Башталыш 15 - Инжил ЛС (2005)

Кудайдын Ыбрам менен келишим түзүшү

¹ Ушул окуядан кийин Жараткан Эге Ыбрамга аян берип: – Коркпогун, Ыбрам, Калканыңмын Мен сенин. Зор болот алар сыйлыгың, – деди.

² Ыбрам болсо мындай деди: – Оо, Жараткан Эге, Эгедерим, менде туяк болбосо, ал эмне деген сыйлык? Менин мал-мүлкүм дамасктык Элиезерге калмак болду.

³ Мына, Сен мага тукум бербедиң, эми үйүмдөгү бир кызматчым мураскорум болот.

⁴ Ошондо Жараткан Эге Ыбрамга мындай деди: – Жок, ал сенин мураскоруң болбойт! Сенин мураскоруң өз каныңдан жаралган балаң болот.

⁵ Анан Ыбрамды сыртка алып чыгып: – Асманды кара! Эгер жылдыздарды санай алсаң, санап көр. Сенин тукумуң да ушундай көп болот, – деди.

⁶ Ыбрам Жараткан Эгеге ишенди, Жараткан Эге ишеними үчүн аны адил деп тапты.

⁷ Анан Жараткан Эге ага: – Мен ушул жерди энчилеп берүү үчүн сени каздилердин Ур шаарынан алып чыккан Жараткан Эгеңмин, – деди.

⁸ Ыбрам: – Жараткан Эге, Эгедерим, бул жердин меники болорун кантип билем? – деп сурады.

⁹ Жараткан Эге: – Мага үч жашар кунаажын, үч жашар эчки, үч жашар кочкор, бир бактек жана бир көгүчкөн алып кел, – деди.

¹⁰ Ыбрам баарын алып келип союп, аларды ортосунан бөлдү да бөлүктөрүн бири-биринин тушуна койду. Ал эми канаттууларды бөлгөн жок.

¹¹ Ошондо жорулар этке жабалактап учуп келди, бирок Ыбрам аларды кубалап турду.

¹² Күн батарда Ыбрамды катуу уйку басып, жүрөк үшүн алган коюу караңгылык каптады.

¹³ Ошондо Жараткан Эге ага мындай деди: – Ушуну биле жүр, сенин тукумуң чет жерде келгин болот. 400 жыл кул болуп, эзүүдө жашайт.

¹⁴ Бирок Мен аларды кул кылган элди жазалайм. Алар ошол жерден көп байлык менен чыгып кетишет.

¹⁵ Сен болсо узак өмүр сүрүп, тынччылык менен ата-бабаларың сыяктуу о дүйнө саласың.

¹⁶ Сенин тукумуңдун төртүнчү мууну гана бул жакка кайтып келет, анткени аморлуктардын күнөөсү жетер чегине жете элек.

¹⁷ Күн батып, караңгы киргенде, тандырдан чыккан сыяктуу түтүн жана жалындаган от пайда болуп, алар бөлүнгөн жаныбарлардын ортосун аралап өттү.

¹⁸ Ошол күнү Жараткан Эге Ыбрам менен келишим түзүп, мындай деди: – Мен сенин тукумуңа Мисир дарыясынан тартып, улуу Эфрат дарыясына чейинки жерди,

¹⁹ кейни, кеназ, кадмон,

²⁰ хет, периз, рафа,

²¹ амор, канаан, гиргаш жана жебус элдеринин жерин беремин.