Башталыш 6 - Инжил ЛС (2005)

Жараткан Эгенин кайгыруусу

¹ Жер бетинде адамдар көбөйүп, алардан кыздар да туулганда,

² асман уулдары адамдардын кыздары сулуу экенин көрүп, жактыргандарын аял кылып ала башташты.

³ Ошондо Жараткан Эге: «Менин демим адам ичинде түбөлүк болбойт, анткени алар өлө турган пенделер. Эми адамдын өмүрү 120 жыл болсун», – деди.

⁴ Ал кезде, андан кийин да жер жүзүндө алп кишилер болгон. Алар асман уулдары адамдардын кыздарына жакындашканда туулган. Булар байыркы заманда элге таанымал баатырлар эле.

⁵ Жараткан Эге адамдардын жер бетинде кылган жамандыгы көп экенин көрдү. Алардын болгон ою, эси-дарты ар убак жамандык гана жасоо болуп калган.

⁶ Ошондо Жараткан Эге жер бетине адамзатты жаратканына кейип, жүрөгү сыздады.

⁷ Ошол үчүн Ал: «Мен Өзүм жараткан адамды, аны менен кошо малды, майда жаныбарларды жана канаттууларды да жер бетинен жоготом. Себеби аларды жаратканыма кейип турам», – деди.

⁸ Бирок Жараткан Эге Нухка ырайым кылды.

Кудайдын Нухту куткаруу ниети

⁹ Нухтун тарыхы мындай: Нух замандаштарынын арасында такыбаа, кынтыксыз жана Кудай менен жакын алакада жашаган адам эле.

¹⁰ Нухтун Шем, Хам жана Жепет деген үч уулу бар болчу.

¹¹ Жер жүзү Кудайдын алдында абдан бузулуп, зулумдукка толду.

¹² Кудай жер жүзүн карап, баары туура жолдон чыгып, бузулуп кеткенин көрдү.

¹³ Ошондо Ал Нухка мындай деди: «Мен баарын түгөл жок кылам. Алардын кесири тийип, жер үстү зулумдукка толду, ошондуктан аларды жер менен кошо жок кылам.

¹⁴ Сен кипарис жыгачынан чоң кеме кур, аны бөлмөлөргө бөлүп, ичи-сыртын кара чайыр менен майла.

¹⁵ Аны мындай жаса: узуну 300, туурасы элүү, бийиги отуз чыканак болсун.

¹⁶ Кеменин бастырмасын бир чыканак жогору кылып тургуз. Эшигин капталынан чыгар. Кеменин төмөнкү, ортоңку, жогорку кабаты болсун.

¹⁷ Билип ал, Мен асман астындагы жан бүткөндүн баарын жок кылуу үчүн жер бетине топон суу каптатамын. Жер үстүндөгүнүн баары кырылат.

¹⁸ Бирок сени менен келишим түзөм. Сен уулдарың, аялың жана келиндериң менен кемеге киресиң.

¹⁹ Жаныбарлардын ар бир түрүнөн жуп-жуптан – эркек менен ургаачысынан өзүң менен кошо кемеге алып киресиң, алар сени менен бирге аман калсын.

²⁰ Тирүү калсын үчүн куштардын, малдын жана майда жаныбарлардын ар түрү – баары жуп-жубу менен сага келсин.

²¹ Өзүңө жана аларга азык боло турган тамак-аштын ар түрүнөн камдап ал».

²² Нух Кудай буйругандын баарын так аткарды.