Башталыш 7 - Инжил ЛС (2005)

Топон суу

¹ Андан кийин Жараткан Эге Нухка мындай деди: «Үй ичиң менен кемеге кир! Себеби Мен замандаштарыңдын ичинен сенин гана Менин алдымда такыбаа экениңди көрдүм.

^2-3 Жер бетинде тукуму сакталып калсын үчүн, өзүң менен адал жаныбарлардан эркек-ургаачы кылып жети жуптан, арам жаныбарлардын эркеги менен ургаачысынан бир-бирден, асмандагы куштардын ар бир түрүнөн – эркек менен ургаачысынан жети жуптан ал.

⁴ Анткени жети күн өткөн соң, Мен жер бетине кырк күн, кырк түн бою жаан жаадырам. Өзүм жараткан ар бир тирүү жанды жер бетинен жок кылам».

⁵ Нух бардыгын Жараткан Эге буюргандай кылды.

⁶ Жер бетин топон суу басканда, Нух 600 жашта эле.

⁷ Нух уулдары, аялы жана келиндери менен топон суудан аман калуу үчүн кемеге кирди.

⁸ Адал жана арам жаныбарлардын, куштардын, майда жаныбарлардын ар бири

⁹ – эркек-ургаачы болуп, жуп-жубу менен Нухка келип кемеге кирди. Нух бардыгын Кудай буюргандай кылды.

¹⁰ Жети күн өтүп, жер бетин топон суу каптай баштады.

¹¹ Нух 600 жашка келгенде, экинчи айдын он жетисинде – дал ошол күнү терең тунгуюктагы бардык булактар атылып, асман тосмолору ачылды да,

¹² жерге кырк күн, кырк түн жаан куюп турду.

¹³ Дал ошол күнү Нух, анын уулдары Шем, Хам жана Жепет, Нухтун аялы менен келиндери кемеге киришти.

¹⁴ Алар менен бирге бардык жапайы айбандардын, малдын, майда жаныбарлардын жана канаттуулардын ар бир түрү

¹⁵ жуп-жубу менен Нухка келип, кемеге кирди.

¹⁶ Ошентип, Кудай Нухка буйрук кылгандай, бардык айбандардан бир эркек, бир ургаачы кирди. Анан Жараткан Эге кеменин эшигин жапты.

¹⁷ Жер бетин кырк күн топон суу каптады да, ашып-ташып, кемени жерден көтөрдү.

¹⁸ Жер бетинде суу абдан көбөйүп ашып-ташыгандан, кеме суу үстүндө сүзө баштады.

¹⁹ Жер үстүндө суу дагы көбөйүп, көтөрүлгөндөн көтөрүлүп, асман алдындагы бийик тоолордун баарын басып калды.

²⁰ Суу тоолордон он беш чыканак жогору көтөрүлүп, аларды көөмп калды.

²¹ Ошондо жер бетиндеги бардык тирүү макулуктар – куштар, мал, жапайы айбандар, жер үстүндөгү майда жаныбарлардын баары, бүт адамзат набыт болду.

²² Кургактагы жан бүткөндүн мүлдөсү кырылды.

²³ Жер жүзүндөгүнүн баары жок болду – адамдан тартып, малга чейин, майда жаныбарлардан баштап, асмандагы куштарга чейин – баары тең жер бетинен жок болду. Нух менен бирге кеме ичинде болгондор гана аман калды.

²⁴ Топон суу жер жүзүн 150 күн каптап турду.