Башталыш 29 - Инжил ЛС (2005)

Жакыптын чыгыштагы туугандарына келиши

¹ Жакып жолун улантып, чыгышта жашагандардын жерине келди.

² Анан ошол жердеги талаадан кудукту, анын айланасында жуушап жаткан үч короо койду көрдү. Анткени койлорду ушул кудуктан сугарышчу. Анын оозунда чоң таш бар эле.

³ Койлордун баары ушул кудукка чогулганда, койчулар оозундагы ташты жылдырып, койлорун сугарышчу. Анан ташты кайра мурдагы ордуна, кудуктун оозуна жылдырып коюшчу.

⁴ – Туугандар, – деди Жакып аларга, – кайсы жерденсиңер? – Харанданбыз, – деди тигилер.

⁵ – Нахордун небереси Лабанды тааныйсыңарбы? – Тааныйбыз.

⁶ – Ал сак-саламат жүрөбү? – Ооба, сак-саламат жүрөт, тигине, кызы Рахел кою менен келатат.

⁷ – Күн эрте го, койлорду чогултчу убак боло элек, сугарып алып, жайытка айдап барбайсыңарбы.

⁸ – Койлордун баары келмейин, анте албайбыз. Баары келгенде, анан кудуктун оозундагы ташты жылдырып, сугарабыз.

⁹ Жакып алар менен сүйлөшүп турганда, кой кайтарган Рахел атасынын койлору менен келип калды.

¹⁰ Жакып таякеси Лабандын кызы Рахелди жана тууганынын малын көргөндө, кудук оозунан ташты жылдырды да таякесинин койлорун сугарды.

¹¹ Анан Рахелди өөп, бакырып ыйлап,

¹² өзүн «атаңдын жээнимин, Рабиганын уулумун» деп тааныштырды. Рахел жүгүрүп барып, атасына кабар берди.

¹³ Лабан жээни Жакып тууралуу угары менен, алдынан чуркап тосуп чыгып, кучактап өөп, үйүнө алып келди. Анан Жакып ага баарын айтып берди.

¹⁴ Ошондо Лабан: – Ооба, чын эле менин бир боорумсуң, – деди. Жакып Лабандын үйүндө бир ай тургандан кийин,

¹⁵ Лабан ага мындай деди: – Тууганым болгонуң үчүн эле сен мага бекер кызмат кылышың керекпи? Айтчы, кызмат акыңа эмне берейин?

¹⁶ Лабандын эки кызы болуп, улуусунун аты Лея, кичүүсүнүн аты Рахел эле.

¹⁷ Лея көздөрү сүйкүмдүү, Рахел болсо келбети келишип, чырайлуу эле.

¹⁸ Жакып Рахелге ашык болуп, ошол үчүн: – Кенже кызыңыз Рахел үчүн сизге жети жыл иштеп берейин, – деди.

¹⁹ Лабан: – Башкага бергенден көрө, сага бергеним артык. Меникинде жашай бер, – деди.

²⁰ Рахел үчүн Жакып жети жыл иштеди. Рахелди жакшы көргөндүктөн, бул жети жыл ал үчүн жети күндөй өтүп кетти.

²¹ Анан Жакып Лабанга: «Убадалашкан убакыт келди, колуктумду бериңиз», – деди.

²² Лабан ошол жердеги бүт элди чакырып, той берди.

²³ Бирок кечинде кызы Леяны алып келип, Жакыптын үстүнө киргизди, Жакып аны менен жатты.

²⁴ Лабан күңү Зилпаны Леяга күң кылып берди.

²⁵ Жакып таң атканда туруп караса, жанында Лея жатыптыр! – Бул эмне кылганыңыз? – деди Жакып Лабанга. – Мен сизге Рахел үчүн кызмат кылбадымбы? Эмнеге мени алдадыңыз?

²⁶ Лабан: – Сиңдисин эжесинен мурда күйөөгө берген биздин салтта жок.

²⁷ Жети күн той бүткүчө күтө тур, анан дагы жети жылдык кызматың үчүн Рахелди да беребиз, – деди.

²⁸ Жакып буга көнүп, ошол жума бүткүчө Лея менен болду. Анан Лабан ага кызы Рахелди да аял кылып берди.

²⁹ Лабан күңү Билханы Рахелге күңдүккө берди.

³⁰ Жакып Рахел менен да жатты. Ал Леяга караганда Рахелди көбүрөөк жакшы көрчү. Ал үчүн Лабанга дагы жети жыл кызмат кылды.

Жакыптын бала-бакырасы

³¹ Жараткан Эге Жакыптын Леяга көңүлү жок экенин көрүп, анын этегин жалгады, Рахел болсо төрөгөн жок.

³² Леянын боюна бүтүп, уул төрөдү. «Жараткан Эге бейтаалай экенимди көрдү, эми күйөөм мени жакшы көрүп калат», – деп, уулуна Рубен деп ат койду.

³³ Ушундан соң дагы кош бойлуу болуп, жана бир уул төрөдү. «Күйөөмдүн мага көңүлү жок экенин көрүп, Жараткан Эге бул уулду да берди» деп, ага Ысман деген ат койду.

³⁴ Кайра кош бойлуу болуп, уул төрөп: «Эми күйөөм мага байланат, анткени мен ага үч уул төрөп бердим», – деп, бул уулуна Леби деген ат койду.

³⁵ Анан кайра кош бойлуу болуп, уул төрөп: «Бул жолу мен Жараткан Эгеге алкыш айтам», – деп, ага Иуда деген ат койду. Анан анын төрөтү токтоду.