Башталыш 35 - Инжил ЛС (2005)

Жакыптын Бейтелге кайтышы

¹ Кудай Жакыпка: «Бейтелге бар да ошол жерге жаша. Ал жерге Мага, агаң Эсаптан качып баратканыңда көрүнгөн Кудайыңа арнап курмандык жай кур», – деди.

² Ошентип Жакып үйүндөгүлөргө, жанындагы адамдарынын баарына мындай деди: – Бөтөн кудайларыңарды ыргыткыла, тазаланып, кийимиңерди алмаштыргыла.

³ Бул жерден Бейтелге көчөбүз. Башыма оор күн түшкөндө жардам берип, кайда барсам жанымда болгон Кудайга арнап ошол жерге курмандык жай курам, – деди.

⁴ Баары колдорундагы бөтөн кудайларын, кулактарындагы сөйкөлөрүн Жакыпка беришти. Жакып аларды Шекемдин жанындагы эмендин түбүнө көөмп салды.

⁵ Анан алар жолго чыгышты. Кудай ошол тегеректеги шаарлардын тургундарынын жүрөк үшүн алгандыктан, эч ким алардын изине түшүп, кубалаган жок.

⁶ Жакып жанындагы бардык адамдары менен Канаан жериндеги азыр Бейтел деп аталган Лузга келип,

⁷ ал жерге курмандык жай куруп, аны Бейтелдин Кудайы деп атады, анткени агасынан качып баратканда, Кудай ага ошол жерден көрүнгөн.

⁸ Ошол кезде Рабиганын эмчек энеси Дебора каза болуп, Бейтелдин жанындагы эмендин түбүнө жерге берилди. Ошондуктан Жакып ал эменди «Жоктоо эмени» деп атады.

⁹ Жакып Паддан-Арамдан кайтып келгенде, Кудай дагы бир ирет көрүнүп, батасын берди.

¹⁰ «Жакып эле ысымың Эми Жакып аталбай, Ысрайыл болосуң», – деп, Кудай аны Ысрайыл атады.

¹¹ Кудай ага дагы мындай деди: «Кудурети күчтүү Кудаймын. Өркүнүң өсүп, көбөйгүн. Тукумдап сенден эл чыгат, Ал турсун тарайт көп элдер, Тукумуңан өзүңдүн Падышалар да чыгат.

¹² Ыбрайым менен Ыскакка Энчилеген бул жерди Сага жана болочок Тукумуңа беремин».

¹³ Ушундай деп, Кудай Жакыпка сүйлөгөн жерден көтөрүлүп кетти.

¹⁴ Жакып Кудай өзүнө сүйлөгөн жерге таш тургузуп, эстелик кылып, анын үстүнө Кудайга атап ичимдик тартуусун жана зайтун майын куйду.

¹⁵ Ал Кудай өзүнө сүйлөгөн жерди Бейтел деп атады.

Бейт-Лехемге бараткандагы кайгылуу окуя

¹⁶ Алар Бейтелден чыгып, Эфратага аз калганда, Рахелдин толгоосу келип, төрөтү оор болду.

¹⁷ Ал төрөттөн катуу кыйналып жатканда, аначы аял: «Коркпо, сен дагы уул төрөдүң», – деди.

¹⁸ Рахел жаны үзүлөрдө баланын ысмын Бенони деп кетти. Атасы болсо анын атын Бенжамин деп койду.

¹⁹ Ошентип Рахел көз жуумп, азыр Бейт-Лехем аталган Эфратага бараткан жолдун боюна коюлду.

²⁰ Жакып анын мүрзөсүнө моло таш орнотту. Рахелдин эстелик ташы азыр да бар.

²¹ Анан Ысрайыл дагы көчүп, Эдер мунарасынын ары жагына чатырын тикти.

²² Ысрайыл ошол жерде жашап жатканда, Рубен атасынын токолу Билханын жанына кирди. Муну атасы да укту. Жакыптын он эки уулу бар эле.

Жакыптын уулдары

²³ Леянын уулдары: Жакыптын тун уулу Рубен, Ысман, Леби, Иуда, Ысахар жана Забулун.

²⁴ Рахелдин уулдары: Жусуп менен Бенжамин.

²⁵ Рахелдин күңү Билханын уулдары: Дан менен Напталы.

²⁶ Леянын күңү Зилпанын уулдары: Гад менен Ашыр. Булар Жакыптын Паддан-Арамда туулган уулдары.

²⁷ Жакып Мамредеги Кирият-Арбага, атасы Ыскакка келди. Кирият-Арба – бул азыркы Хеврон. Ал жерде Ыбрайым менен Ыскак келгин болуп жашаган.

²⁸ Ыскак 180 жыл жашап,

²⁹ узак өмүр сүрүп, карыганда, дүйнө салып, ата-бабасына кошулду. Уулдары Эсап менен Жакып анын сөөгүн жерге беришти.