Башталыш 11 - Инжил ЛС (2005)

Бабыл мунарасы

¹ Ошол кезде жер үстүндө бир тил болуп, адамдардын баары бирдей сөздөрдү колдонушкан.

² Адамдар чыгышты карай көчүп баратып, Шынар жеринен бир түзөң таап, ошол жерге отурукташты.

³ Алар бири-бирине: «Келгиле, кыш куюп, аны отко бышыралы!» – дешти да, таш ордуна кыш, акиташ ордуна чайыр колдонушту.

⁴ Анан «өзүбүзгө төбөсү көк тиреген мунаралуу шаар куруп, атыбызды чыгаралык, ошондо жер жүзүнө тарап кетпейбиз» дешти.

⁵ Жараткан Эге адамдар куруп жаткан шаар менен мунараны көрүү үчүн төмөн түшүп,

⁶ мындай деди: «Мына, алар бир эл болуп, бир тилде сүйлөгөндүктөн ушул ишти баштап жатышат. Эми алар ойлогон оюн ишке ашырмайын токтошпойт.

⁷ Кана, төмөн түшүп, бири-бирин түшүнбөсүн үчүн алардын тилин чаташтырып салалы», – деди.

⁸ Ушундай кылып, Жараткан Эге аларды бүт жер жүзүнө чачыратып жиберип, шаар курулушун токтотту.

⁹ Ошондуктан бул шаар Бабыл деп аталып калды. Себеби Жараткан Эге ошол жерде бардык адамдардын тилин чаташтырып, аларды бүт жер жүзүнө чачыратып жиберген.

Шемден Ыбрайымга чейинки санжыра

¹⁰ Шемдин санжырасы мындай: топон суудан кийин эки жыл өтүп, Шем 100гө чыкканда, Арпакшат аттуу уулдуу болду.

¹¹ Андан кийин Шем дагы 500 жыл жашап, башка да уул-кыздарды көрдү.

¹² Арпакшат отуз бешке келгенде, андан Шелах туулду.

¹³ Шелах туулган соң, Арпакшат 403 жыл өмүр сүрүп, башка да уул-кыздардын атасы болду.

¹⁴ Шелах отузга келгенде, андан Эбер туулду.

¹⁵ Эбер туулгандан кийин, Шелах 403 жыл жашап, башка да уул-кыздарды көрдү.

¹⁶ Эбер отуз төрт жашка келгенде, андан Пелек туулду.

¹⁷ Пелек туулгандан кийин, Эбер 430 жыл жашап, дагы да уул-кыздарды көрдү.

¹⁸ Пелек отуз жашка келгенде, андан Регу туулду.

¹⁹ Регу туулгандан кийин, Пелек 209 жыл жашап, жана да уул-кыздарды көрдү.

²⁰ Регу отуз эки жашка келгенде, андан Серук туулду.

²¹ Серук туулган соң, Регу 207 жыл жашап, башка да уул-кыздарды көрдү.

²² Серук отуз жашка келгенде, уулу Нахор туулду.

²³ Нахор туулган соң, Серук 200 жыл жашап, башка да уул-кыздарды көрдү.

²⁴ Нахор жыйырма тогуз жашка келгенде, андан Терах туулду.

²⁵ Терах туулган соң, Нахор 119 жыл жашап, башка да уул-кыздарды көрдү.

²⁶ Терах жетимиш жашка келип, Ыбрам, Нахор жана Арандын атасы болду.

Терахтын санжырасы

²⁷ Бул Терахтын санжырасы: Терахтан Ыбрам, Нахор, Аран туулду. Арандан Лот туулду.

²⁸ Ал эми Аран өз атасы Терахтын көзү тирүүсүндө казди элинде, өзү туулган Ур шаарында дүйнөдөн кайтты.

²⁹ Ыбрам менен Нахор аял алышты. Ыбрам Сарага, Нахор болсо Арандын кызы Милкага үйлөндү. Аран Исканын да атасы болчу.

³⁰ Сара төрөбөс болгондуктан балдары жок эле.

³¹ Терах өз уулу Ыбрамды, Арандын уулу – небереси Лотту жана Ыбрамдын аялы – келини Сараны алып, каздилердин Ур шаарынан Канаан жерине жөнөдү. Бирок Харанга келип, ошол жерде туруп калышты.

³² Терах 205 жыл жашап, Харанда дүйнөдөн кайтты.