TITUS 3 - Buku Nagasa Pojanji Nabou

Pokainggu to masipato ka topomparasaya

¹ Komi kana mompopatora ka topomparasaya ri setu ira masipato mekou ri ja'i pomarenta bo ri ja'i ntau to nipakakuasa riara ngata. Ira kana matundu bo masadia mantui pura-pura pokarajaa to nabelona.

² Ne'e ira manguli sinja'i tau-tau ntanina. Ne'e ira mosinggarau ante isema-sema. Tapi ira kana mabelo bo malusu rara ri ja'i ntau pura-pura.

³ Toramo, kita wo'u bopia danadoyo ewa etu. Kita da'a natundu pade kita nantuki jala to nasalana. Kita wo'u bopia nipobatua mpengele-ngele dota rara to naja'ana bo aga nompekiri kasana nu korota mboto. Kita wo'u naja'a bo nasiriati, pade kita nosiporau rara samba'a bo samba'a.

⁴ Tapi naupa kita tunggai nompowia pokainggu to naja'a ewa etu bopia, Alatala, Magau to Mompakasalama kita, nompopokita kabelona bo towena ka kita.

⁵ I'a nompakasalama kita, da'a sabana kita nompowia to nanoana, tapi sabana I'a mboto naasi matana nanggita kita. I'a nompakasalama kita ante nompegasa kita nggari silakata pade nombawai ka kita katuwu nabou. I'a nombabali katuwuta majadi nabelo ante kuasa Nosana to Nagasa

⁶ to nipopana'una ka kita ante kajoi nu rarana niposabana Yesus Kristus, Magau to Mompakasalama kita.

⁷ Etu nipowia Alatala ala nggari towe belona kita rarekena tau nanoa, pade ala kita majadi tau to namala manjarumaka matuwu mabelo sampe ri kasae-saena.

⁸ Tesa-tesaku e'i mpu'u-mpu'u nakono. Jadi to nipodotaku ala komi momparo'o tesa e'i ala topomparasaya Alatala tunggai mompasimbuku mowia to nabelo bo noguna ka pura-pura tau.

⁹ Tapi pakakawaomo komi nggari pompekutana to da'a ria gunana, pade nggari tesa-tesa tuntu ntotu'a nggaolu to nipetowali manusia. Pakakawao wo'u nggari posisono bo posinggarau ntau mantesa atura-atura agama to nipapola i Musa, sabana etu pura-pura da'a ntoto ria gunana bo untuna.

¹⁰ Komi kana mangontiaka tau to nompakagado todea topomparasaya. Ane i'a da'a menonto mowia etu, ontiakamo i'a sangganipa. Ane naganamo ronggani i'a niontiaka tapi i'a da'a wo'u nenonto, ne'e mana mowega ante i'a,

¹¹ sabana ninjanimu tau to noinggu ewa etu nasalanjalamo. I'a tunggai nowia silaka pade silaka-silakana mboto nompakasala i'a.

Tewai-tewai bo petabe kaopuna

¹² Ane aku mompakau Artemas atau i Tikhikus mpaka ri ja'imu, komi kana mompasimbuku masalisa momai ri ja'iku ri ngata Nikopolis, sabana nipakatantukumo meto'o ri setu sampe maopu tempo leni.

¹³ Komi kana mpu'u-mpu'u mompasimbuku mantulungi i Zenas, topotangara, bo Apolos riara mpolumako ira ala da'a ria makura nuapa-nuapa ka ira.

¹⁴ Roa-roata topomparasaya i Pue Yesus wo'u kana meguru mompowia to nabelona ala mompakagana to niparaluu roa-roa ira to nakabuna. Ne'e sampe katuwu ira da'a ria gunana.

¹⁵ Nadea tabe nggari ja'i pura-pura sampesuwuta to naria ante aku ri se'i. Pakasampe tabe kami ka roa-roa saongu pomparasaya ri setu to nompotowe kami. Perapi Pue mombagane komi pura-pura. Tabe nggari ja'iku, Paulus