Башталыш 16 - Инжил ЛС (2005)

Ажар жана Ысмайыл

¹ Ыбрамдын аялы Саранын согончогу канаган эмес. Саранын Ажар аттуу мисирлик күңү бар эле.

² Сара Ыбрамга мындай деди: – Жараткан Эге мени төрөбөс кылды. Менин күңүмдүн жанына кириңиз, ал аркылуу перзенттүү болормун. Ыбрам Саранын айтканына көндү.

³ Ошентип, Ыбрамдын Канаан жеринде жашаганына он жыл болгондо, Сара өзүнүн мисирлик күңү Ажарды Ыбрамга аялдыкка алып берди.

⁴ Анан Ыбрам Ажардын жанына кирген соң, анын боюна бүттү. Ажар өзүнүн кош бойлуу экенин билгенде, мырзайымын теңине албай калды.

⁵ Ошондо Сара Ыбрамга: – Ажардан көргөн кордугума сиз айыптуусуз. Мен өз күңүмдү төшөгүңүзгө салдым, эми кош бойлуу экенин билгенден бери ал мени теңине албай калды. Жараткан Эгеге койдум, ортобузга калыс болуп Ал чечсин! – деди.

⁶ – Күңүң сенин колуңда эмеспи, – деди Ыбрам Сарага, – эмне кылам десең, өзүң бил. Сара Ажарды катуу басынта баштагандыктан, Ажар андан качып кетти.

⁷ Жараткан Эгенин периштеси Ажарды чөлдөгү булактын жанынан, Шурга кеткен жолдун боюнан таап:

⁸ – Ажар, Саранын күңү! Кайдан келип, кайда баратасың? – деди. – Мырзайымым Сарадан качып баратам, – деди Ажар.

⁹ – Мырзайымыңа кайтып барып, ага моюн сун, – деди Жараткан Эгенин периштеси,

¹⁰ – мен сенин тукумуңду көбөйтөмүн, көптүгүнөн эч ким санай алгыс кылам.

¹¹ Жараткан Эгенин периштеси дагы мындай деди: – Кош бойлуусуң сен азыр. Маалы жетип, уул төрөп, Ысмайыл деп коёсуң Анын атын, анткени Зар какшаган үнүңдү Жараткан Эге эшитти.

¹² Жапайы эшек сыяктуу Уулуңдун болот мүнөзү. Баары ага каршы болушат, Ал болот каршы баарына. Туугандар менен жоолашып, Өтөт анын өмүрү.

¹³ Ошондо Ажар: «Кудай мени көрүп турганын көрдүм», – деп өзүнө сүйлөгөн Жараткан Эгени «Эл-Ройи» деп атады.

¹⁴ Ошондон улам Кадеш менен Береддин ортосундагы кудукту «Бээр-Лахай-Ройи» дешет.

¹⁵ Ажар Ыбрамга эркек уул төрөп берди. Ыбрам Ажардан көргөн уулуна Ысмайыл деп ат койду.

¹⁶ Ажар Ысмайылды төрөгөндө, Ыбрам сексен алты жашта эле.