Башталыш 9 - Инжил ЛС (2005)

¹ Кудай Нух менен анын уулдарына мындай деп батасын берди: «Өсүп-өнүп, тукумуңар көбөйүп, жерди толтургула.

² Жер бетиндеги айбандар, асмандагы куштар, жер үстүндөгү майда жандыктар менен деңиздеги балыктардын баары силерден коркуп, үркүп турсун. Себеби алар силердин колуңарга берилди.

³ Бардык жаныбарлар силерге тамак болот. Өсүмдүктөрдү берген сыяктуу, Мен силерге баарын берип жатам.

⁴ Бирок канын агызбай туруп, этин жебегиле, себеби алардын жаны канында.

⁵ Эгер силердин да каныңар төгүлсө, Мен анын да кунун алам. Адамды өлтүргөн айбандан да, кишиден да кун алам.

⁶ Ким төксө канын адамдын, Анын да каны төгүлөт Башка адамдын колунан. Анткени Кудай адамды Өз бейнесиндей жараткан.

⁷ Силер болсо өсүп-өнүп, көбөйүп, жер бетине тарагыла».

⁸ Кудай Нухка жана анын уулдарына дагы мындай деди:

⁹ «Мына, Мен силер менен, келечек тукумдарыңар менен

¹⁰ жана силер менен бирге болгон бардык тирүү макулуктар – канаттуулар, мал, жапайы айбандар – силер менен бирге кемеден чыккан жер бетиндеги бардык жан-жаныбарлар менен келишим түзөм.

¹¹ Мындан ары эч бир тирүү жан топон суудан кырылбайт жана жерди кыйрата турган топон суу эч качан болбойт деп силер менен келишим түзөм» – деди.

¹² Анан Кудай дагы мындай деди: «Менин силер менен жана жаныңардагы жан бүткөндүн баары менен келечек урпактар үчүн түбөлүккө түзгөн келишимимдин белгиси бул:

¹³ Мен булут арасына көк желемди жайгаштырам, бул – Мени менен жерде жашагандардын ортосундагы келишимдин белгиси.

¹⁴ Мен жер үстүнө булут жибергенимде, алардын арасынан көк желе көрүнөт.

¹⁵ Ошондо Мен Өзүмдүн силер менен жана жан бүткөндүн баары менен түзгөн келишимимди эске аламын. Топон суу эми эч качан жандуу аттууну жок кылбайт.

¹⁶ Булуттун арасында турган көк желени көргөн сайын, Мен жерде жашоочулардын баары менен түбөлүккө түзгөн келишимимди эстеп турам».

¹⁷ Анан Кудай Нухка: «Бул Менин жерде жашоочу бардык тирүү жандар менен түзгөн келишимимдин белгиси», – деди.

Хамдын күнөөсү

¹⁸ Нухтун кемеден чыккан уулдарынын аттары: Шем, Хам, Жепет. Хам Канаандын атасы эле.

¹⁹ Булар Нухтун үч уулу эле, алардан жер жүзүндөгү бардык элдер тараган.

²⁰ Нух жер айдап, биринчи болуп жүзүм отургузду.

²¹ Ал шарап ичип, мас болуп, чатырдын ичинде жылаңач жатып калды.

²² Канаандын атасы Хам өз атасынын жылаңач денесин көрүп, сыртка чыгып, муну эки бир тууганына айтты.

²³ Шем менен Жепет болсо бир чапанды ийиндерине салып, арты менен ичкери киришти да, атасынын денесин жабышты. Алар башка жакты карап турушкандыктан, анын жылаңач денесин көрүшкөн жок.

²⁴ Нух өзүнө келгенден кийин, кенже уулунун кылган ишин угуп,

²⁵ мындай деди: «Каргыш тийсин Канаанга! Өз бир туугандарына Кулдун кулу болсун ал!»

²⁶ Андан кийин ал: «Шемдин Кудай Эгеси Алкышталсын! Ал эми Канаан Шемге кул болсун!

²⁷ Тынч жашатып Шем менен, Кенен кылсын Кудайым, Жепетимдин өрүшүн. Канаан ага кул болсун!» – деди.

²⁸ Топон суудан кийин, Нух дагы 350 жыл өмүр сүрдү.

²⁹ Нух бардыгы болуп 950 жыл жашап, дүйнөдөн өттү.