Башталыш 4 - Инжил ЛС (2005)

Кабылдын күнөөсү

¹ Адам аялы Обого жакындады. Обонун боюна бүтүп, Кабылды төрөдү да, «Жараткан Эгенин жардамы менен бала таптым», – деди.

² Анан ал Кабылдын иниси Абылды төрөдү. Абыл койчу, ал эми Кабыл жер иштеткен дыйкан болду.

³ Убакыт өтүп, Кабыл Жараткан Эгеге жердин жемишинен,

⁴ Абыл болсо төл башыларынын майлуу жерлерин тартуу кылды. Жараткан Эге Абылга жана анын тартуусуна ыраазы болду,

⁵ ал эми Кабылга жана анын тартуусуна ыраазы болгон жок. Буга Кабыл катуу ачууланып, кабагы карыш түйүлдү.

⁶ Ошондо Жараткан Эге Кабылга: – Эмне ачууландың? Эмнеге кабагыңды карыш түйөсүң?

⁷ Эгер жакшы иш жасасаң, башыңды көтөрүп жүрбөйт белең? Эгер жакшы иш жасабасаң, байкагын, күнөө босогоңдо турат. Ал сени өзүнө тартат, бирок аны тизгинде, – деди.

⁸ Кабыл иниси Абыл менен сүйлөшүп, аны талаага алып барды. Анан Абылга кол салып, аны өлтүрүп койду.

⁹ Жараткан Эге Кабылдан: – Иниң Абыл кайда? – деп сурады. Ал: – Билбейм, мен, эмне, иниме кароолчу белем? – деп жооп берди.

¹⁰ Ошондо Жараткан Эге: – Бул эмне кылганың? Иниңдин төгүлгөн каны Мага жерден зар какшап, боздоп жатат!

¹¹ Сен өзүң колдуу болгон иниңдин канын жуткан жердин каргышына калдың.

¹² Бул жерди канча иштетсең да, ал сага берекесин бербейт. Сен жер үстүндө тентимиш да кыдырмыш болосуң, – деди.

¹³ Кабыл жооп берип: – Менин жазам көтөрө алгыс оор.

¹⁴ Бүгүн мени бул жерден кууп олтурасың, эми Сенин көзүңөн алыстап, жер үстүндө тентимиш да кыдырмыш болом. Мени туш келген адам өлтүрөт го, – деди.

¹⁵ Бирок Жараткан Эге: – Жок, сени эч ким өлтүрбөйт! Ким сени өлтүрсө, андан жети эсе өч алынат, – деди да, кезиккендер өлтүрүп койбосун үчүн ага белги салып койду.

¹⁶ Ошондо Кабыл Жараткан Эгенин көз алдынан кетип, Эдендин чыгышындагы Нод деген жерге отурукташты.

Алгачкы элдин тарыхы

¹⁷ Кабыл аялына жакындады, аялы кош бойлуу болуп, Энохту төрөдү. Ошол убакта Кабыл шаар куруп жаткан. Ал шаарга уулу Энохтун атын койду.

¹⁸ Ал эми Энохтон Ират, Ираттан Махувол, Махуволдон Матушал, Матушалдан Лемек туулду.

¹⁹ Лемек эки аял алды, биринин ысмы Ада, бириники Зила эле.

²⁰ Ададан Жабал туулду. Ал чатырларда жашап, мал баккандардын түпкү атасы болду.

²¹ Анын инисинин аты Жубал эле. Ал кыл аспап менен үйлөмө аспапта ойногондордун түпкү атасы болду.

²² Зиланын да Тубалкабыл аттуу бир уулу болгон. Ал коло менен темирден ар түркүн курал-жабдыктарды жасады. Тубалкабылдын карындашынын аты Наама эле.

²³ Лемек аялдарына мындай деди: «Ада менен Зила, Мага кулак салгыла! Аялдары Лемектин, Сөзүмдү менин уккула! Жарадар кылган кишимди, Мени урган жаш уланды Аябастан өлтүрдүм.

²⁴ Кабыл үчүн өч алынса жети эсе, Лемек үчүн жете эсеге Жетимиши да кошулат».

Шет менен Эноштун туулушу

²⁵ Адам Обого дагы жакындады. Аялы уул төрөп, анын атын Шет деп койду. Себеби ал: «Кабыл Абылды өлтүргөн соң, Кудай мага анын ордуна башка бир уул берди», – деди.

²⁶ Шет да уулдуу болуп, ысмын Энош деп койду. Ошондон баштап адамдар Жараткан Эгенин атын чакырып сыйына башташты.