Башталыш 18 - Инжил ЛС (2005)

Кудайы коноктор

¹ Күндүзгү аптап убагы эле. Ыбрайым Мамредеги эмен дарактарынын жанында чатырынын улагасында олтурган. Ошол жерден ага Жараткан Эге көрүндү.

² Ыбрайым башын көтөрүп, маңдайында турган үч кишини көрдү. Көрөрү менен аларды тосуп алууга ашыгып, чатырдан чуркап чыкты да, чөгөлөп, таазим этип:

³ – Эгедерим, эгер ырайым этсеңиз, кулуңуздун жанынан кыя өтпөңүз.

⁴ Бутуңуздарды жууганга бир аз суу алдырайын. Мына бул бактын саясында эс алыңыздар.

⁵ Мендей кулуңуздардын жанынан өтүп баратасыздар. Жегенге нан алып келейин. Кубаттанып алып, анан жолго чыгыңыздар, – деди. – Жакшы, – дешти алар, – айтканыңдай кыла бер.

⁶ Ыбрайым шашкан бойдон чатырына барып, Сарыйга: – Бол тезирээк, ундун эң жакшысынан үч табак камыр жууруй сал да, калама жаба кал! – деди.

⁷ Анан бадага жүгүрүп барып, семиз торпокту тандап туруп, кызматчысына берди. Кызматчысы аны сойгонго киришти.

⁸ Ыбрайым эжигей менен сүтүн, бышырылган торпоктун этин алып келип, коноктордун алдына койду. Коноктор даам сызып жатышканда, Ыбрайым алардын маңдайындагы бактын түбүндө турду.

⁹ – Аялың Сарый кайда? – дешти алар. – Ушул жерде, чатырда, – деп жооп берди Ыбрайым.

¹⁰ Ошондо алардын бири: – Эмки жылы ушул убакытта Мен сеникине сөзсүз кайра келем. Ошондо аялың Сарый уулдуу болот, – деди. Сарый болсо чатырдын оозунда, Ыбрайымдын артында бул сөздөрдү угуп турган.

¹¹ Ыбрайым да, Сарый да абдан картайып, Сарый бала төрөр жаштан өтүп калган эле.

¹² Ошол үчүн Сарый ичинен күлүп: «Каржайып калган кезимде мындай ыракат мага кайдан? Анын үстүнө байым да картайган», – деп ойлоду.

¹³ Ошондо Жараткан Эге Ыбрайымга: – Эмне үчүн Сарый күлдү? Эмнеге «карыганымда төрөй аламбы» деди?

¹⁴ Жараткан Эге үчүн кыйын нерсе барбы? Мен эмдиги жылы, белгилеген убакытта келем, ошондо Сарыйдын уулу болот, – деди.

¹⁵ Сарый коркконунан «күлгөн жокмун» деп, мойнуна албады. Бирок Ал «жок, күлдүң» деди.

Ыбрайымдын Содом үчүн суранышы

¹⁶ Коноктор ордуларынан туруп, Содомду карай жөнөштү. Ыбрайым болсо аларды узатканы чогуу чыкты.

¹⁷ – Мен жасайын деген ишимди Ыбрайымдан жашырамбы? – деди Жараткан Эге.

¹⁸ – Андан улуу жана күчтүү эл жаралып, жер бетиндеги бардык элдер ал аркылуу баталуу болушары анык.

¹⁹ Анткени Мен аны өзүнүн балдарына жана урпактарына Менин жолумдан чыкпоону, адил жана калыс жашоону осуяттасын деп тандап алдым. Ошондо айткандарымдын баарын аткарам.

²⁰ Анан Жараткан Эге Ыбрайымга кайрылып: – Содом менен Гоморанын зулумдугунун айынан боздогон үндөрдү уктум. Алардын күнөөлөрү абдан оор.

²¹ Эми төмөн түшүп, көрөйүнчү, алардын баары күнөөгө ушунча батып кеткен-кетпегенин билейин, – деди.

²² Анан экөө андан ары Содомго бет алышты. Ыбрайым болсо дагы эле Жараткан Эгенин алдында турду.

²³ Ошондо Ыбрайым Ага жакыныраак келип, мындай деди: – Сен адил адамды күнөөкөр менен бирге өлтүрөсүңбү?

²⁴ Мүмкүн, бул калаада ак жашаган элүү адам бар чыгар? Ошол жерди ак жашаган элүү киши үчүн да кечирбей, кыйратасыңбы?

²⁵ Андай кыла көрбө! Адил адамды зулум адам менен чогуу жок кыласыңбы?! Сен адил кишини да, зулум кишини да бирдей өлтүрбөйсүң! Сен андай кылбайсың да! Бүт ааламдын Соту адилетсиз өкүм чыгарабы?

²⁶ Ошондо Жараткан Эге мындай деди: – Эгер Мен Содомдон элүү адилди тапсам, анда ошолор үчүн бул жердин баарына ырайым кылам.

²⁷ Ыбрайым: – Мына, мен топурак менен күл сыяктуу пенде болсом да, Эгедериме сүйлөөгө батындым:

²⁸ эгер элүү адил адамга бешөө жетпесечи? Ошол беш киши үчүн шаарды бүтүн кыйратасыңбы? – деди. Жараткан Эге: – Эгер кырк беш адилди тапсам, шаарды кыйратпайм, – деди.

²⁹ Ыбрайым сөзүн улантып, дагы мындай деди: – Кырк эле адил чыксачы? Ал: – Кырк адил үчүн да кыйратпайм, – деди.

³⁰ Ыбрайым: – Эгедерим айтчу сөзүмө ачууланбаса экен. Ал шаарда отуз эле адил бар болсочу? – деди. Ал: – Отузду тапсам да, шаарды кыйратпайм, – деди.

³¹ Ыбрайым: – Оо, Эгедерим, мына, мен Сага ооз ачууга батындым: эгер ал жерде жыйырма эле адил болсочу? – деди. Ал: – Жыйырманы тапсам да, кыйратпайм, – деди.

³² Ыбрайым: – Оо, Эгедерим, мен дагы бир мертебе сүйлөсөм, ачууланба: ал жерде он адил адам табылсачы? – деди. Ал: – Он адил үчүн да кыйратпайм, – деди.

³³ Жараткан Эге Ыбрайым менен сүйлөшүп бүткөн соң, ал жерден кетти. Ыбрайым болсо үйүнө кайтты.