Башталыш 14 - Инжил ЛС (2005)

Кудай берген тынччылык

¹ Шынар падышасы Амрапел, Эласар падышасы Арийох, Эйламдын падышасы Кадырламар, Гойим падышасы Тидалдын убагында мындай болду:

² алар биригип Содомдун падышасы Берага, Гомор падышасы Биршага, Адма падышасы Шынапка, Сабайым падышасы Шемеберге жана Бела падышасына (Бела азыр Соор деп аталат) согуш ачышты.

³ Соңку бешөө биригип, Сиддим өрөөнүнө (азыркы Өлүк деңизге) чогулушту.

⁴ Алар он эки жыл бою Кедорламердин кол алдында болуп, он үчүнчү жылы козголоң чыгарышкан.

⁵ Он төртүнчү жыл болгондо, Кедорламер менен анын шериктештери аскерлери менен келип, Аштарот-Карнайымда рафаларды, Гамда зуздарды, Шабей-Кириятайымдагы эмдерди

⁶ жана тоолуу Сеирдеги хорилерди чөл четиндеги Эл-Паранга чейин кыйратышкан.

⁷ Андан Эн-Мишпатка (азыркы Кадешке) келишип, амаликтердин бүт жерин басып алып, Хасесон-Тамарда жашаган аморлорду кыйратышкан.

⁸ Содомдун, Гомордун, Адманын, Сабайымдын жана Беланын падышалары Сиддим өрөөнүнө чыгышты.

⁹ Алар Элам падышасы Кадырламар, Гойим падышасы Тидал, Шынар падышасы Амрапел жана Эласар падышасы Арийох менен беттешти. Ошентип беш падыша төрт падыша менен согуша баштады.

¹⁰ Сиддим өрөөнүндө чайырлуу чуңкурлар көп эле. Содом менен Гомордун падышалары качып баратканда, алардын кээ бир адамдары ошол чуңкурларга түшүп кетип, калгандары тоого качты.

¹¹ Жеңген төрт падыша Содом менен Гомордун болгон байлыгы менен азык-түлүгүн олжолоп кетти.

¹² Содомдо жашаган Ыбрамдын иниси Лотту дагы мал-мүлкү менен кошо алып кетишти.

¹³ Ошондо бир киши качып кутулуп, болгон окуяны амор элинен болгон Мамреге караштуу эмен дарактарынын жанында жашаган эврей Ыбрамга жеткирди. Мамре жана анын бир туугандары Эшкол менен Анер Ыбрамдын шериктештери болушкан.

¹⁴ Инисинин туткунга түшкөнүн укканда, Ыбрам өзүнүн согушка жарамдуу адамдарын – 318 кишини алып, төрт падышанын артынан кууп, Данга чейин барды.

¹⁵ Анан ошол жерден адамдарын бир нече топко бөлүп, түндө тигилерге кол салып, талкалады да, Дамасктын түндүгүндө жайгашкан Хобага чейин кубалады.

¹⁶ Олжолонгон мал-мүлктүн баарын кайра кайтарып алды. Ошондой эле иниси Лоттун бүт дүнүйөсүн, аялдарды жана туткунга кеткендерди кайтарып алып келди.

¹⁷ Ыбрам Кедорламерди жана анын шериктештерин жеңип келе жатканда, Содом падышасы тосуп алуу үчүн (кийин Падыша сай аталып калган) Шабе өрөөнүндө анын алдынан чыкты.

¹⁸ Ошондой эле Салимдин падышасы Маликсадык да нан менен шарап көтөрүп, алдынан тосуп чыкты. Ал Кудай Тааланын дин кызматчысы эле.

¹⁹ Маликсадык Ыбрамга: «Асман-жерди жараткан Кудай Таала сени алкасын!

²⁰ Душмандарыңды колуңа салып берген Кудай Таалага алкыш!» – деп батасын берди. Ошондо Ыбрам өзүнө түшкөн олжонун ондон бирин Маликсадыкка берди.

²¹ Содомдун падышасы болсо Ыбрамга: – Адамдарымды кайтарып бериңиз, олжону болсо өзүңүзгө калтырыңыз, – деди.

^22-23 Ыбрам Содом падышасына мындай жооп берди: – Кийин сен «Ыбрамды мен байыткам» деп айтпашың үчүн Жараткан Эгеге, асман-жерди жараткан Кудай Таалага сенин жибиңди да, бут кийимиңдин боосун да албайм деп колумду көтөрүп ант берем.

²⁴ Адамдарым жеп-ичкенден тышкары сенден эч нерсе албаймын. Мени менен бирге урушка барган Анер, Эшкол, Мамре өз үлүштөрүн алсын.