Башталыш 8 - Инжил ЛС (2005)

¹ Бирок Кудай Нухту жана аны менен бирге кемеде болгон жапайы айбандар менен малды эсинен чыгарган жок. Ал жер бетине шамал жиберип, суу тартыла баштады.

² Тунгуюктагы булактар менен көптөгөн асман тосмолору жабылып, жаан басылды.

³ Жер жүзүндөгү суу тартылып отуруп, 150 күндөн кийин азайды.

⁴ Жетинчи айдын он жетинчи күнү болгондо, кеме Арарат тоолорунун үстүнө токтоду.

⁵ Суу жылдын онунчу айына чейин улам тартылып отуруп, ошол айдын биринчи күнү тоо чокулары көрүнө баштады.

⁶ Кырк күн өткөндө, Нух өзү жасаган кеменин терезесин ачып,

⁷ бир карганы сыртка учуруп жиберди. Карга жер кургаганча келип-кетип учуп жүрдү.

⁸ Андан кийин Нух жер бетиндеги суунун азайган-азайбаганын билүү үчүн бир кептерди сыртка учуруп жиберди.

⁹ Бирок кептер конорго жер таппай кемеге кайра келди, себеби бүт жер бетин алиге чейин суу каптап турган эле. Нух сыртка колун созуп, кептерди өз жанына, кемеге киргизип алды.

¹⁰ Жети күн күтүп, Нух кайрадан кептерди кемеден учуруп жиберди.

¹¹ Кептер кечкурун кайтып келгенде караса, анын тумшугунда жаңы көктөгөн зайтун жалбырагы бар экен. Ошондо Нух жер бетиндеги суунун тартылганын билди.

¹² Анан ал дагы жети күн күтүп, кептерди кайра сыртка учуруп жиберди. Бул жолу кептер кайрылып кайра келбеди.

¹³ Жер бетиндеги суу Нух 601 жашка толгон жылдын биринчи айынын биринчи күнү тартылган эле. Ал кеменин төбөсүн ачса, жер кургап калган экен.

¹⁴ Экинчи айдын жыйырма жетинчи күнү жер бети түгөл кургап бүттү.

¹⁵ Ошондо Кудай Нухка мындай деди:

¹⁶ «Аялың, уул-келиндериң болуп кемеден чыккыла.

¹⁷ Өзүң менен бирге бүт жаныбарларды – түрдүү куштарды, малды жана майда жаныбарларды сыртка алып чык, алар жер жүзүнө тарап, төлдөп көбөйсүн».

¹⁸ Нух уулдары, аялы жана келиндери менен бирге кемеден чыкты.

¹⁹ Бардык жаныбарлар, жер бетиндеги майда жандыктар менен куштар – бүт жаныбар аттуу түр-түрү менен кемеден чыкты.

Кудайдын Нухка берген убадасы

²⁰ Нух Жараткан Эгеге атап курмандык жай курду. Анан адал малдын ар бир түрүнөн, адал куштун ар бир түрүнөн алып, курмандыкка чалып, бүт өрттөп жиберди.

²¹ Курмандыктардын жагымдуу жыты Жараткан Эгеге жеткенде, Ал Өз ичинен мындай деди: «Адам жаштайынан ниети жаман болсо да, Мен мындан ары эч качан жерди адамдардын айынан каргабайм, жердеги тирүү жандын баарын азыркыдай жок кылбайм.

²² Мындан кийин жер жер болуп турганда, эгүү-оруу, ысык-суук, жай менен кыш, күн менен түн токтобой боло берет».