EFESUS 4 - Buku Nagasa Pojanji Nabou

POKAINGGU TO MASIPATO KA TOPOMPARASAYA I PUE YESUS (4:1–6:20) Topomparasaya i Pue Yesus kana masintuwu

¹ Jadi nantora etu aku to nitarunggu ri se'i sabana nomparasaya i Pue merapi ala komi matuwu ante pokainggu to masipato ka tau to nipokio Alatala majadi todeana.

² Komi kana tunggai matuwu ante maede bo malusu rara. Ane komi rapandasa, komi kana mosabara mandate. Ne'e masalisa makedi rara ka roamu, tapi popokita ka i'a towemu.

³ Pasimbukumo ante mpu'u-mpu'u rara matuwu mosinggabelo ala mompiara kasintuwu to nirasai komi sabana Nosa Nagasa nu Alatala nompakasaongu rara komi samba'a bo samba'a.

⁴ Kita pura-pura ewa saongu koro riara i Pue. Kita pura-pura nipesua Nosa Nagasa nu Alatala. Iwetu wo'u kita pura-pura nipokio Alatala najadi todeana ala mosaongu panjarumakata.

⁵ Kita pura-pura nomparasaya samba'a lau Pue pade nantuki sangele lau pepatuduki. Kita pura-pura nidiu ewa tandaina kita topomparasaya i Pue Yesus.

⁶ Aga samba'a lau Alatala, Umata pura-pura. I'amo to nomparenta kita pura-pura bo to naria nosanggani-nggani ante kita pade to naria ri tatongota pura-pura.

⁷ Tapi naupa iwetu da'a nasimbayu pompakule to niwai ka kita. Pompakule to niwai ka kita nantuki to nipakatantu Kristus mboto.

⁸ Etu sampe naria nitulisi riara Buku Nagasa iwe'i: “Tempona I'a neore mpaka ri peto'o to nalangana nadea balina to nikenina. Pade I'a nompalele pompakule-pompakule ka manusia.” (Mzm. 68:19)

⁹ Jadi ane niuli, “I'a neore,” natantumo I'a nokolu nana'u sampe ri tambe nu dunia.

¹⁰ Pade I'a to nana'una etu, I'a wo'u to neore ri peto'o to neliu nggalanga nggari pura-pura langi ala pura-pura langi bo dunia maponu ante kuasana.

¹¹ I'amo to nompalele pompakule-pompakule ka manusia. Santongo ka niwaina pompakule majadi suro, santongo niwaina ka pompakule majadi nabi to nompasimbayu tesa nggari ja'i Alatala. Santongo wo'u niwaina ka pompakule majadi topompatolele Kareba Belo, pade ntanina niwaina ka pompakule manggeniaka bo mompatuduki topomparasaya.

¹² Etu nipowiana ala mompakaroso topomparasaya i Pue Yesus ala kita mompakule mantui bago to nipodota Alatala. Patujuna ala kita to najadi koro Kristus mantambai maroso

¹³ sampe kaopuna kita mpasanggani-nggani mosaongu pomparasaya bo mosaongu pangginjanita ewa Ana nu Alatala. Pade kita mpasanggani-nggani mantambai manoto bo maroso sampe majadi masimbayu ewa Kristus mboto.

¹⁴ Ante iwetu kita mana ewa ngana-ngana nggedi to nagampa rakeni mantuki mpengaya-ngaya pepatuduki nasimbayu ewa sakaya nagampa nitawui mpoiri gusa'a guse'i. Kita mana nagampa rabagiu ntau ante mpengele-ngele akala to mompakasalanjala.

¹⁵ Tapi kita tunggai matuwu nantuki pepatuduki to nakonona ante mosipotowe samba'a bo samba'a, sampe riara mpengele-ngele kita mantambai maroso bo manoto nasimbayu ewa Kristus mboto. I'amo to najadi balenggata

¹⁶ pade kitamo to najadi ewa korona. Pura-pura sipa to naria ri koro niposidumpa mpakabelo-belo pade niposiumpu ante karaua-karaua ala majadi saongu. Pade ane pura-pura sipa etu mokarajaa mantuki pompakule to niwai ka i'a, njumaongu koro etu matuwu mabelo bo mantambai eona mantambai maroso. Wa'a wo'u ante kita topomparasaya i Pue Yesus. Ane kita mbau mompake pompakule to niwai i Pue ka kita ante mosipotowe, mantambai eona mantambai maroso pomparasayata bo kasintuwuta.

Topomparasaya kana matuwu nantuki inggu to nabou

¹⁷ Jadi sampesuwu-sampesuwu, ante kuasa i Pue aku merapi ante mpu'u-mpu'u ka komi, ne'e mana matuwu nasimbayu ewa tau-tau to da'a nosinjani ante Alatala pade aga natuwu ante nompekiri anu da'a ria gunana.

¹⁸ Narumaumo pekiri ira, pade nakampatanimo ira nggari katuwua nabelo nggari ja'i Alatala, sabana nako'o rara ira sampe nabungu pekiri ira.

¹⁹ Mana ninjani ira naeya pade pura-pura katuwu ira tunggai nantuki dota rara to naja'ana. Ira da'a nabasa nompowia mpengele-ngele to naja'ana.

²⁰ Tapi da'a iwetu to nipatuduki ka komi ewa Kristus.

²¹ Natantu niepe komimo karebana, pade komi nipatuduki nantuki pepatuduki to nakono nggari ja'ina.

²² Etumo, komi nipatuduki manggabasaka pokainggu to naliu-liuna to nituki komi tempo komi da'apa nomparasaya i Pue Yesus. Pokainggu komi etu nipakagero dota rara to naja'ana to nanggeni komi nantuki jala to nasalana.

²³ Komi wo'u nipatuduki ala mompaloga Alatala mompakabou pekiri bo rara nta'i komi.

²⁴ Pade komi nipatuduki wo'u mantuki pokainggu to nabou ewa tau to nipajadi Alatala nantuki ingguna mboto to nanoa bo mpu'u-mpu'u nagasa.

²⁵ Sabana etu, sampesuwu pura-pura, ne'e mana modawa, tapi tunggai motesa to nakonona samba'a bo samba'a, sabana kita pura-pura ewa sipa to naria ri koro Kristus.

²⁶ Ane komi manggarau ne'e sampe rau raramu mompakasilaka komi. Ne'e wo'u mombaboli rau rara sampe masolo eo.

²⁷ Ne'e mombawai loga ka Magau nu Seta riara nggatuwu komi.

²⁸ Tau topangangga kana menonto mangangga. Nabelopa i'a mokarajaa ante palena mboto mangelo katuwua ante akala to nanoa ala i'a mamala mantulungi tau ntanina riara kapepana.

²⁹ Sampesuwu-sampesuwu, ane komi motesa ne'e tesa to naja'a mesuwu nggari sumbamu, tapi suwurakamo tesa-tesa to nompakabelo bo masipato ka tau-tau ntanina ala tesa komi etu mamala mantulungi tau-tau to nangepena.

³⁰ Pade ne'e komi mompakasusa rara Nosa Nagasa nu Alatala. Toramo! Nosa Nagasa etumo tandaina to nompakanoto komi Alatala puena. Pade Nosa Nagasana etu wo'u najadi panjokota sampe marata tempona kita rakabasaka nggari dunia to naja'a e'i.

³¹ Pakalipomo mpengele-ngele ju'a rara. Ne'e mana momboli rau rara bo mosinggarau. Ne'e mana mosipongare ante mosiuli sinja'i. Pade ne'e mana mompakaja'a tau ntanina.

³² Tapi komi kana mabelo bo malusu rara samba'a bo samba'a. Pade komi kana mosiampungi samba'a bo samba'a nasimbayu ewa Alatala nombaampungi komi nantuki nuapa to nipowia Kristus.