2 Lakana 1 - Lango New Testament

Amot

¹ Waraga man oya i baŋ adwoŋ. Baŋ dako ame oyero kede itino mere ame amaro iyi ateni, mom an keken, ento anaka jo luŋ ame ŋeo kop ateni,

² pi kop ateni ame bedo i yiwa dok daŋ bino bedo kedwa nakanaka.

³ Winyo, kica kede kuc ame ya i baŋ Obaŋa Papo, kede baŋ Yecu Kricito Wot a Papo, bino bedo kedwa i ateni kede mar.

Kop ateni kede mar

⁴ Alelo meicel pi nwoŋo ni otinoni mogo lubo kop me ateni i kite ame rik Obaŋa Papo ocikowa kede.

⁵ Aman doŋ akwai ba, dako, mom bala dok acoyi cik anyen ento en ame yam otye kede con ca cakere i ageyi, ni wan omarre kenwa kenwa.

⁶ Man en mar, ni wan olub cik Obaŋa; man en cikkere, acalo iwinyo cakere i ageyi, ni myero ibed wunu i mar.

⁷ Pien obwol jo apol tye oket oko i lobo, jo ame mom otuco ni Yecu Kricito obino kun tye kede kom dano, kodi dano-nu en abwol jo, dok akwor a Kricito en.

⁸ Nenne wunu kenwu me gin ame ityeko wunu tic pire kur rweny i baŋwu, me inwoŋ wunu ocarawu luŋ.

⁹ Ŋattoro ame mom cuŋ i pwony a Kricito ento kato akata i nyim, dano-nu mom tye Obaŋa; ŋat a cuŋ i pwony a Kricito, tye i gin aryo ducu, Papo kede Wod.

¹⁰ Ka ŋattoro obino baŋi kun mom okelo pwony man, kur igame wunu i ot, kur imote wunu daŋ;

¹¹ pien ŋat ame omote, nwoŋo onotte kede i ticcere arac.

Kop me agikki

¹² Kadi bed atye i kop apol a myero acoyi pire, atamo ni myero mom ati kede papara kede vino, ento atye i gen me a bino nenowu, eka ate kop kedwu waŋ i waŋ me lelowa cobere aber.

¹³ Otino aminni ame oyero omoti.