Башталыш 17 - Инжил ЛС (2005)

Кудайдын убадасы

¹ Ыбрам токсон тогуз жашка чыкканда, Жараткан Эге ага көрүнүп: – Мен кудурети күчтүү Кудаймын. Менин жолум менен жүр, ак жаша.

² Мен сени менен келишим түзөм, урпактарыңды сансыз көп кылам, – деди.

³ Ыбрам чөгөлөп, чекесин жерге тийгизе таазим кылды. Ошондо Кудай ага мындай деди:

⁴ – Мына, Менин сени менен түзгөн келишимим бул: сен көп элдердин атасы болосуң.

⁵ Эми сенин ысмың Ыбрам эмес, Ыбрайым болот, анткени Мен сени көп элдердин бабасы кылдым.

⁶ Мен сенин урпагыңды сансыз көбөйтүп, сенден элдерди жаратам. Сенин урпагыңдан падышалар чыгат.

⁷ Мен сени менен жана сенден кийинки урпагың менен – келечек муундар менен түбөлүк келишим түзөм: Мен сенин жана сенден кийинки урпагыңдын Кудайы болом.

⁸ Азыр өзүң келгин болуп жашап жаткан жерди – бүткүл Канаан жерин сага жана сенин урпактарыңа түбөлүккө энчи кылып берем жана Мен алардын Кудайы болом.

Сүннөт – келишимдин белгиси

⁹ Кудай Ыбрайымга дагы мындай деди: – Сен өзүң да, келечектеги тукумдарың да ушул келишимди сакташыңар керек.

¹⁰ Менин сени менен жана сенден кийинки урпактарың менен түзүп, сен аткара турган келишимим мындай: араңардагы эркек аттуунун баары сүннөткө отургузулсун.

¹¹ Сүннөткө отургула, бул – Менин силер менен түзгөн келишимдин белгиси.

¹² Жаңы төрөлгөн ар бир эркек бала сегизинчи күнү сүннөттөлсүн. Бул муундан муунга сакталсын. Үйүңдө төрөлгөнү да, сенин тукумуңдан эмес, бирок жат элдиктен күмүшкө сатып алынганы да –

¹³ тигиниси да, мунусу да сүннөткө отургузулушу шарт. Денеңердеги бул эн белги Менин түбөлүктүү келишимимдин белгиси болот.

¹⁴ Сүннөтү кесилбеген ар бир эркек өз элинин арасынан жок кылынсын, анткени ал Менин келишимимди бузду.

Кудай убадасын аткарат

¹⁵ Кудай Ыбрайымга дагы мындай деди: – Мындан ары аялыңды Сара эмес, Сарый деп чакыр.

¹⁶ Мен аны жалгаймын, андан сени уулдуу кылам. Аны жалгаймын, ал элдердин энеси болот. Анын урпагынан падышалар чыгат.

¹⁷ Ыбрайым чөк түшүп, чекеси жерге тийгенче таазим кылып, бирок ичинен: «Жүздөгү киши да балалуу болмок беле? Токсондогу Сарый эми төрөмөк беле?» – деп, күлдү.

¹⁸ Анан Ыбрайым Кудайга: – Ысмайылым эле аман болуп, ага батаң тийсе экен! – деди.

¹⁹ Ошондо Кудай мындай деди: – Аялың Сарый сага уул төрөп берет. Анын ысмын Ыскак деп коёсуң. Мен Өз келишимимди аны менен, анын урпактары менен түбөлүктүү келишим кылып түзөм.

²⁰ Ысмайыл тууралуу суранычыңды да уктум. Ага да батамды берем, өркөнүн өстүрөм, укум-тукумун көбөйтөм. Андан он эки бек чыгат. Мен андан улуу эл жаратам.

²¹ Бирок Мен келишимимди эмки жылы ушул маалда Сарыйдан төрөлө турган Ыскак менен түзөмүн.

²² Кудай Ыбрайым менен сүйлөшүп бүтүп, жогору көтөрүлүп кетти.

²³ Ыбрайым, Кудай айткандай, ошол күнү уулу Ысмайылды, үйүндө туулгандарды жана күмүшкө сатылып алынгандарды – үйүндөгү эркек аттуунун баарын сүннөткө отургузду.

²⁴ Сүннөттөлгөндө Ыбрайым токсон тогуз жашта,

²⁵ уулу Ысмайыл он үчтө эле.

²⁶ Ошол эле күнү Ыбрайым жана анын уулу Ысмайыл сүннөткө отургузулду.

²⁷ Алар менен чогуу Ыбрайымдын үйүндөгү эркектин баары, анын үйүндө туулганы да, башка элден күмүшкө сатылып алынганы да сүннөткө отургузулду.