Эстер 6 - Инжил ЛС (2005)

Хамандын аргасыз жасаган жакшылыгы

¹ Ошол түнү падышанын уйкусу качты. Ал өткөн окуялар жазылган жылнаама китебин алып келүүнү буйруду. Китепти падышага окуп беришти.

² Ал китепте дарбаза сакчы евнухтар: Биктан менен Терештин Ахашверош падышаны тымызын өлтүрүүнү ниет кылып жатышканын Мордохай билип калып, кабарлаганы жазылган эле.

³ Муну укканда падыша: – Ушул кызматы үчүн Мордохайга кандай урмат-сый көрсөтүлдү эле? – деп сурады. Падышанын кызматчылары: – Ага эч нерсе кылынган эмес, – деп жооп беришти.

⁴ Ошондо падыша: – Короодо ким бар? – деп сурады. Так ошол убакта Хаман ак сарайдын сырткы короосуна жаңы эле кирип келген эле. Ал өзү орнотуп койгон дарга Мордохайды астырып салууну падыша менен сүйлөшөйүн деген ниетте келген болчу.

⁵ Кызматчылар өкүмдарга: – Улуу-урматтуум, кире бериште Хаман турат – деп айтышты. Падыша: – Кирсин, – деп буйруду.

⁶ Хаман кирип келгенде, ал андан: – Айтчы Хаман, падыша ыраазы болуп, зоболосун көтөргүсү келген адамга эмне кылышы керек? – деп сурады. Хаман ичинен: «Өкүмдар менден башка кимдин зоболосун көтөрүүнү кааламак эле?» деп ойлоп,

⁷ падышага мындай деп жооп берди: – Падыша кимдир-бирөөнүн зоболосун көтөргүсү келсе,

⁸ ал адамга өкүмдар кийчү кийимди, анан башына падышалык белги тагылган атты алып келишсин.

⁹ Ошол кийимди, атты падышанын кадыр-барктуу төрөлөрүнүн биринин колуна берсин. Ал төрө өкүмдарыбызга урмат көрсөткүсү келген адамга кийимди кийгизип, атка мингизип, анан атты жетелеп алып: «Падышабыз урмат көрсөткүсү келген адамга ушундай сый көрсөтүлөт!» – деп шаар аянтында жар салсын.

¹⁰ Ошондо падыша Хаманга: – Жакшы айттың. Өзүң айткандай, кийим менен атты тезинен алып, ак сарайда кызмат кылып жаткан иуда Мордохайга сый көрсөт. Өзүң айткандардын бирин калтырбай жаса, – деп буйруду.

¹¹ Хаман кийим менен атты алдырып, кийимди Мордохайга кийгизди да, атка миндирип, шаардын аянтында жетелеп алып: «Падыша урмат көрсөткүсү келген адамга ушундай сый көрсөтөт!» – деп жар салып жүрдү.

¹² Анан Мордохай падыша дарбазасына кайтып келди. Хаман болсо шерменде болгондуктан башын чүмкөгөн бойдон үйүнө шашып жөнөдү.

¹³ Хаман болгон иштин баарын аялы Зуурашка жана досторуна айтып берди. Ошондо досторунун акылдуулары жана аялы Зуураш ага: – Мордохайдын алдында абийириң айрандай төгүлгөн экен. Эгерде анын иуда экени чын болсо, анда аны жеңүү кыйын го! Анын алдында сөзсүз мартабаң түшөт! – деп айтышты.

¹⁴ Алар айтып оозун жыйгыча падышанын евнухтары келип калып, Хаманды Эстер даярдаган сый-тамакка шаштырып алып кетишти.