Башталыш 25 - Инжил ЛС (2005)

Ыбрайымдын соңку жылдары

¹ Ыбрайым дагы аял алды. Ал аялдын аты Кетура эле.

² Ыбрайым андан Зимран, Иокшан, Медан, Мидиян, Ишбак жана Шуах аттуу уулдарды көрдү.

³ Иокшандан Шеба менен Дедан туулду. Дедандан ашур, летуш жана леум элдери чыккан.

⁴ Мидияндан Эфа, Эфер, Ханох, Абида жана Элдаа деген уулдар туулду. Ушулардын баары – Кетуранын уулдары.

⁵ Ыбрайым колундагы мал-мүлкүнүн баарын Ыскакка берди.

⁶ Ал эми токолдорунан көргөн уулдарына энчи берип, көзүнүн тирүүсүндө эле уулу Ыскактан оолак, чыгыш тарапка көчүрдү.

⁷ Ыбрайым 175 жыл жашады.

⁸ Ал карылык дооронун сүрүп, узак жашады, өмүргө карк болуп, дүйнө салды да, ата-бабаларына кошулду.

⁹ Уулдары Ыскак менен Ысмайыл анын сөөгүн Мамреге жакын жердеги, хет Зохардын уулу Эфрондун талаасындагы Махпела үңкүрүнө коюшту.

¹⁰ Ыбрайым бул талааны хеттерден сатып алган. Ал ошол жерге, аялы Сарыйдын жанына коюлду.

¹¹ Ыбрайым көз жумган соң, Кудай анын уулу Ыскакка берекесин берди. Ыскак Лахай-Рои булагынын жанында жашачу.

Ысмайылдын урпактары

¹² Бул Сарыйдын мисирлик күңү Ажардын Ыбрайымга төрөп берген уулу Ысмайылдын санжырасы.

¹³ Ысмайыл уулдарынын аттары улуулата айтканда мындай: тун уулу Наваёт, анан Кедар, Адбиел, Мипсам,

¹⁴ Мишма, Дума, Масса,

¹⁵ Хадат, Тема, Жетур, Напиш жана Кедма.

¹⁶ Ысмайылдын бул он эки уулу уруу башчылары болгон. Ушул уруулар чатыр тигип жашаган жерлер алардын ысымы менен аталып калган.

¹⁷ Ысмайыл 137 жашында дүйнөдөн өтүп, ата-бабаларына кошулду.

¹⁸ Ысмайылдын урпактары Хавиланын жана Мисирдин чыгышындагы Шурдун ортосундагы аралыкта, Ашурга барчу жолдо башка туугандарынан алыс жашашты.

Эсап менен Жакыптын төрөлүшү

¹⁹ Ыбрайымдын уулу Ыскактын санжырасы мындай: Ыскактын атасы Ыбрайым.

²⁰ Ыскак Паддан-Арамда жашаган арамилик Бетуелдин кызы, Лабандын карындашы Рабигага үйлөнгөндө кырк жашта эле.

²¹ Рабиганын согончогу канабагандыктан Ыскак Жараткан Эгеге сыйынды. Жараткан Эге анын сыйынуусун угуп, аялы Рабиганын боюна бүттү.

²² Анын курсагындагы балдар бири-бири менен тебише баштады. Ошондо Рабига «эмнеге башыма мындай иш түштү» деп, Жараткан Эгеден сурады.

²³ Жараткан Эге ага мындай деди: «Сенин ичиңде эки эл жатат, Сенден эки башка эл чыгат. Биринен бири ашып өтүп, Улуусу кичүүсүнө кул болот».

²⁴ Рабиганын көз жарар маалы келгенде, курсагында эгиз балдар бар экени билинди.

²⁵ Биринчиси эти кыпкызыл болуп, денеси теридей түктүү эле. Ошондуктан анын атын Эсап коюшту.

²⁶ Анан Эсаптын согончогун кармап, иниси чыкты. Аны Жакып деп аташты. Алар туулганда, Ыскак алтымыш жашта эле.

Эсаптын тунгучтук укугун сатышы

²⁷ Балдар эр жетти. Эсап талаа-түздү сүйгөн кыйын аңчы, Жакып болсо чатырдан чыкпаган момун адам болду.

²⁸ Аңдын эти жаккандыктан, Ыскак Эсапты жакшы көрчү. Ал эми Рабига Жакыпты жакшы көрөр эле.

²⁹ Бир күнү Жакып тамак бышырып жатканда, Эсап талаадан ачка келди.

³⁰ Ал Жакыпка: – Мага кызылдан, мына бул кызылдан берчи, шайым кетти, – деди. Ушул үчүн Эсап Эдом деп да аталып кеткен.

³¹ Жакып: – Алгач тун уулдук укугуңду мага сат! – деди.

³² – Өлгөнү турганда тунгучтуктун мага эмне кереги бар? – деди Эсап.

³³ – Алгач мага ант бер, – деди Жакып. Эсап ант берип, тунгучтугун Жакыпка сатты.

³⁴ Ошондо Жакып ага нан менен жасмык сорпо берди. Эсап болсо тамагын ичти да, басып кетти. Ушинтип, Эсап тунгучтугун барктаган жок.