Башталыш 3 - Инжил ЛС (2005)

Биринчи күнөө

¹ Кудай Эге жараткан айбандардын ичинен эң куусу жылан эле. Ал аялдан: – Кудайдын силерге бактагы бир дагы дарактын жемишинен жебегиле дегени чынбы? – деп сурады.

² Аял жыланга: – Жок, бактагы дарактардын жемишинен жесек болот.

³ Бирок Кудай: «Бактын ортосунда турган дарактын жемишинен жебегиле, ага тийбегиле, антпесе өлөсүңөр», – деп айткан, – деп жооп берди.

⁴ Ошондо жылан аялга: – Жок, өлбөйсүңөр!

⁵ Кайра, силер ушул жемишти жеген кезде көзүңөр ачылып, эмне жакшы, эмне жаман экенин айырмалап, Анын Өзүнө окшоп каларыңарды Кудай жакшы билет, – деди.

⁶ Аял дарактын жемишинин жегенге жакшы, көз жоосун алган сонун экенин көрүп, акылдуу кыларын билип, жегиси келди. Жемишти үзүп алып жеди да, жанындагы күйөөсүнө берип, ал да жеди.

⁷ Ошол замат экөөнүн көздөрү ачылып, өздөрүнүн жылаңач экенин билишти. Анан анжир жалбырактарынан алжапкыч жасап алышты.

⁸ Кечки жел соккон кезде, адам аялы экөө Кудай Эгенин бак ичинде жүргөн дабышын угуп, дарактардын арасына жашынып калышты.

⁹ Ошондо Кудай Эге: – Каяктасың? – деп адамды чакырды.

¹⁰ Ошондо ал: – Бакта жүргөнүңдү угуп, коркуп кеттим. Себеби мен жылаңачмын, ошол үчүн жашынып калдым, – деп жооп берди.

¹¹ Кудай Эге адамдан: – Жылаңачсың деп сага ким айтты? Мен жегенге тыюу салган дарактын жемишинен жедиңби? – деп сурады.

¹² Ал: – Мага Өзүң берген аял ошол дарактын жемишинен берди, мен жедим, – деди.

¹³ Кудай Эге аялдан: – Бул эмне кылганың? – деп сурады. – Жылан мени алдады, мен жедим, – деди аял.

Кудайдын өкүмү жана убадасы

¹⁴ Ошондо Кудай Эге жыланга: – Ушундай кылганың үчүн бардык мал менен жапайы айбандардын ичинен сага каргыш тийсин. Өмүр бою жер менен сойлоп, топурак жеп өт!

¹⁵ Аял экөөңөрдү, сенин тукумуң менен анын тукумун кас кылам. Аялдын тукуму башыңды жанчыйт, сен анын согончогун чагасың, – деди.

¹⁶ Ал эми аялга мындай деди: – Кош бойлуу кезиңде азабыңды көбөйткөндөн көбөйтөм, балдарыңды кыйналып төрөйсүң. Сен күйөөңө куштар болосуң, ал болсо сени башкарат.

¹⁷ Ал эми адамга мындай деди: – Аялыңдын тилин алып, Мен тыюу салган дарактын жемишинен жеген сенин кесириңден жердин кыртышы каргышка калды! Мындан кийин өмүр бою азап тартып наныңды жерден таап жейсиң.

¹⁸ Сен талаада өскөн дандуу өсүмдүктөрдөн жейсиң. Жердин топурагы сага уйгак-тикен өстүрөт.

¹⁹ Өзүң жаралган жердин койнуна кайтып барганча, жээр наныңды маңдай териң менен табасың. Сен топурактан жаралдың, кайра топуракка кайтасың!

Адам менен Обонун Эденден куулушу

²⁰ Адам аялына Обо деген ат койду. Себеби ал жердеги жашоочулардын түпкү энеси болду.

²¹ Кудай Жараткан Эге адам менен анын аялына териден кийим жасап, кийиндирди.

²² Андан кийин Ал мындай деди: «Мына, адам жаман-жакшыны билип, Биз сыяктуу болуп калды. Эми колун созуп, өлбөс өмүр бере турган дарактын жемишинен да үзүп алып жеп, түбөлүк жашап калбасын».

²³ Ошентип, Кудай Жараткан Эге адамды өзү жаратылган жерди иштетсин деп, Эден багынан кууп чыкты.

²⁴ Адамды кууп чыккандан кийин, өмүр бере турган даракка алып барчу жолду күзөтүү үчүн Эден багынын чыгыш жагына керуптарды жана туш тарапка айланып турган оттуу кылычты коюп койду.