Башталыш 23 - Инжил ЛС (2005)

Сарыйдын дүйнөдөн өтүшү

¹ Сарый 127 жашка чыгып,

² Канаан жериндеги Кирият-Арбада, азыркы Хеврон шаарында көз жумду. Ыбрайым Сарыйды жоктоп ыйлап, аза күттү.

³ Анан аялынын жасатын калтырып, хеттерге барды да:

⁴ – Мен силердин араңарда жашаган келгин адаммын. Маркумумдун сөөгүн көмүү үчүн мага жериңерден менчикке жай бергиле, – деди.

⁵ Хеттер Ыбрайымга мындай жооп беришти:

⁶ – Мырзабыз, бизди уксаңыз, биз сизди Кудайдын төрөсүндөй көрөбүз. Маркум аялыңызды эң жакшы көрүстөнүбүзгө коюңуз. Маркумуңузду койгонго эч ким сизден көрүстөн аябайт.

⁷ Ошондо Ыбрайым ошол жердин калкы болгон хеттерге таазим кылып,

⁸ мындай деди: – Эгер маркумумду жерге берүүгө макул болсоңуздар, анда кебиме кулак салып, Зохардын уулу Эфронго менин өтүнүчүмдү айтыңыздар.

⁹ Ал талаасынын четиндеги Махпела үңкүрүн мага сатсын. Силердин көзүңөрчө үңкүрдүн толук наркын төлөп, аны сагана кылам.

¹⁰ Хет Эфрон болсо өз элинин арасында олтурган. Ал шаар дарбазасынын алдына жыйналган жамы хеттерге угуза Ыбрайымга мындай деди:

¹¹ – Жок, мырзам, мени уксаңыз. Мен сизге талааны да, талаадагы үңкүрдү да берем. Өз элимдин алдында аны сизге берем, маркум аялыңызды коё бериңиз.

¹² Ошондо Ыбрайым хеттердин алдында ийиле таазим кылып,

¹³ алардын баарына угуза Эфронго мындай деди: – Мага кулак салсаңыз. Мен талаанын акысын төлөймүн, аны алыңыз. Анан маркум аялымды ошол жерге коёюн.

¹⁴ Эфрон Ыбрайымга:

¹⁵ – Мырзам, уксаңыз, жердин баасы 400 күмүш шекел. Бул экөөбүз үчүн эмне болуп кетиптир? Маркумуңузду коё бериңиз, – деди.

¹⁶ Ыбрайым ыраазы болуп, Эфрондун Хет уулдарына угуза айткан 400 күмүш шекелди соодагерлер колдонгон ченем менен таразага тартып берди.

¹⁷ Ошентип, Мамренин жанындагы Махпелада жайгашкан Эфрондун талаасы, андагы үңкүр, тегерек-четтеги бүт дарактары менен кошо

¹⁸ Ыбрайымдын менчигине өттү. Буга шаар дарбазасынын алдына жыйналган хеттер күбө болду.

¹⁹ Анан Ыбрайым аялы Сарыйды Канаан жериндеги Мамреге, азыр Хеврон аталган Махпела талаасындагы үңкүргө койду.

²⁰ Ошентип, хеттерге тиешелүү талаа үңкүрү менен кошо Ыбрайымдын карамагындагы сагана болуп калды.