Башталыш 40 - Инжил ЛС (2005)

Жусуптун камактагылардын түшүн жорушу

¹ Арадан убакыт өтүп, Мисир падышасынын шарап сунуучусу менен наабайчысы кожоюну – Мисир падышасынын алдында айыптуу болуп калышты.

² Фараон эки кызматкерине – башкы шарап сунуучу менен башкы наабайчыга ачууланып,

³ аларды сакчылар башчысынын үйүндөгү зынданга – Жусуп олтурган жерге каматты.

⁴ Сакчылар башчысы ошол туткундарды Жусупка тапшырып, алар үчүн жооптуу кылып койду. Ошентип, алар бир канча убакыт зынданда олтурушту.

⁵ Бир күнү Мисир падышасынын камактагы шарап сунуучусу менен наабайчысы экөө тең бир түндө өзгөчө мааниси бар эки башка түш көрүштү.

⁶ Жусуп таң атканда аларга келип, экөөнүн ындыны өчүп турганын көрдү.

⁷ Ал кожоюнунун үйүндө өзү менен бирге камакта олтурган фараон кызматчыларынан: – Эмнеге бүгүн сабырыңыздар суз? – деп сурады.

⁸ Алар: – Экөөбүз тең түш көрүп, жоруп берер киши жок, – дешти. – Түштүн жорулушу Кудайдан эмеспи? – деди Жусуп аларга. – Түшүңүздөрдү мага айтып берсеңиздер.

⁹ Ошондо башкы шарапчы Жусупка көргөн түшүн айтып берди: – Түшүмдө бет алдымда турган жүзүм сабагын көрдүм.

¹⁰ Анын үч бутагы бар экен. Бутактар бүчүр байлары менен гүлдөп, гүлдөрү дароо жүзүм болуп бышты.

¹¹ Фараондун чөйчөгү колумда экен. Жүзүмдөн алып, фараондун чөйчөгүнө ширесин сыгып, чөйчөктү фараондун колуна сундум.

¹² Жусуп ага мындай деди: – Түшүңүз мындай жорулат: үч бутак – бул үч күн дегени.

¹³ Үч күндөн кийин фараон сизди көтөрүп, мурунку кызматыңызга коёт. Мурдагыдай эле ага кайрадан шарап суна турган болосуз.

¹⁴ Ишиңиз оңунан чыкканда, мени эстеп, бир жакшылык кылыңыз. Фараонго мени айтып, бул үйдөн алып чыгыңыз.

¹⁵ Себеп дегенде, мени эврейлердин жеринен күчтөп алып келишкен. Бул жерде да зынданга камагыдай жамандык жасаган эмесмин.

¹⁶ Башкы наабайчы Жусуптун түштү жакшылыкка жоруганын көрүп, ага мындай деди: – Мен да түш көрдүм. Башымда үч себет бар экен.

¹⁷ Эң үстүнкү себетте фараонго арнап бышырылган түрдүү нан азыктары бар экен. Куштар башымдагы себеттен аларды чокуп жеп жатышыптыр.

¹⁸ – Түшүңүз мындай жорулат, – деди ага Жусуп. – Үч себет – бул үч күн дегени.

¹⁹ Үч күндөн кийин фараон башыңызды алып, жасатыңызды жыгачка астырат, анан куштар келип, денеңизди чокуп жешет.

²⁰ Үч күн өтүп, фараон туулган күнүндө бардык кызматчыларына той берип, алардын алдында башкы шарап сунуучу менен башкы наабайчынын тагдырын чечти.

²¹ Анан башкы шарапчысын мурунку кызматына коюп, ал фараонго шарап суна турган болду.

²² Ал эми башкы наабайчыны болсо, Жусуп жоругандай, жыгачка астырды.

²³ Башкы шарапчы Жусупту эстеген жок, аны жадынан чыгарды.