Башталыш 19 - Инжил ЛС (2005)

Содомдун күнөөсү

¹ Кеч киргенде, эки периште Содомго келди. Лот шаар дарбазасынын жанында олтурган эле. Лот аларды көрүп, алдынан тосо чыгып, чөгөлөп, чекеси жерге тийгенче таазим этти.

² – Мырзалар, – деди ал, – кулуңуздардын үйүнө кириңиздер. Бутуңуздарды жууп, биздикине конуп кетиңиздер. Эртең эртелеп жолго чыксаңыздар болот. Алар: – Жок, рахмат, биз шаар аянтына түнөйбүз, – дешти.

³ Бирок Лот жедеп кыстай бергенде, алар көнүп, Лоттукуна келишти. Лот тамак жасатып, калама жаптырды. Алар тамактанышты.

⁴ Коноктор али жата электе, Содом шаарынын бүт тарабынан бардык эркектер, жаш-кары дебей келип, Лоттун үйүн тегеректеп алышты.

⁵ Алар Лотту чакырып: – Сага бул түнү келген кишилер кана? Аларды бизге чыгарып бер. Алар менен жатабыз, – дешти.

⁶ Лот сыртка чыгып, аркасынан эшигин жапты да:

⁷ – Туугандарым, мындай жаман иш кылбагыла!

⁸ Менин эркек көрө элек эки кызым бар. Ошолорду чыгарып берейин, аларга билгениңерди кылгыла. Бул кишилерге тие көрбөгүлө, алар үйүмөн баш паана тапкан конокторум, – деди.

⁹ Бирок тигилер: – Эй, тур биякка! Сен, тентимиш, бизге акыл үйрөткүң барбы? Эми сени тигилерден жаман кылабыз! – деп, Лотту катуу түртүп келишип, эшикти сындырмак болушту.

¹⁰ Ошондо ичкеридеги кишилер колдорун чыгарып, Лотту үйгө киргизип, эшикти жаап алышты.

¹¹ Ал эми эшик алдына чогулган улуу-кичүү кишилердин көзүн көрбөгөндөй кылып салышты. Ошондо алар эшикти таппай карайлашты.

Лоттун үй-бүлөсүндөгү тил албастык

¹² Андан соң жанагы кишилер Лотко: – Бул жерде дагы кимиң бар? Күйөө балаң болобу, балдарыңбы, кыздарыңбы, кимиң болбосун, баарын бул жерден алып чык,

¹³ анткени биз бул жерди жок кылабыз. Бул жердеги элдин зулумдугунун айынан боздогон үндөр Жараткан Эгеге жетти. Ал бизди бул жерди жок кылуу үчүн жиберди, – деди.

¹⁴ Ошондо Лот болочок күйөө балдарына барып: – Тезирээк бул жерден чыгып кеткиле! Жараткан Эге бул шаарды жок кылат, – деди. Бирок Лоттун сөзү аларга тамашадай туюлду.

¹⁵ Таң агарганда, периштелер Лотту шаштыра башташты. – Бол! – дешти алар, – Аялың менен эки кызыңды ал да, тез бул жерден кет! Болбосо, шаарды жазалаганда, сен да кошо жок болосуң!

¹⁶ Лот кыбылжып турганда, жанагы кишилер аны, аялын жана эки кызын колдорунан алып, шаардан жетелеп чыгышты. Себеби Жараткан Эге аларга ырайым кылды.

¹⁷ Аларды сыртка чыгарган соң, тигилердин бири: – Жаныңды куткар! Артыңды караба! Бул өрөөндүн эч бир жерине токтобо! Адырды көздөй кач, болбосо өлөсүң! – деди.

¹⁸ Бирок Лот: – Жок, мырзаларым, – деп өтүндү. –

¹⁹ Мына, кулуңуздарга ырайым кылып, жанымды куткарып, чоң жакшылык жасадыңыздар. Бирок мен тоого жете албайм, артыман апат басып, өлүп калам.

²⁰ Тигине, тээтиги шаарча жакын экен, ошол жакка качып барайын. Ал кичине да экен, ошол жерден жанымды сактап калам.

²¹ Ошондо алардын бири: – Макул, мунуңду да аткарайын. Сен айткан шаарды кыйратпайм.

²² Тезирээк, ошол жакка кач! Сен ошол жерге жеткиче мен эч нерсе кыла албайм, – деди. Ошондуктан бул шаар Соор аталып калган.

²³ Лот Соорго жеткенде, күн көтөрүлүп калган эле.

²⁴ Анан Жараткан Эге Содом менен Гоморрага көктөн жалындаган күкүрт жаадырып,

²⁵ ошол шаарларды, бүт өрөөндү мүлдө эли, өсүмдүк-чөбү менен кошо жок кылды.

²⁶ Лоттун аялы болсо бурулуп артын карары менен туз мамыга айланып калды.

²⁷ Ыбрайым таң эртелеп, мурун Жараткан Эгенин алдында турган жерге келди.

²⁸ Төмөн жактагы Содом менен Гоморраны жана бүтүндөй өрөөндү карап, темир эриткен мештен чыккандай уюлгуган түтүндү көрдү.

²⁹ Кудай өрөөндөгү шаарларды кыйраткан кезде, Ыбрайымдын суранычын эске алды. Лот жашаган шаарларды тыптыйпыл кылганда, аны ошол апаттан аман алып чыкты.

Мааптар менен аммондордун келип чыгышы

³⁰ Лот Соордо тургандан коркуп, эки кызы менен тоого барып, үңкүрдө жашап калды.

³¹ Бир күнү улуу кызы кичүүсүнө мындай деди: – Атабыз карып калды. Бизге эр болгудай бул жерде бир да эркек жок.

³² Кел, атабызды шарапка мас кылып, аны менен жаталы да, андан тукум улайлы.

³³ Ошол түнү алар атасына шарап берип мас кылышты. Анан улуусу атасы менен жатып чыкты. Атасы кызынын качан жатып, качан туруп кеткенин билген жок.

³⁴ Кийинки күнү улуусу кичүүсүнө айтты: – Өткөн түнү мен атам менен жатып чыктым. Бул түнү да ага шарап ичирип, мас кылалы, анан сен жатып чык, ошентип атабыздан тукум улайлы.

³⁵ Ошол түнү да алар атасын мас кылышты. Анан кичүүсү атасы менен жатып чыкты. Атасы анын качан жатып, качан туруп кеткенин билген жок.

³⁶ Ушундайча Лоттун кыздары атасынан кош бойлуу болушту.

³⁷ Улуусу уул төрөп, атын Маап койду. Ал бүгүнкү маап элинин түпкү атасы.

³⁸ Кичүүсү да уул төрөп, атын Бенамми койду. Ал бүгүнкү аммон элинин түпкү атасы.