Башталыш 5 - Инжил ЛС (2005)

Адамдын тукуму

¹ Адамдын санжырасы мындай: Кудай адамды жаратканда, аны Өзүнө окшош кылып жаратты.

² Аларды эркек менен аял кылып жаратып, ошол күнү батасын берип, аларды «адам» деп атады.

³ Адам 130 жашка келгенде, өзүнө окшош, өз бейнесиндей уулдуу болуп, ага Шет деп ат койду.

⁴ Шет туулгандан кийин Адам 800 жыл өмүр сүрүп, башка да уул-кыздарды көрдү.

⁵ Адам бардыгы болуп 930 жыл жашап, дүйнө салды.

⁶ Шет 105 жашка келгенде, уулу Энош туулду.

⁷ Андан кийин Шет 807 жыл өмүр сүрүп, башка да уул-кыздарды көрдү.

⁸ Шет бардыгы болуп 912 жыл өмүр сүрүп, дүйнөдөн кайтты.

⁹ Энош токсон жашка келгенде, Кейнан туулду.

¹⁰ Кейнан туулгандан кийин, Энош 815 жыл өмүр сүрүп, башка да уул-кыздарды көрдү.

¹¹ Энош бардыгы болуп 905 жыл өмүр сүрүп, дүйнөдөн кайтты.

¹² Кейнан жетимиш жашка келгенде, Махалалел туулду.

¹³ Андан кийин Кейнан 840 жыл өмүр сүрүп, башка да уул-кыздарды көрдү.

¹⁴ Кейнан бардыгы болуп 910 жыл өмүр сүрүп, көз жумду.

¹⁵ Махалалел алтымыш беш жашка келгенде, Жерет туулду.

¹⁶ Жерет туулгандан кийин, Махалалел 830 жыл өмүр сүрүп, башка уул-кыздарды көрдү.

¹⁷ Махалалел бардыгы болуп 895 жыл өмүр сүрүп, көз жумду.

¹⁸ Жерет 162 жашка келгенде, Энох туулду.

¹⁹ Андан кийин Жерет 800 жыл жашап, башка да уул-кыздарды көрдү.

²⁰ Жерет бардыгы болуп 962 жыл өмүр сүрүп, дүйнөдөн кайтты.

²¹ Энох алтымыш бешке келгенде, Метушелах туулду.

²² Метушелах туулган соң, Энох 300 жыл бою Кудай менен жакын алакада жашап, башка да уул-кыздарды көрдү.

²³ Ал бардыгы болуп 365 жыл өмүр сүрдү.

²⁴ Энох Кудай менен жакын алакада жашап, анан жер бетинен кайып болду, себеби Кудай аны Өзүнө алып кеткен эле.

²⁵ Метушелах 187 жашка келгенде, Лемек туулду.

²⁶ Лемек туулган соң, Метушелах 782 жыл өмүр сүрүп, башка да уул-кыздарды көрдү.

²⁷ Метушелах бардыгы болуп 969 жыл өмүр сүрүп, дүйнөдөн өттү.

²⁸ Лемек 182 жашка келгенде, уулдуу болду.

²⁹ «Жараткан Эгенин каргышына калган жердин азабы үчүн тарткан мээнетибизди бул бала жеңилдетет» деп, ага Нух деген ат койду.

³⁰ Нух туулгандан кийин, Лемек 595 жыл өмүр сүрүп, башка да уул-кыздарды көрдү.

³¹ Ал бардыгы болуп 777 жыл өмүр сүрүп, дүйнө салды.

³² Нух 500 жашка чыкканда, уулдары Шем, Хам жана Жепет туулду.