Башталыш 38 - Инжил ЛС (2005)

Тамардын тагдыры

¹ Ошол убакта Иуда бир туугандарынан бөлүнүп, адулламдык Хира деген кишинин жанына барып отурукташты.

² Иуда ошол жерден канаандык Шаа дегендин кызын учуратып, ага үйлөндү да, анын жанына кирди.

³ Аялынын боюна бүтүп, уул төрөдү. Иуда ага Эр деген ат койду.

⁴ Аялы дагы кош бойлуу болуп, уул төрөдү да, анын атын Онан койду.

⁵ Ал дагы уул төрөп, анын атын Шела койду. Шела туулганда, Иуда Кезибде болчу.

⁶ Иуда тун уулу Эрди Тамар деген кызга үйлөнттү.

⁷ Жараткан Эге Иуданын тунгучу Эр жаман адам экенин көрүп, анын жанын алды.

⁸ Анан Иуда Онанга: – Агаңдын аялына үйлөнүп, кайнилик милдетиңди орундат. Агаңдан туяк калсын, – деди.

⁹ Онан болсо бала өзүнүкү болбосун билип, агасынын тукумун улагысы келбей, агасынын аялы менен жатканда, уругун жерге агызып салчу.

¹⁰ Анын мындай кылганы Жараткан Эгеге жакпагандыктан, Ал анын да жанын алды.

¹¹ Ошондо Иуда Тамарга: – Атаңдын үйүнө барып, уулум Шела эр жеткенче жесир катары жашай тур, – деди. Себеби Иуда: «Шела да агаларына окшоп өлүп калбагай эле», – деп ойлогон. Ошентип, Тамар атасынын үйүнө кайтты.

¹² Арадан көп убакыт өтүп, Шаанын кызы – Иуданын аялы кайтыш болду. Аза күтүү убагы бүткөндө, Иуда адулламдык досу Хира менен Тимнадагы койлорун кыркып жаткан адамдарга жөнөдү.

¹³ Кайнатасынын Тимнага кой кыркынга бара тургандыгын Тамарга айтышты.

¹⁴ Тамар ошондо жесирлик кийимин чечип, жамынчысын жамынып алып, Тимнага кетчү жолдогу Энайым шаар дарбазасынын жанына барып олтурду. Анткени Шела эр жетсе да, Иуда Тамарды Шелага алып берген эмес.

¹⁵ Тамардын жүзү жабык болгондуктан, Иуда аны көргөндө, сойку аял деп ойлоду.

¹⁶ Иуда жолдон бурулуп, анын жанына келди да, келини экенин билбей: – Жүр, сени менен жатайын, – деди. Тамар: – Жатсаңыз, акысына эмне бересиз? – деди.

¹⁷ Иуда: – Малымдан бир улак берип жиберем, – деди. – Улагыңыз келгенге чейин күрөөгө бир нерсе калтырыңыз, – деди Тамар.

¹⁸ Иуда: – Күрөөгө эмне берейин? – деп сурады. Тамар: – Мөөрүңүздү боосу менен, ага кошуп колуңуздагы таягыңызды да калтырыңыз, – деди. Иуда сурагандарын берип, аны менен жатты да, андан Тамардын боюна бүттү.

¹⁹ Тамар ал жерден кетти да, жамынчысын чечип, жесирдик кийимдерин кийди.

²⁰ Иуда болсо адулламдык досуна улакты берип, күрөөгө калтырган буюмдарын алып келүүгө жиберди. Бирок Хира аялды таппады.

²¹ Хира ошол жерликтерден: – Энайымда, жол боюнда олтурчу жанагы аял кайда кеткен? – деп сурады. Алар болсо: – Бул жерде эч кандай аял олтурчу эмес, – деп жооп беришти.

²² Хира Иудага кайтып келип: – Аялды таба албадым. Энайымдыктар да ал жерде эч кандай аял болгон эмес дешти, – деди.

²³ Иуда: – Мейли, буюмдарым анда кала берсин. Шылдың болбосок эле болду. Мен го улакты берип жибердим, бирок сен аялды таба албай келбедиңби, – деди.

²⁴ Арадан үч ай өткөндөн кийин Иудага: «Келиниң Тамар аягы суюктук кылып, азыр кош бойлуу экен», – деген сөз жетти. Ошондо Иуда: – Аны сыртка алып чыгып, өрттөп жибергиле, – деди.

²⁵ Тамарды үйүнөн алып чыгышканда, ал кайнатасына: «Мен мына бул буюмдардын ээсинен кош бойлуу болдум. Бул мөөр, мөөрдүн боосу жана таяк кимдики, тааныйсызбы?» – деп айттырып жиберди.

²⁶ Иуда буюмдарын таанып: «Аныкы туура, мен аны уулум Шелага алып бербей койгом», – деди. Ушундан кийин Иуда Тамар менен жаткан жок.

²⁷ Тамардын төрөй турган маалы келгенде, курсагында эгиз бала бар экени маалым болду.

²⁸ Төрөт убагында балдардын бири колун чыгарды. Аначы аял «ушунусу биринчи төрөлдү» деп, баланын колун кармап, билегине кызыл жип байлап койду.

²⁹ Бирок ал колун кайра тартып алды, анан биринчи анын бир тууганы төрөлдү. Аначы аял: «Сен кантип жол таап чыктың?» – деп, анын аты Перес коюлду.

³⁰ Анын артынан колуна кызыл жип байланган бир тууганы төрөлдү. Ага Зерак деген ат коюлду.