२ कोरन्थी 11 - केवट नया कारारओकरसिके विश्वासयोग्यताके लिए चिन्ता 1 तुहेंसब ओकरासिके स्वीकार करि लैछैं जे खुद आपन तारिफ करैछै आर इहे ल्याके हमरा उम्मीद छै कि तुहेंसब हमरा बर्दास्त करि लेभैं यदि हमे कनेजरा मूर्खतापूर्ण व्यवहार करियौ। 2 कहिनेकी हमे तोरसिसे ओरं प्रेम करैछियौ आर तोरसिके चिन्ता करैछियौ जेरं परमेश्वर करैछौ। हमे तोरासिके ख्रीष्टके आर खाली ओक्रहै दियैके प्रतिज्ञा कैलियै छे। यी एकटा बाबुके जुगुर छै जे आपन बेटीके शुद्ध कुमारी कनियाँके रुपमे ओकर पतिके सौंपैछै जब ओकरसिके बिहा हैछै। 3 मगर जेरंके शैतान साँपके रुपमे आपन चलाकीसे पहेला जनानी हब्बाके बहकैल्कै, ओहिने करिके हमरा डर लाग्ल छै कि तुहेंसब ख्रीष्टके सेवामे आपन निष्कपट आर शुद्ध भक्तिके त्यागी देभैं। 4 जब भी कोय आदमी तोरसिकेलगत आबैछौ आर तोरासिके एकटा अलग येशूके विषयमे बताबैछौ ते तुहेंसब ऊ नया आदमीके स्वीकार करैके लिए बहुते उत्सुक रहैछैं। ऊ उटा येशू नैछै जकर बारेमे हमेसब तोरासिके बतैलियौ रहे। आर तुहेंसब खुशीके साथ ओकरापर ध्यान दैछैं जब तोरासिके पवित्र आत्मा आर खुश-खबरी प्राप्त हैछौ, जे ऊ आत्मा आर खुश-खबरीके जुगुर नैहैछै जे हमेसब तोरसिकेलगत आन्लियौ रहे। 5 हमरा लागैछै कि हमे ओतनें ही बढियाँ छियै जतनें कि ऊसब जे देखाबैछै कि ऊसब सभे चुन्ल आर भेज्ल चेलासिसे सभैसे बडका छै। 6 हुए सकैछै कि हमे भाषण दियैमे निपुण नैछियै, मगर हमरा ख्रीष्ट आर खुश-खबरीके विषयमे जानकारी छै आर हमे आपन ज्ञान उटा सभे बातमे देखैलियै छे जे हमे सिखैलियै छे। 7 हमे तोरसिके बीचमे परमेश्वरके खुश-खबरी बिना कुछु ल्याके प्रचार करिके अपने आपके नम्र बनैलियै ताकी तोरसिके सम्मान हौ। कि हमे एरं करिके कोनो पाप कैलियै छे? 8 तोरसिके सेवा करैके लिए हमरा दोसर मण्डलीसे सहायता मिल्लै। तोरासिके यी नैकहना चाही कि एरं करना गलत छै। 9 आर जब हमे तोरसिके संगे रहियै आर हमरा धनके कमी भेलै ते, हमे ककरोपर बोझ नैबन्लियै, कहिनेकी विश्वासी भ्यासब माकेडोनिया प्रदेशसे आबिके हमर जरुरत पुरा करिदेल्कै। आर सभे बातमे हमे कोनो भी तरहसे तोरसिके लिए कोनो भी तरहके परेशानी बनैसे बच्लियै आर हमे भविष्यमे भी तोरासिपर बोझ नैबन्बौ। 10 ख्रीष्टके सच्चाई हमरामे रहैतक अखैया प्रदेशभर कोय भी हमरा एरं गर्व करैके हकसे वंचित नैकरे सकैछै कि हमे बिना कुछु लेले तोरसिके बीचमे सेवा करैछियौ। 11 हमे तोरसिके धन कहिने नै लेलियौ? कि हमे एरं इहे ल्याके कैलियै कहिनेकी हमे तोरसिसे प्रेम नैकरैछियौ? परमेश्वर जानैछै कि हमे तोरासिके प्रेम करैछियौ। 12 हमे तोरसिसे सहायता नैलेबौ ताकी हमे ऊ आदमीसिके रोके सकियै जेसब यी बात पर गर्व करैके लिए एकटा मौका चाहैछै कि ऊसब हमरेसिके जुगुर परमेश्वरके काम करैछै। 13 कहिनेकी एरंको आदमीसब सच्चा चुन्ल आर भेज्ल चेलासब नैछै आर छलसे काम करेवाला छै। ऊसब ख्रीष्टके चुन्ल आर भेज्ल चेलासब हुऐके दिखावा करैछै। 14 आर यी कोनो आश्चर्यके बात नैछै कहिनेकी शैतान भी अपने आपके स्वर्गदूतके रुपमे परिवर्तन करैछै। 15 सेल्याके शैतानके सेवकसब भी धर्मी सेवकसिके जुगुर दिखावा करना कोनो आश्चर्यके बात नैछै, मगर ओकरसिके अन्त ओकरसिके कामके मुताबिक हैतै। 16 हमे फेर कहैछियौ कि कोय आदमी हमरा मूर्ख नै सम्झै। मगर यदि तुहेंसब ओरं बुझ्बो करैछैं ते हमरा मूर्ख कहिके स्वीकार करि ले, ताकी हम्हुँ कनेजरा गर्व करे सकियै। 17 हमे जे एखन कहैछियै एरंको गर्व प्रभुके तरफसे नैछै, बल्की मूर्ख जुगुर बेधडक भ्याके आपन गर्व करैछियै। 18 कहिनेकी बहुते आदमीसब यी संसारके आदमीसिके जुगुर गर्व करैछै ते, हमे भी गर्व कर्बै। 19 आर तुहेंसब समझदार हुऐके कारण आनन्दसे मूर्खसिके व्यवहार सही लैछैं। 20 कहिनेकी जब तोरासिके कोय नोकर बन्या लैछौ, या तोरासिके शोषण करैछौ या तोरसिके फैदा उठाबैछौ या अपने आपके तोरसिसे उप्पर राखैछौ या तोरसिके मुखमे थप्पड लगाबैछौ ते तुहेंसब सभे सही लैछैं। 21 हमे लज्जित भ्याके स्वीकार करैछियै कि तोरसिके संगे एरंको प्रकारके व्यवहार करैके साहास हमरासिके नैभेलै, जे बातके विषयमे ऊसब गर्व करैके साहास करैछै, उहे विषयमे हमरा भी गर्व करैके साहास छै। हमे मूर्ख जुगुर बोलैछियै। 22 कि ऊसब हिब्रू छै। हमे भी हिब्रू छियै। कि ऊसब इस्राएलीसब छै? हमे भी इस्राएली छियै। कि ऊसब अब्राहमके सन्तान छै? हमे भी अब्राहमके सन्तान छियै। 23 कि ऊसब ख्रीष्टके सेवक छै? हमे पागलके जुगुर बोलैछियै। हमे ओकरसिसे बढिके छियै। हमे ओकरसिसे बेसी मेहनत कैलियै छे, ओकरसिसे बेसी बन्दी बनैल गेलियै छे, अनगन्ती बेर मार खैलियै छे, कतनें बेर हमे मर्ते-मर्ते बच्लियै छे। 24 पाँच बेर यहूदी आदमीसिके अगुवासब हमरा उन्चालीस कोडा लगवैल्कै। 25 हमे तीनबेर बेतके मार सहैलियै। एकबेर हमरा आदमीसब पत्थल ल्याके मारल्कै। तीनबेर जे पानी जहाजमे हमे यात्रा कर्ते रहियै ऊ ध्वस्त भ्यागेलै। एक दिन आर एक रात ते हमे समुन्दरमे बहते रहलियै। 26 हमरा बारम्बार यात्रा करे पड्लै, जकरामे लद्दीसिके खतरा, डकेतसिके खतरा, आपने यहूदी आदमीसिके खतरा, गैर-यहूदी आदमीसिके खतरा, सहरसिके खतरा, सुनसान जगहसिके खतरा, समुन्दरके खतरा, झुट्ठा विश्वासी भ्यासिके खतराके सामना करे पड्लै। 27 हमे अनेक रात जागिके, भुख्ल-प्यास्ल रहिके, अक्सर भुख्ल रहिके, जाड आर कपडाके अभावमे रहिके कठिन मेहनत कैलियै आर अनेक कष्ट भोग्लियै छे। 28 आर यी सभे बातके अलावा सभे मण्डलीसिके विश्वासीसिके चिन्ता सभे दिन हमरा लाग्ल रहैछै। 29 जब कोय कमजोर हैछै ते हमे भी कमजोर महसुस करैछियै। यदि कोय पाप करैके परीक्षामे पडैछै ते हमे बहुते परेशान भ्या जैछियै। 30 यदि हमरा गर्व करना ही छै ते हमे आपन कमजोरीके गर्व कर्बै। 31 परमेश्वर, आपनसिके प्रभु येशूके पिता जे सभे दिन धन्यके छै, ऊ जानैछै कि हमे झुठ नैबोलैछियै। 32 जब हमे दमसकस सहरमे रहियै ते राजा अरितासके राज्यपाल हमरा बन्दी बनाबैके मकसदसे उटा सहरके गेटमे पहरा करिके राखल्कै रहे। 33 मगर दोस्तसब एकटा बडका ढाकीमे एकटा लम्बा रस्सी बान्हिके ओकरामे हमरा बैठैल्कै आर ओकरा सहरके दिवालके एकटा ढोन्हर द्याके सहरके बाहार जमिनमे उतारि देल्कै आर हमे राज्यपालके हातसे बची गेलियै। |
Kayort (केवट) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation