Башталыш 12 - Инжил ЛС (2005)

Кудайдын Ыбрамга берген батасы

¹ Жараткан Эге Ыбрамга мындай деди: «Тур да, элиңден, туугандарыңдан жана атаңдын үйүнөн чыгып, Мен сага көрсөтө турган жерге көч!

² Чыгарып сенден улуу эл, Батамды берем сага Мен. Даңаза кылып атыңды, Башкага да төгөмүн, Сен аркылуу батамды.

³ Ким сага бата тилесе, Батамды берем Мен ага, Ким сага айтса каргышты, Каргышым тиет ошого. Дүйнөдөгү элдердин Бардыгы ак батаны Сен аркылуу алышат».

⁴ Жараткан Эге айткандай, Ыбрам жолго чыкты. Лот да аны менен бирге кетти. Харандан чыккан кезде Ыбрам жетимиш беш жашта эле.

⁵ Ошентип Ыбрам аялы Сараны, бир тууганынын уулу Лотту ээрчитип, Харанда жыйган мал-мүлкүнүн баарын жана кишилерин алып, Канаан жерине жол тартып, акыры ал жерге жетти.

⁶ Ыбрам ошол жерди аралап, Шекемдин жанындагы касиеттүү Море дарагына чейин жетти. Ошол кезде ал жерде канаандыктар жашачу.

⁷ Жараткан Эге Ыбрамга көрүнүп: «Ушул жерди мен сенин укум-тукумуңа берем», – деди. Ыбрам өзүнө көрүнгөн Жараткан Эгеге арнап ошол жерге курмандык жай курду.

⁸ Анан Бейтел шаарынын чыгыш жак тарабындагы тоого барып, батыштагы Бейтел шаары менен чыгыштагы Ай шаарынын ортосуна чатырын тикти. Ошол жерге курмандык жай куруп, Жараткан Эгеге ийбадат кылды.

⁹ Анан ал Негевге – түштүктү карай жолун улантты.

Ыбрамдын Мисирге көчүп барышы

¹⁰ Анан Канаанга катуу ачарчылык келди, ал катуулагандыктан Ыбрам убактылуу жашап туруу үчүн Мисирге жол алды.

¹¹ Мисирге жакындап калганда, ал аялы Сарага мындай деди: – Мен сенин ажарлуу аял экениңди билем.

¹² Мисирликтер сени көргөндө «бул анын аялы» деп, мени өлтүрүп, сени тирүү калтырышат.

¹³ Андыктан аларга: «Мен бул кишинин карындашымын», – деп айт. Ошондо сен үчүн мага жакшы мамиле кылышып, мен аман каламын.

¹⁴ Ыбрам Мисирге келгенде, мисирликтер Саранын абдан сулуу экенин көрүштү.

¹⁵ Фараон сарайындагы кызматчылар да көрүп, анын сулуулугун фараонго мактап барышты. Ошондо ал фараондун сарайына алынды.

¹⁶ Фараон Сара үчүн Ыбрамга жакшы мамиле кылды. Ыбрам майда жандык менен кара малга, кул менен күңдөргө жана эшектер менен төөлөргө ээ болду.

¹⁷ Бирок Ыбрамдын аялы Сара үчүн Жараткан Эге фараон менен анын үй ичине катуу мүшкүл салды.

¹⁸ Ошондо фараон Ыбрамды чакыртып алып, ага: – Эмнеге мага мындай кылдың? Эмнеге аны аялым деп айтпадың?

¹⁹ Эмнеге аны карындашым дедиң? Ошол үчүн мен аны аял кылып алмакчы болгом да! Аялыңды ал да кеткин! – деди.

²⁰ Фараон адамдарына Ыбрамды аялы, колундагы мал-мүлкү менен чогуу Мисирден чыгарып салууга буйрук берди.