo ni,

¹⁶ “Omegona, coc a yam ocoo myero rik cobere kakare, ame Cuny Acil nwaŋ okobo i dog Daudi i kom Juda ame bin odoko atel jo ame omako Yecu.

¹⁷ Rik en dano acel ame onwoŋo tye i akinawa, daŋ nwaŋ opokke dullere i tic man.”

¹⁸ (Dano man rik owilo poto kede lim ame onwoŋo pi ballere; en orette aryeba cuny, yie te yec i dyere, amontennere ducu te wukere oko piny.

¹⁹ Kop man pire oŋeye baŋ jo ducu ame bedo i Jerucalem, omio olwoŋo poto-nono ni, Akeldama, ame te koppere ni, Poto me remo.)

²⁰ “Pien yam ocoo i buk me Jabuli ni, ‘Paco mere dok wi obur, ŋattoro kur bed iye’; ‘Dano ocele luny ticcere.’

²¹ Pi mano dano moro acel myero bed caden me cer a Yecu karacel kedwa. Dano-nono myero bed i akina jo ame obedo kedwa i kare ducu ame Rwot Yecu obedo wowota i akinawa,

²² cakere i kare ame Lakana batija jo, tuno anaka i nino ame otere kede i polo kun okwanye i baŋwa.”

²³ Ka doŋ gin te tuco nyiŋ jo aryo; Yucepu ame olwoŋo Barcaba, ame nyiŋe ocele Yucito, gin kede Matia.

²⁴ Icennere ote kwayo Obaŋa kun okobo ni, “Ama Rwot, yin ame iŋeo cuny jo ducu, i kom jo magi aryo nyuttiwa ŋat a yin iyero

²⁵ me luny tic kede kwena man ame Juda oweko, owoto i kabedo otike.”

²⁶ Gin te bolo kwir i komgi, kwir te poto i kom Matia, ote kwane karacel kede okwena apar wie acel.