Башталыш 26 - Инжил ЛС (2005)

Ыскактын Герардан көчүшү

¹ Ошол жерде Ыбрайымдын тушундагыдай эле катуу ачарчылык болду. Ыскак Герардагы пелишти падышасы Абымелекке жөнөдү.

² Жараткан Эге Ыскакка көрүнүп, мындай деди: – Мисирге барба, Мен айта турган жерден байыр ал.

³ Ошол жерде келгин болуп жаша. Мен сени менен бирге болуп, сага батамды берем. Мына ушул жердин баарын сага жана сенин тукумуңа берем. Атаң Ыбрайымга берген антымды аткарам.

⁴ Тукумуңду асмандагы жылдыздай көбөйтүп, ушул жердин баарын аларга берем. Сенин тукумуң аркылуу жер бетиндеги бардык элдерге менин батам тиет.

⁵ Ыбрайым тилимди угуп, буйругумду, осуяттарымды, көрсөтмөлөрүмдү жана мыйзамдарымды сактагандыгы үчүн Мен сага батамды берем.

⁶ Ошентип, Ыскак Герар шаарында калып калды.

⁷ Жергиликтүү эл андан аялы тууралуу сураганда, «бул менин карындашым» деп айтты. Себеби «Рабига сулуу, ошол үчүн бул жерликтер мени ал үчүн өлтүрүп койбосун» деп ойлоп, аны аялым деп айтуудан коркту.

⁸ Ыскактын ал жерде жашаганына бир топ убакыт болуп калганда, пелишти падышасы Абымелек терезесинен анын Рабиганы эркелетип жатканын көрүп калды.

⁹ Анан Ыскакты чакырып алып: – Ал сенин аялың тура! Анда эмне үчүн карындашым дедиң? – деди. – Аялым десем өлтүрүп коюшабы деп корктум, – деп жооп берди Ыскак.

¹⁰ Ошондо Абымелек: – Бул эмне кылганың? Эл ичинен бирөө аялыңа жакындап койсо эмне болмок? Бизди күнөөгө батырмаксың! – деди.

¹¹ Абымелек ушундай деди да: «Кимде-ким бул киши менен анын аялына тийсе, өлүм жазасына тартылат!» деп бүт элге жарыя кылды.

¹² Ыскак ошол жерге үрөн сээп, ошол жылы 100 эсе көп түшүм жыйнап алды. Анткени ага Жараткан Эгенин батасы тийген эле.

¹³ Ал байып кетти, байлыгы абдан көбөйүп, мартабалуу адам болду.

¹⁴ Анын кой-эчкиси, кара малы жана кулдары көп эле. Ошондуктан пелиштилердин ичи тарый баштады.

¹⁵ Атасы Ыбрайым көзү тирүүсүндө кулдарына каздырган кудуктардын баарын пелиштилер топурак менен толтуруп салышты.

¹⁶ Анан Абымелек Ыскакка: «Биз жактан көчүп кет, сен бизден алдаганча күчтөнүп алдың», – деди.

¹⁷ Ыскак ал жерден кетти да, Герар өрөөнүнө барып, чатырларын тигип, ошол жерди конуш кылды.

¹⁸ Анан Ыбрайымдын убагында казылып, анын көзү өткөн соң пелиштилер көөмп салган кудуктарды кайра каздырып, аларга атасы койгон аттарды койду.

¹⁹ Күндөрдүн биринде Ыскактын кулдары өрөөндөн кудук казып жатып, булак табышты.

²⁰ Ошондо Герардын койчулары Ыскактын койчуларына келип: «Суу биздики», – деп талашты. Алар кудук талашканы үчүн, Ыскак аны Эсек деп атап койду.

²¹ Алар дагы бир кудук казышканда, кайрадан талаш чыгып, Ыскак аны Ситна деп атады.

²² Ыскак ал жактан көчүп кетип, дагы башка кудук каздырды. Бул кудук үчүн талаш чыкпагандыктан, Ыскак «Жараткан Эге бизге кенен жер берди, эми ушул жерде өсүп-өнүгөбүз» – деп, ага Рехобот деген ат койду.

²³ Анан Ыскак ал жактан Бээр-Шевага көчүп келди.

²⁴ Ошол түнү Жараткан Эге ага көрүнүп, мындай деди: – Мен сенин атаң Ыбрайымдын Кудайымын. Коркпо, Мен сени мененмин. Кулум Ыбрайымдын урматы үчүн, сага батамды берип, тукумуңду көбөйтөм.

²⁵ Ыскак ошол жерге курмандык жай куруп, Жараткан Эгеге ийбадат кылды. Анан ошол жерге чатырын тигип, кулдары дагы кудук казышты.

Ыскак менен Абымелектин ортосундагы келишим

²⁶ Абымелек кеңешчиси Ахузат жана аскер башчысы Пихол менен Герардан Ыскакка келди.

²⁷ Ыскак аларга: – Эмнеге мага келдиңер? Мени жек көрүп, кууп жибербедиңер беле! – деди.

²⁸ – Биз Жараткан Эгенин сени колдоорун анык көрдүк, андыктан биз сени менен ант беришип, келишим түзмөкчү болдук, – дешти алар.

²⁹ – Биз сага тийбей, кайра жакшылык гана кылып, эсен-соо коё бергендей эле, сен да бизге эч жамандык жасаба. Сен эми Жараткан Эге жалгаган кишисиң.

³⁰ Ыскак той кылып, алар жеп-ичишти.

³¹ Эртеси таң эрте туруп, алар бири-бирине ант беришти. Анан Ыскак аларды узатып, жылуу-жумшак жөнөтүп жиберди.

³² Ошол күнү Ыскактын кулдары келип, кудук казып, суу тапкандыгы тууралуу айтышты. Алар «биз суу таптык» дешип, ага өздөрү казган кудук тууралуу айтышты.

³³ Ыскак кудукту Шеба деп атады. Ошондуктан ал шаардын аты ушу күнгө чейин Бээр-Шева деп аталат.

Эсаптын чет өлкөлүк аялдары

³⁴ Эсап кырк жашка чыкканда, хет Бээринин кызы Жахудитти жана хет Элондун кызы Басматты аялдыкка алды.

³⁵ Ошол келиндери Ыскак менен Рабигага көп убайым тарттырды.