Башталыш 37 - Инжил ЛС (2005)

Жусуп жана анын аталаш бир туугандары

¹ Жакып болсо атасы келгин болуп жашап өткөн Канаан жерине отурукташты.

² Анын уулдарынын тарыхы мындай: Он жети жашар Жусуп агалары, Жакыптын Билха жана Зилпа деген аялынан төрөлгөн балдары менен атасынын коюн кайтарышып жүрдү. Ал атасына агаларынын жаман кылык-жоруктарын жеткирип турду.

³ Карыганда көргөн баласы болгондуктан, Ысрайыл Жусупту башка уулдарынан артык көрчү. Ал ага кооз чапан жасатып берди.

⁴ Атасынын Жусупту өздөрүнөн артык көрөрүн билип, агалары аны жек көрүшүп, ага жылуу сөз айта албай калышты.

⁵ Бир күнү Жусуп түш көрдү. Түшүн агаларына айтып бергенде, тигилер аны ого бетер жек көрүп калышты.

⁶ – Уксаңар, мен мындай түш көрдүм, – деди Жусуп аларга.

⁷ – Биз талаада буудай боолап жүрүптүрбүз. Аңгыча менин боом тикесинен тик туруп калды. Силердики болсо менин боомду тегеректеп алып, ага жүгүнүштү.

⁸ – Сен, эмне, бизге падыша болуп, башкарам дегени турасыңбы?! – дешти агалары. Көргөн түшү, айткан сөзү үчүн аны ого бетер жек көрүп калышты.

⁹ Жусуп кийин дагы түш көрүп, аны да агаларына айтып берди: – Уксаңар, мен дагы түш көрдүм. Түшүмдө күн, ай жана он бир жылдыз мага жүгүнүштү.

¹⁰ Ал бул түшүн атасына да айтып бергенде, атасы: – Деги сен эмне деген түш көрдүң!? Мен да, энең да, агаларың да сенин алдыңа келип, жерге жете ийилип, жүгүнөт экенбиз да? – деп урушту.

¹¹ Агаларынын ичтери күйүп, атасы болсо анын сөздөрүн жадына сактап калды.

Жусуптун кулчулукка сатылышы

¹² Жусуптун агалары атасынын коюн бакканы Шекемге кетишкенде,

¹³ Ысрайыл Жусупка мындай деди: – Агаларың Шекемде кой кайтарып жүргөнүн билесиң. Аларга барып кел. Жусуп: – Куп болот, – деди.

¹⁴ Ошондо атасы: – Барып, агаларың сак-саламат, мал-жаны аман экенин көрүп, кабар алып кел, – деп аны Хеврон өрөөнүнөн Шекемге жөнөттү. Жусуп Шекемге жетип,

¹⁵ талаада адашып жүргөндө, бир киши көрүп: – Эмне издеп жүрөсүң? – деп сурады.

¹⁶ Жусуп: – Агаларымды издеп жүрөм. Кой-эчкилерин кайсы жерде кайтарып жүргөнүн билесизби? – деди.

¹⁷ Тиги киши: – Алар бул жактан кетип калышкан. Мен алардын «Дотанга баралы» дегенин уккам, – деди. Жусуп агаларынын артынан барып, аларды Дотандан тапты.

¹⁸ Агалары Жусупту алыстан көрүп, ал жакын келгенче, аны өлтүрөбүз деп макулдашышты.

¹⁹ Алар бири-бирине: «Тигине, түш көргүч мырзабыз келатат.

²⁰ Келгиле, көзүн тазалайлы да, сөөгүн чуңкурлардын бирине таштап салалы. Анан жырткыч айбанга жем болуптур дейбиз. Анан баягы түшүнүн эмне болорун көрөбүз», – дешти.

²¹ Рубен муну укканда, Жусупту алардын колунан куткармакчы болуп: – Жок, өлтүрбөйлү! – деди.

²² Анан дагы: – Кан төкпөгүлө, аны ээн талаадагы чуңкурга таштагыла, ага колуңар тийбесин! – деди. Рубен Жусупту тигилердин колунан куткарып, аны атасына кайтарайын деген ниетте ушундай деди.

²³ Жусуп агаларына келери менен алар үстүндөгү чапанын, анын кооз чапанын чечип алып,

²⁴ өзүн болсо кургап калган бош чуңкурга таштап жиберишти.

²⁵ Анан алар тамактанганы олтурушканда, төөлөрүнө ар түрдүү жыттуу чайырлар менен майларды артып, Гилаттан Мисирге бараткан Ысмайыл уулдарынын кербенин көрүп калышты.

²⁶ Ошондо Иуда бир туугандарына мындай деди: – Инибизди өлтүрүп, канын жашырганыбыздан не пайда?

²⁷ Андан көрө, аны Ысмайыл уулдарына саталы, анын канына забын болбойбуз, себеби ал биздин кандаш бир тууганыбыз да, – деди. Бир туугандары буга макул болушту.

²⁸ Мидияндык соодагерлер жанынан өтүп баратышканда, агалары Жусупту чуңкурдан чыгарышып, аны Ысмайыл уулдарына жыйырма шекел күмүшкө сатып жиберишти. Алар Жусупту Мисирге алып кетишти.

²⁹ Рубен кайра чуңкурга келип, Жусуптун анда жок экенин көргөндө, кайгыдан кийимин айрып жиберди.

³⁰ Анан бир туугандарына келди да: – Бала жок! Эми кайда барамын? – деди.

³¹ Ошондо алар бир улакты союп, Жусуптун чапанын канга малышты да,

³² аны атасына алып барып: – Биз мына муну таптык. Карасаңыз, ата, бул уулуңуздун чапаны эмеспи? – дешти.

³³ Жакып чапанды таанып: – Бул баламдын чапаны! Ал жырткычка жем болгон турбайбы! Жусубумду жырткыч жарып кетиптир! – деди.

³⁴ Жакып кийимин айрып, зумбалдан аза кийим кийип, уулун көп күн жоктоп ыйлады.

³⁵ Уул-кыздары түгөл келип, жубатса да, ал кулак салбай: «Уулумдун жанына, о дүйнөгө баргыча мен кайгырып жүрүп өтөрмүн», – деп уулун жоктоп аза күттү.

³⁶ Бул арада мидияндар Жусупту Мисирге алып барып, фараондун кызматчысы, сакчылардын башчысы Потиферге сатып жиберишти.