Башталыш 30 - Инжил ЛС (2005)

¹ Рахел Жакыпка бала төрөп бербегендиктен эжесине ичи күйүп, Жакыпка: – Мага бала бериңиз, болбосо өлөм! – деди.

² Жакып Рахелге ачуусу келип: – Мен, эмне, сени куу этек кылган Кудай белем? – деди.

³ Рахел: – Анда күңүм Билха менен жатыңыз. Ал этегиме төрөп берсин, анын аркасы менен балалуу болоюн, – деди да,

⁴ күңү Билханы күйөөсүнө алып берди. Жакып Билха менен жатты.

⁵ Билханын боюна бүтүп, Жакыпка уул төрөп берди.

⁶ Ошондо Рахел: «Кудай мени актады. Үнүмдү угуп, мага уул берди», – деп, уулунун ысмын Дан койду.

⁷ Рахелдин күңү Билханын дагы боюна бүтүп, Жакыпка экинчи уулун төрөп берди.

⁸ Рахел анан: «Эжем менен катуу таймашып, жеңип чыктым», – деди да балага Напталы деген ат койду.

⁹ Лея төрөтү токтогонун көрүп, күңү Зилпаны Жакыпка алып берди.

¹⁰ Леянын күңү Зилпа Жакыпка уул төрөп берди.

¹¹ Лея: «Жолум болду», – деп балага Гад деген ат койду.

¹² Леянын күңү Зилпа Жакыпка экинчи уулун төрөп берди.

¹³ Ошондо Лея: «Мен кандай бактылуумун! Эми мени аялдар „бактылуу“ дей турган болушат!» – деп, уулунун атын Ашыр койду.

¹⁴ Буудай оруу маалында Рубен талаага барып, мээр чөп таап алды да аны энесине алып келди. Ошондо Рахел Леяга: – Уулуңдун мээр чөбүнөн мага да берчи, – деди.

¹⁵ Лея болсо: – Күйөөмдү ээлеп алганың аз келгенсип, эми уулумдун мээр чөбүн да алгың барбы! – деди. Рахел ага: – Мейли, уулуңдун мээр чөбүнүн ордуна эрим бул түнү сени менен жатсын, – деди.

¹⁶ Жакып кечкурун талаадан келгенде, Лея алдынан тосуп чыгып: – Бүл түнү мени менен жатыңыз, сизди уулумдун мээр чөбүнө сатып алдым, – деди. Ошентип, Жакып ошол түнү Лея менен жатты.

¹⁷ Кудай Леяга назарын буруп, анын боюна бүтүп, Жакыпка бешинчи уулун төрөп берди.

¹⁸ Анан ал: «Кудай күңүмдү күйөөмө бергенимдин акысын кайтарды», – деп, баланын ысмын Ысахар койду.

¹⁹ Леянын дагы боюна бүтүп, Жакыпка алтынчы уулун төрөдү.

²⁰ Ошондо Лея мындай деди: – Кудай мага сонун белек берди. Эми күйөөм мени сыйлап, урматтайт, анткени мен ага алты уул төрөп бердим, – деди да баласынын ысмын Забулун койду.

²¹ Кийин кыз төрөп, атын Дина деп койду.

²² Кудай Рахелди унуткан жок. Ал аны угуп, этегин жалгады.

²³ Рахелдин боюна бүтүп, уул төрөдү. Ал: «Кудай мени шылдыңдан куткарды», – деди.

²⁴ Анан «Жараткан Эге мага дагы бир уул берсин» деп, уулуна Жусуп деген ат койду.

Жакып менен Лабандын келишими

²⁵ Рахел Жусупту төрөгөн соң, Жакып Лабанга мындай деди: – Мени коё бериңиз, эл-жериме кайтайын.

²⁶ Аялдарым менен балдарым үчүн кызматыңызды кылдым, аларды бериңиз, эми кетейин. Сизге канча кызмат кылганымды өзүңүз билесиз.

²⁷ Лабан: – Ырайым этип, сөзүмө кулак салып койчу! Жараткан Эге мени сен үчүн жалгаганын төлгө ачтырып билдим.

²⁸ Кызмат акыңды өзүң быч, төлөп берейин, – деди.

²⁹ – Сизге кылган кызматымды, мен барда малыңыз кандай болгонун билесиз.

³⁰ Мага чейин саналуу гана малыңыз болсо, азыр абдан көбөйдү. Мен келгенден бери Жараткан Эге сизге берекесин берди. Бирок өз үйүм үчүн качан иштейм? – деди Жакып.

³¹ – Сага эмне берейин? – деди Лабан. – Мага эч нерсе бербеңиз. Эгер менин шартыма көнсөңүз, коюңузду кайтарып, бага берем, – деди Жакып. –

³² Бүгүн малыңызды түгөл аралап чыгып, андан ар бир ала-кула жана темгилдүү койду, анан дагы койдун карасын жана эчкилердин ала-кула жана темгилдүүлөрүн бөлүп коёюн. Булар менин кызмат акым болсун.

³³ Кийин кызмат акымды текшергени келгениңизде, актыгым ушундан билинсин: менден ала-кула, темгил, кара эмес кой-эчки тапсаңыз, аларды сизден уурдалган деңиз.

³⁴ – Макул, – деди Лабан, – сен айткандай болсун.

³⁵ Лабан ошол эле күнү ала-кула, чаар текелерди, ала-кула, темгилдүү эчкилерди жана кара койлорду – баарын оторунан бөлүп, балдарынын колуна тапшырды.

³⁶ Алар Жакыптан ары үч күндүк жолго көчүп кетишти. Жакып Лабандын калган койлорун карап кала берди.

³⁷ Жакып теректин, бадамдын жана чынар дарагынын жаш чырпыктарынан кесип алды да, аларды ала-кула кылып аарчып,

³⁸ мал суу иче турган ноолорго салып койду. Анткени кой-эчки суу ичкени келгенде кууттан чыкчу.

³⁹ Ошентип, кой-эчки чырпыктарды карап, кууттан чыккандан кийин, алардан чаар, темгил, ала-кула козу-улактар туулуп жатты.

⁴⁰ Жакып козу-улактарды өзү үчүн бөлүп, койлорду Лабандын ала-кула жана кара малы жакты каратып койду. Жакып ушундай жол менен менчик малдуу болуп, аларды Лабандын малына аралаштырган жок.

⁴¹ Малдын семизи келгенде, алар чырпыктарды карап, кууттан чыксын деп, чырпыктарды ноого салып койчу да,

⁴² арык мал келсе, салчу эмес. Ошентип арык малдан туулганы Лабанга, семиз малдан туулганы Жакыпка тийип турду.

⁴³ Жакып ошентип абдан байып кетти. Анын малы, күңдөрү менен кулдары, төөлөрү менен эшектери көбөйдү.