Башталыш 22 - Инжил ЛС (2005)

Ыбрайымдын ишениминин сыналышы

¹ Бир канча убакыттан кийин Кудай Ыбрайымды сынады. – Ыбрайым! – деди Ал. – Угуп жатам! – деп жооп берди Ыбрайым.

² Кудай: – Жакшы көргөн жалгыз уулуң Ыскакты алып, Мория жерине бар. Ошол жерде, Мен сага айта турган тоолордун биринде аны бүт өрттөлчү курмандыкка чал, – деди.

³ Ыбрайым саарда туруп, эшегин токуду. Жанына эки кол баласын жана уулу Ыскакты алды. Курмандык үчүн отун жарды да, Кудай айткан жерге бет алды.

⁴ Үчүнчү күн дегенде, Ыбрайым көз чаптырып, айтылган жерди алыстан көрдү.

⁵ Ошондо эки кол баласына: – Силер ушул жерде эшектин жанында калгыла. Уулум экөөбүз тетиги жерге барып, Кудайга ийбадат кылып, кайра келебиз, – деди.

⁶ Ыбрайым Ыскактын жонуна курмандыкка даярдалган отунду артып, өзү колуна оттук менен бычакты алды да, экөө бирге жөнөдү.

⁷ Анан Ыскак: – Ата! – деп үн катты. – Ии, балам, – деди Ыбрайым. – Оттук менен отун бар, курмандыкка чала турган козу кана? – деди Ыскак.

⁸ – Курмандыкка чалчу козуну Кудай Өзү караштырат, уулум, – деди Ыбрайым. Ошентип, экөө андан ары чогуу жолун улашты.

⁹ Алар Кудай айткан жерге келишкенде, Ыбрайым курмандык жай куруп, үстүнө отунду койду. Анан баласын байлап, курмандык жайга коюлган отундун үстүнө жаткырды.

¹⁰ Ыбрайым уулун мууздамакчы болуп, бычагын алганда,

¹¹ – Ыбрайым, Ыбрайым! – деди Жараткан Эгенин периштеси асмандан. – Угуп жатам, – деп жооп берди Ыбрайым.

¹² – Балага тийбе, ага эч нерсе кылба! – деди периште. – Сенин Кудайдан коркоруңду билдим. Себеби сен Менден жалгыз уулуңду да аябадың.

¹³ Ыбрайым башын көтөрүп, бадалга мүйүзүнөн чаташып калган бир кочкорду көрдү. Барып, аны уулунун ордуна бүт өрттөлчү курмандыкка чалды.

¹⁴ Анан ошол жерди «Жараткан Эге караштырат» деп атады. Ошол себептен азыр да «Жараткан Эгенин тоосунда караштырылат» деп айтылат.

¹⁵ Жараткан Эгенин периштеси көктөн Ыбрайымга экинчи ирет үн катты:

¹⁶ «Мен сага Өз атым менен ант берем», – дейт Жараткан Эге. – «Бул ишти жасап, жалгыз уулуңду да аябадың,

¹⁷ ошондуктан Мен сени жалгагандан жалгаймын. Тукумуңду асмандагы жылдыздай, деңиз жээгиндеги кум сыяктуу көбөйткөндөн көбөйтөмүн. Тукумуң душмандарынын шаарларын ээлейт.

¹⁸ Мени укканың үчүн, сенин тукумуң аркылуу жер жүзүндөгү бардык элдер батамды алышат».

¹⁹ Ошондон кийин Ыбрайым кол балдарына кайтып келди. Алар чогуу Бээр-Шевага кетишти. Ыбрайым анан ошол жерде жашап калды.

²⁰ Бир нече убакыт өткөндөн кийин Ыбрайымга: «Иниң Нахорго аялы Милка бир нече уул төрөп берди», – деген кабар келди.

²¹ Тун уулунун ысмы Уз, кийинкисинин аты Буз, андан кийинкисиники Кемуел. Кемуел Араминин атасы.

²² Анан Кесед, Хазо, Пилдаш, Идлаф жана Бетуел эле.

²³ Бетуелден Рабига төрөлгөн. Ушул сегизин Милка Ыбрайымдын иниси Нахорго төрөп берди.

²⁴ Ал эми токолу Ревумадан Тебах, Гахам, Тахаш жана Мааха деген уулдар төрөлдү.