EFESUS 3 - Buku Nagasa Pojanji Nabou

Bago Paulus nanggeni Kareba Belo ka tau-tau da'a to Yahudi

¹ Jadi etumo sabana aku, i Paulus nomposambaya komi. Aku e'i tau to nitarunggu we'i-we'i sabana nomparasaya Yesus Kristus bo nompatolele Kareba Belo ka komi tau-tau da'a to Yahudi.

² Natantu niepe komimo iwenu sampe Alatala nombawai ka aku bago manggeni Kareba Belo etu ala katuwu komi rapakabelo. Etu nipowiana nggari towe belona mboto.

³ I'a nompopanjani ka aku niana to natitabuniaka nggari lamba pamulana ewa to nitulisiku sakedi ri ba'ana.

⁴ Ane komi mombabasa nuapa to nitulisiku etu, kana manoto ka komi pangginjaniku ewa nia Alatala to nipakadupa riara nggatuwu Kristus etu.

⁵ Ri tempo nggaolu nia etu da'apa nipopanjani ka manusia. Tapi we'i-we'i Nosa Nagasa nu Alatala nompopanjani nia etu ka suro-suro i Pue Yesus bo nabi-nabina to nagasana.

⁶ Iwe'imo nia to nipopanjanina etu: Ante momparasaya Yesus Kristus tau-tau da'a to Yahudi wo'u masipato mantarima rasi-rasi nggari ja'i Alatala mosanggani-nggani ante tau to Yahudi. Tau-tau da'a to Yahudi wo'u najadi ewa sipa ri saongu koro, pade ira wo'u masipato mantarima pura-pura nuapa to nijanji Alatala. Etu pura-pura najadi riara nggatuwu ira sabana ira nomparasaya Kareba Belo.

⁷ Aku e'i nionggotaka najadi topanggeni Kareba Belo etu nantuki towe belo nu Alatala. Pade nggari kuasana mboto I'a nombawai ka aku pompakule manggeni kareba etu.

⁸ Nggari pura-pura topomparasaya i Pue Yesus akumo to neliu nggaede katuwuku. Tapi naupa iwetu akumo to nipelisi Alatala nompatolele Kareba Belo ka tau-tau da'a to Yahudi ewa kabelo Kristus to neliu-liuna to da'a namala rareke.

⁹ Aku nipelisi ala mompakanoto ka pura-pura tau iwenu Alatala to nompajadi langi bo dunia nompakadupa niana to nitabuniakana nggari lamba pamulana.

¹⁰ Patujuna ala we'i-we'i I'a mompopanjani ka pura-pura kuasa ri laerawa mpengele-ngele notona mantulungi manusia. Etu pura-pura rapopanjanina nggari nuapa to majadi riara nggatuwu topomparasaya-topomparasaya i Pue Yesus.

¹¹ Alatala nompowia etu pura-pura nantuki niana mboto to naria mami nggari lamba pamulana sampe ri kasae-saena. Pade niana etu nipakadupana ante karata Pueta Yesus Kristus.

¹² Ante nomparasaya bo nosaongu rara ante I'a kita nipaloga mompakamosu Alatala riara posambaya ante da'a maeka sabana ninjanita I'a kana mantarima kita.

¹³ Sabana etu, sampesuwu-sampesuwu, aku merapi ka komi, ne'e malente rara mompekiri aku riara tarunggu, sabana pura-pura kasusa to nirasaiku ri se'i nanggeni belo ka komi.

Nabete mpu'u towe Kristus

¹⁴ Jadi tempo aku nantora etu pura-pura, aku nekadede nosambaya ri ngayo Umata Alatala

¹⁵ to nipoumata pura-pura, nabeloka kita ri dunia, nabeloka ira to naria ri suruga.

¹⁶ Aku nerapi ka Alatala ala nggari kabete nu kuasana bo kabelona I'a mombawai ka komi kuasa nggari ja'i Nosa Nagasana ala komi maroo rara momparasaya

¹⁷ sampe Kristus bate-batena meto'o riara nta'i komi. Etu kana majadi ane komi tunggai momparasaya I'a. Pade aku nerapi ala komi batena maroo manjarumaka towe nu Alatala sampe komi maroso nasimbayu ewa kayu to nandala kalena bo sapo to naroso pondasina.

^18-19 Aku wo'u nerapi ala komi mpasanggani-nggani ante pura-pura topomparasaya ntanina mamala mangginjani bo mombarasai kabete nu towe Kristus ka kita to neliu nggari pangginjani manusia. Da'a namala raukuruta kaluona, kandatena, kalangana bo kandala nu towe etu. Pade aku nerapi ka Alatala ala komi mamala mombarasai towe Kristus etu sampe kaopuna pura-pura to naria ri ja'i Alatala maria wo'u ri ja'i komi.

²⁰ Ante kuasana to nokarajaa riara nta'ita, Alatala mamala mompowia neliu nggari nuapa to niperapita atau to nipekirita.

²¹ Jadi kamaimo kita mantoiya Alatala ri tatongo ntodeana topomparasaya sabana powia Yesus Kristus! Kamaimo kita mombabila sangana we'i-we'i pade sampe ri kasae-saena! Amin!