Башталыш 28 - Инжил ЛС (2005)

¹ Ыскак Жакыпты чакырып алып, ага батасын берип, мындай деди: – Канаандыктардан аял алба.

² Паддан-Арамдагы таятаң Бетуелдикине барып, ошол жердик таякең Лабандын кыздарынын бирине үйлөн.

³ Кудуреттүү Кудай сени жалгап, тукумуңду көбөйткөндөн көбөйтүп, сенден көп эл чыксын.

⁴ Ал Ыбрайымга берген батасын сага жана сенин тукумуңа берсин. Кудай Ыбрайымга берген, сен азыр жашап турган ушул жер энчиңе тийсин.

⁵ Ошентип Ыскак Жакып менен коштошту. Жакып Паддан-Арамга, өзүнүн жана Эсаптын энеси Рабиганын агасына, арамилик Бетуелдин уулу Лабандыкына кетти.

Эсаптын Ысмайылдын кыздарынан аял алышы

⁶ Эсап атасынын Жакыпка батасын берип, аял алуу үчүн Паддан-Арамга жөнөткөнүн жана «канаандыктардан аял алба» дегенин,

⁷ Жакып ата-энесинин тилин алып, Паддан-Арамга кеткенин билди.

⁸ Атасынын канаандык кыздарды жактырбаганын Эсап түшүндү.

⁹ Ошондуктан ал Ыбрайымдын уулу Ысмайылга барып, аялдарынын үстүнө Ысмайылдын кызы, Наваёттун карындашы Махалатты аял кылып алды.

Жакыптын Бейтелде көргөн түшү

¹⁰ Жакып Бээр-Шевадан чыгып, Харанга бет алды.

¹¹ Күн батканда бир жерге келип, түнөгөнү токтоду. Ошол жерден бир таш алып, аны жазданып, уктаганы жатты.

¹² Түшүнө жерден асманга чейин жетип турган бир шаты кирди. Ошол шаты менен периштелер түшүп-чыгып жатышкан экен.

¹³ Шатынын башында Жараткан Эгенин Өзү туруптур. Ал мындай деди: «Мен Жараткан Эге, бабаң Ыбрайымдын Кудайымын, Ыскактын Кудайымын, сен жаткан жерди сага жана сенин тукумуңа берем.

¹⁴ Алар жер бетиндеги кумдай көп болуп, батыш менен чыгышка, түндүк менен түштүккө жайылат да, сен жана сенин тукумуң аркылуу жер жүзүндөгү бардык элдер Менин батамды алышат.

¹⁵ Мен сени менен биргемин. Кайда барсаң да, коргоп, кайра ушул жерге алып келем. Сага берген убадамдын баарын аткарамын, сени таштап кетпеймин».

¹⁶ Жакып ойгонду да: «Чын эле Жараткан Эге ушул жерде экен. Мен муну билбептирмин!» – деди.

¹⁷ Анан коркуп кетип, мындай деди: «Бул жүрөк үшүн алган жер экен! Бул Кудайдын турагы, бул асман дарбазасы турбайбы!» – деди.

¹⁸ Жакып таң эртелеп турду да, башына жаздаган ташты алып, эстелик кылып орнотуп, үстүнө Кудайга атап зайтун майын куйду.

¹⁹ Анан ал жерди Бейтел деп атады. Мурда ал шаардын аты Луз болчу.

²⁰ Анан Жакып мындай деп ант берди: «Эгер Кудай мени колдосо, бара турган ушу жолумда мени коргосо, жээрге нан, киерге кийим берсе,

²¹ атамдын үйүнө аман-эсен алып келсе, анда Жараткан Эге Кудайым болот.

²² Мен эстелик кылып орноткон мына бул таш Кудайдын үйү болот. Мага бере турганыңдын баарынан Сага ондон бирин бөлүп берем».