Башталыш 39 - Инжил ЛС (2005)

Жусуптун кыйын учурда да ийгиликке жетиши

¹ Ысмайыл уулдары Жусупту Мисирге алып келишкенде, фараондун кызматчысы, сакчылардын башчысы Потифар аны алардан сатып алды.

² Жараткан Эге Жусуп менен бирге болуп, аны ийгилик коштоду. Ал мисирлик кожоюнунун үйүндө жашады.

³ Кожоюну Жараткан Эге Жусупка жар болгонун, анын жасаган ишинин баарын жалгаганын көрдү.

⁴ Жусуп кожоюнунун көңүлүнө жагып, анын жакын кызматчысы болуп калды. Ээси Жусупту үйүнө, бүт чарбасына башкаруучу кылды.

⁵ Кожоюну Жусупту үйүнө, мал-мүлкүнө башкаруучу кылгандан кийин, Жараткан Эге Жусуп үчүн мисирликтин үйүнө батасын берди. Анын үйүндөгү, талаасындагы мал-мүлкүнө берекесин төктү.

⁶ Потифар колунда болгондун баарын Жусупка табыштап, жеген тамагынан башка нерсе менен иши болбоду. Жусуп келбети келишкен жигит эле.

Жусуптун азгырыкка туш болушу

⁷ Арадан убакыт өтүп, Потифардын аялынын Жусупка көзү түшүп, «мени менен жат» деди.

⁸ Бирок Жусуп баш тартып, кожоюнунун аялына мындай деди: – Мына, кожоюнум мен турганда үйүндөгү эч бир ишке аралашпайт, ал болгон чарбасын мага тапшырган.

⁹ Бул үйдө менден чоң эч ким жок. Ал сизден башка эч нерсеге тыюу салган жок, себеби сиз аялысыз. Анан кантип ушундай чоң жамандык жасап, Кудай алдында күнөө кылам?

¹⁰ Аял күн сайын ушинтип айта берсе да, Жусуп аны менен жаткан да жок, жанына жологон да жок.

¹¹ Бир күнү Жусуп өз иштерин жасоо үчүн үйгө кирди. Үйдө кызматчылардан эч ким жок эле.

¹² Ошондо Потифардын аялы Жусуптун чапанынан шап кармап: «Мени менен жат!» – деди. Бирок Жусуп чапанын аялдын колунда калтырып, сыртка качып чыкты.

¹³ Аял Жусуптун чапанын калтырып, сыртка чыга качканын көргөндө,

¹⁴ үй кызматчыларын чакырып, аларга: – Карагыла, эрим жанагы эврейди бизди кордош үчүн алып келген экен да! Ал мени менен жатканы кирди эле, мен күчүм барынча бакырып жибердим.

¹⁵ Кыйкырып-бакырганымды уккан ал чапанын жаныма таштаган боюнча сыртка чыга качты, – деди.

¹⁶ Ошентип кожоюну үйгө келгенче, аял Жусуптун чапанын өзүндө кармап турду.

¹⁷ Анан бая айткандарын эрине кайталап: «Сен алып келген эврей кулуң мага келип, мени кордоюн деди.

¹⁸ Бирок мен катуу бакырып жибергенимде, чапанын таштай салып, тышка качып чыкты», – деди.

¹⁹ Жусуптун кожоюну аялынын: «Сенин кулуң мага ушинтти», – дегенин укканда, каары кайнады.

²⁰ Ал Жусупту карматып, падышанын туткундары камалган зынданга салдырды. Жусуп зынданда болгондо да,

²¹ Жараткан Эге аны колдоп, ырайым кылып, зындан башчынын көңүлүн ага бургузду.

²² Зындан башчы болсо камактагы туткундардын баарын Жусуптун кол алдына берди. Жусуп ал жердеги бардык ишке жоопкер болду.

²³ Зындан башчы Жусупка тапшырган жумуштун эч бирине кийлигишпеди, анткени Жараткан Эге Жусупту колдоп, анын ар бир ишин жалгап турду.