Башталыш 13 - Инжил ЛС (2005)

Ыбрамдын чырды чечиши

¹ Ошентип, Ыбрам аялы жана мал-мүлкү менен Мисирден чыгып, Негев чөлүнө жөнөдү. Лот да алар менен бирге кетти.

² Ыбрам малга, алтын менен күмүшкө бай эле.

^3-4 Ал Негевден Бейтелди көздөй көчүп-конуп жүрүп олтуруп, Бейтел менен Айдын ортосундагы мурда чатырын тигип, курмандык жай курган жерге жетти. Ошол жерден Жараткан Эгеге ийбадат кылды.

⁵ Ыбрам менен бирге көчкөн Лоттун да майда жандыгы, кара малы жана чатырлары бар эле.

⁶ Алардын мал-мүлкү көп болгондуктан, жайыт жетпей, бирге жашоо мүмкүн болбой калды.

⁷ Ошол себептен, Ыбрам менен Лоттун малчыларынын ортосунда чыр чыкты. Анын үстүнө, канаандар менен периздер да ошол жерде жашачу.

⁸ Ыбрам Лотко мындай деди: – Экөөбүз чырдашпайлы, койчуларыбыз да чырдашпасын, анткени биз тууганбыз го.

⁹ Карачы, алдыңда канча жер жатат. Кел, бөлүнөлү: сен солго кетсең, мен оңго кетейин, сен оңго кетсең, мен солго кетейин.

¹⁰ Лот айланасына көз чаптырып, бүт Иордан өрөөнүн – Соорго чейинки суусу мол жерлерди көрдү. Жараткан Эге Содом менен Гоморду кыйратканга чейин бул жерлер бейиш багындай, Мисир жергесиндей эле.

¹¹ Лот бүт Иордан өрөөнүн тандап алып, чыгыш жакка кетти. Ошентип, алар бири-биринен бөлүнүп кетишти.

¹² Ыбрам Канаанда калып, Лот Иордан өрөөнүндөгү шаарлардын арасына жайланышып, чатырын Содом шаарына жакын жерге тикти.

¹³ Содомдуктар Жараткан Эгенин алдында өтө көп күнөө жасаган, абдан бузулган адамдар эле.

¹⁴ Лот бөлүнүп кеткенден кийин Жараткан Эге Ыбрамга мындай деди: – Өзүң турган жерден түндүктү, түштүктү, чыгышты жана батышты кара.

¹⁵ Сен көрүп турган жердин баарын Мен сага жана сенин урпагыңа биротоло энчилеп берем.

¹⁶ Сенин укум-тукумуңду жер бетиндеги кумдай көбөйтөмүн, санаса сан жеткис кылам. Жердеги кумду санай албагандай эле, тукумуңду да санай алышпайт.

¹⁷ Кана, баргын да ушул жерди кыдырып чык, анткени Мен аны сага берем.

¹⁸ Ошентип, Ыбрам көчүп-конуп отуруп Хевронго жакын жердеги Мамредеги эмен дарактарынын жанына жайгашты да, ошол жерге Жараткан Эгеге курмандык жай курду.