Башталыш 41 - Инжил ЛС (2005)

Жусуптун фараондун түшүн жорушу

¹ Арадан толук эки жыл өткөндө, фараон түш көрдү. Түшүндө ал Нил дарыясынын жээгинде туруптур.

² Дарыядан көрүнүшү жакшы, семиз жети уй чыгып, камыш арасында оттой баштады.

³ Алардын артынан көрүнүшү начар, арык жети уй чыгып, дарыянын жээгиндеги семиз уйлардын жанына келди.

⁴ Анан көрүнүшү начар, арык уйлар көрүнүшү жакшы, семиз уйларды жеп коюшту. Ушул жерден фараон ойгонуп кетти.

⁵ Анан кайра уктап кетип, башка түш көрдү. Түшүндө буудайдын бир сабагында бадырайган, жакшы жети машак өсүп туруптур.

⁶ Алардан кийин чыгыш шамалынан улам чүрүшүп, катып калган жети машак өсүп чыкты да,

⁷ жакшы, бадырайган машактарды жалмап койду. Ошондо фараон ойгонуп кетти. Бул түшү экен.

⁸ Таң заарда фараондун тынчы кетип, Мисирдеги олуялар менен акылмандарды түгөл чакыртып, аларга көргөн түшүн айтып берди. Бирок эч кимиси фараондун түшүн жоруй алган жок.

⁹ Ошондо башкы шарапчысы фараонго мындай деди: – Бүгүн бир айыбымды эстеп жатам, аны мойнума алам.

¹⁰ Бир күнү сиз, падышам, башкы наабайчы менен мага ачууланып, бизди сакчылардын башчысынын үйүндөгү зынданга каматып койгонсуз.

¹¹ Бир жолу түндө ал жана мен, ар бирибиз өзүнчө мааниси бар түш көрдүк.

¹² Ошол жерде биз менен бирге сакчылардын башчысынын кызматчысы, жаш эврей бар экен. Биз ага түштөрүбүздү айтып бергенде, ал ар бирөөбүзгө түшүбүздү жоруп берди.

¹³ Түшүбүздү кандай жоруса, баары дал ошондой болду: мен өз кызматыма кайттым, башкы наабайчы жыгачка асылды.

¹⁴ Фараон ошондо Жусупка киши жиберип, дароо зындандан алдырды. Жусуп чачын кырктырып, кийимдерин алмаштырган соң, фараондун алдына келди.

¹⁵ Фараон ага: – Мен түш көрдүм, бирок аны эч ким жоруй албады. Сени түш жоруйт деп уктум, – деди.

¹⁶ – Жоруй турган мен эмес, түштү сиз үчүн жакшылыкка Кудай Өзү жоруп берет, – деди Жусуп.

¹⁷ Ошондо фараон Жусупка мындай деди: – Түшүмдө Нил дарыясынын боюнда турган экемин.

¹⁸ Анан семиз, көрүнүшү жакшы жети уй дарыядан чыгып келип, камыштын арасында оттой баштады.

¹⁹ Алардын аркасынан арык, көрүнүшү начар, кабыргалары саналган дагы жети уй чыкты. Мен мындай көрүнүшү начар уйларды мурда Мисирден эч көргөн эмесмин.

²⁰ Ошол арык, көрүнүшү начар уйлар семиз уйларды жеп коюшту.

²¹ Семиз уйлар алардын карынына кирсе да, киргени билинбей, жүдөгөн уйлар баягыдай эле көрүнүшү начар бойдон кала берди. Анан мен ойгонуп кеттим.

²² Кийин башка түш көрдүм. Буудайдын бир сабагына бадырайган, жакшы жети машак өсүп чыкты.

²³ Алардын аркасынан чыгыш шамалынан улам соолуп, чүрүшүп, катып калган дагы жети машак өсүп чыкты да,

²⁴ жети жакшы машакты жеп койду. Мен бул түштөрүмдү олуяларга айтып бердим, бирок эч кимиси жоруй алган жок.

²⁵ Жусуп фараонго мындай деди: – Фараондун түштөрүнүн мааниси бир. Кудай фараонго жасай турган ишин билдириптир.

²⁶ Жети жакшы уй – бул жети жыл, жети жакшы машак да – жети жыл. Түштөрдүн мааниси бир.

²⁷ Алардан кийин чыккан арык, көрүнүшү начар жети уй менен чыгыш шамалынан улам чүрүшүп, катып калган машактар жети жыл ачарчылыкты билдирет.

²⁸ «Кудай фараонго жасай турган ишин көрсөтүптүр» дегеним ушундан.

²⁹ Бүткүл Мисир жеринде жети жыл молчулук болот.

³⁰ Андан кийин жети жыл ачарчылык болуп, Мисир жеринде болгон молчулукту унуттурат. Бул ачарчылык жерди жабыркатат.

³¹ Кийин келген ачарчылык катаал болгондуктан, мурун болгон молчулуктун изи да калбайт.

³² Фараонго эки жолу кайталанып түш киргени – Кудай муну чечип, жакында аны ишке ашырары анык экенин билдирет.

³³ Эми фараон акылман, иш билги бир адамды таап, аны Мисир жерине башкаруучу кылсын.

³⁴ Жер-жерлерге атайын көзөмөлдөөчүлөрдү дайындап, алар жети жылдык молчулук убагында Мисирдеги түшүмдүн бештен бир бөлүгүн жыйнасын.

³⁵ Алар алдыдагы, молчулук жылдарындагы эгин-тегиндин баарын фараондун бийлиги менен шаарларга жыйнап, сакташсын.

³⁶ Ошол жыйналган түшүм Мисир жеринде боло турган жети жылдык ачкачылыкта азык болуп, эл аман калат.

Жусуптун баш вазирликке дайындалышы

³⁷ Жусуптун бул ою фараон менен анын кызматкерлерине абдан жакты.

³⁸ Фараон кызматчыларына: – Кудайдын Руху даарыган Жусуптай башка кишини кайдан табабыз? – деди.

³⁹ Анан Жусупка: – Эгерде ушунун баарын Кудай сага айкын кылып жатса, анда, демек, сенден акылман жана иш билги адам жок.

⁴⁰ Сен ак сарайымдын башчысы болосуң, бүт элим буйругуңа моюн сунат. Мен тактым менен гана сенден жогору болом, – деди.

⁴¹ Мен сени бүт Мисир жерине башчы кылдым, – деди фараон сөзүн улап.

⁴² Анан колундагы мөөр шакегин чыгарып, Жусуптун колуна салды. Үстүнө зыгыр чапан жаап, мойнуна алтын чынжыр такты.

⁴³ Жусупту өзүнөн кийинки даражадагы кишиге арналган арабага олтургузуп, анын алдынан: «Таазим кылгыла!» – деп жар салууну буйруду. Ушинтип, Жусупту бүткүл Мисир элине башчы кылды.

⁴⁴ Фараон Жусупка: – Мен фараонмун, бирок сенин уруксатыңсыз бүт Мисир жеринде эч ким эч нерсе кыла да албайт, эч жакка бара да албайт! – деди.

⁴⁵ Фараон Жусупка Сапнат-Панеах деген ат коюп, аны Он шаарындагы дин кызматчы Потифердин кызы Асыйнатка үйлөндүрдү. Ошентип, Жусуп Мисир жерин кыдырганы кетти.

⁴⁶ Жусуп Мисир падышасы фараондун кызматын кыла баштаганда отуз жашта эле. Ал фараондун ак сарайынан чыгып, бүтүн Мисир жерин кыдырып чыкты.

⁴⁷ Берекелүү жети жыл бою жер мол түшүм берип турду.

⁴⁸ Жусуп Мисир жеринен жети жыл ичинде алган эгинди бүт жыйнатып, шаарларга сактады. Ар бир шаарга анын айланасындагы талаалардагы түшүмдү жыйнатты.

⁴⁹ Жусуп деңиз кумундай көп дан жыйнагандыктан, өлчөгөнүн да токтотту. Анткени дан өлчөмсүз көп эле.

⁵⁰ Ачарчылыкка чейин Жусуп Он шаарынын дин кызматчысы Потифердин кызы Асыйнаттан эки уул көрдү.

⁵¹ «Кудай тарткан азаптарымдын баарын жана атамдын үйүн унуттурду», – деп, Жусуп тун уулун Менаше деп койду.

⁵² «Азап тарткан жерде Кудай менин өркүнүмдү өстүрдү» – деп, экинчи уулун Эпрайым деп койду.

⁵³ Ошентип, Мисирдеги жети жылдык молчулук да аяктап,

⁵⁴ Жусуп айткандай, жети жылдык ачарчылык башталды. Башка элдин баарында ачарчылык болуп, бирок бүт Мисир жеринде буудайдын кору бар эле.

⁵⁵ Акыры, бүт Мисир жери да ачарчылыктан жабыркай баштаганда, эл фараонго жалбарып, буудай сурап келди. Фараон жамы журтка: «Жусупка баргыла да, анын айтканын кылгыла!» – деп жооп берди.

⁵⁶ Ачарчылык бүт Мисир жерине келгенде, Жусуп бардык кампаларды ачтырып, мисирликтерге дан саттыра баштады. Ачарчылык болсо күчөгөндөн күчөй берди.

⁵⁷ Жусуптан дан сатып алганы Мисирге төгөрөктүн төрт бурчунан эл келип жатты, анткени бүт жер жүзүндө ачарчылык алкымдан алып турган эле.