Jo Galatia 1 - Lango New Testament

Amot

¹ Waraga man oya i baŋ Paulo ame en akwena. Mom jo moro oore, or mere me bedo akwena daŋ rik mom obeo ibaŋ dano moro, ento oya ibaŋ Yecu Kricito kede ibaŋ Obaŋa Papo a rik ocere iyi akina a jo oto.

² Omegowa luŋ a tye karacel keda kan daŋ omotowu. Baŋ lwak jo oye Kricito luŋ a tye i Galatia:

³ Obaŋa Papawa kede Rwotwa Yecu Kricito miwu winyo kede kuc,

⁴ en Kricito a rik omiye kene pi balwa me elarwa oko i gin arac me kare man, kun lubo gin ame Obaŋa Papawa mito.

⁵ Kwogo bed baŋe nakanaka. Amen.

Jiri moro ocele mom tye

⁶ An awuro kite ame ilokere wunu kede oyot, ikwero wunu ŋat a rik olwoŋowa i winyo a Kricito, dok itye ka lokere wunu i amut aber ocele.

⁷ Amut aberroro ocele gire mom, ento tye jo mogo a tye ka balo tamwu oko, kun omito loko amut aber i kom Kricito doko gin apat.

⁸ Ento kadi bed wan, onyo amalaika moro ame oya i polo, orabbiwu amut aber ocele a dok pokere oko i en a rik orabbiwu ca, myero cen oko.

⁹ Acalo rik wan okobbiwu koŋ, dok pwod anwoo kobo amanni, ni, ka ce tye ŋattoro ame tye arabbiwu amut aber ocele a pokere oko i en a rik igamo wunu, myero cen oko.

¹⁰ Amanni an doŋ atye ayenyo cwak a dano bo, onyo me Obaŋa? Onyo ca atye atemo yomoro cuny jo? Kono pwod atye ayomoro cuny jo, kono mom abedo amiro a Kricito.

Kite ame Paulo odoko kede akwena

¹¹ Omegona, amito iŋe wunu man, ni, amut aber a rik an arabo mom obedo gin ame oya i baŋ dano.

¹² Pien mom dano moro en omia, onyo opwonya kede apwonya, ento rik anwoŋo i baŋ Yecu Kricito ame onyutte baŋa.

¹³ Ityeko winyo wunu kwona acon i lubo dini Ojudaya, kite ame awuno kede lwak jo oye Obaŋa atek, kede kite atemo turo kede.

¹⁴ Iyi dini Ojudaya an en onwoŋo alanyo pol a jo i kin olwakina me rokka, kun alaro atek meicel pi kitewa ame oya i baŋ kwarowa.

¹⁵ Ento Obaŋa rik opoka pat con a mom ru onywala, eka dok te lwoŋa pi kica mere.

¹⁶ Yie rik obedo yom me nyutta Wode, me wek arab amut aber i kome baŋ Orok. I kare a man otimere, mom aporo kop i dano moro,

¹⁷ daŋ mom awoto i Jerucalem baŋ jo a rik ogeya me bedo okwena, cite awoto gira oko teŋe, i Arabia, eka dok ate dwogo cen i Damaciko.

¹⁸ Ka mwaka adek okato, awoto i Jerucalem limo Petero, eka ate tyeko baŋe nino apar wie abic.

¹⁹ Ento i kin okwena aneno ka Yakobo omin a Rwot keken.

²⁰ (Iyi ateni i nyim Obaŋa, gin duc ame acoyiwu i waraga man goba mom iye.)

²¹ Eka dok ate wot i lobo Curia kede Kilikia,

²² kun lwak jo oye Kricito i kabedo luŋ a tye i Judaya onwoŋo mom ru ŋeo koma.

²³ Gin onwoŋo owinyo ka kop i koma keken, ni, “Ŋat a yam owunowa ca, aman doŋ rabo kop i kom iyee a rik koŋ etemo turo”;

²⁴ daŋ ote pako Obaŋa pira.