Ruuka 4 - Iimuuma Iinyaaya

Sitaani kaasaka Yeesu

¹ Kimwi Yeesu, enu eejuuye Mwoyo Omutaakatiifu, ˆnaasubha okusookerera ku-ruuji rwa Yorodaani. Mwoyo Omutaakatiifu ꞉aamutangashaga ari mw-ibhara, ˆnaamara-yo nsiku makumi gana,

² Sitaani ˆnaamusakyaga. Ku-nsiku giyo gyone kutyo, ꞉ataaryaga kiinu kyonekyone. Ginsiku giyo ꞉gyeejire gyakuumira omweko ngumuruma muno.

³ Sitaani ˆnaaja ˆnaamubhwira ati, “Raabhe awe uri Mwana wa Nyamuwanga, siiga riigina rinu riyinduke ribhe mukaate.”

⁴ Yeesu ˆnaamusubhya ati, “Ikaamirwe mu-Makaamo Amataakatiifu ati, ‘Obhurame bhwa omuunu bhutari ku-bhyokurya era.’”

⁵ Kimwi Sitaani naamugega ˆnaamusira ku-kiima ekireera, ˆnaamweresisha amwi ginkama gya ekyaro kyone kutyo.

⁶ ˆNaamubhwira ati, “Eniija okukuyaana obhutungi na obhuniibhi bhwa ganu goone kutyo, kwa okubha ganu goone kutyo ni gaani, eniyaana woonewoone unu eneenda.

⁷ Woori, ukandamya, enikuyaana gayo goone kutyo.”

⁸ Yeesu ˆnaamusubhya ati, “Ikaamirwe mu-Makaamo Amataakatiifu ati, ‘Ramya Raatabhugenyi Nyamuwanga waawo, ukorere emirimu omwene era.’”

⁹ Kimwi Sitaani ˆnaamusira Yerusareemu, ˆnaamuyambaasha iiguru ku-kiisonge kya riiyekaru, ˆnaamubhwira ati, “Raabhe uri Mwana wa Nyamuwanga, iiyesa ansi,

¹⁰ kwa okubha ikaamirwe mu-Makaamo Amataakatiifu ati, ‘Nyamuwanga kaaragirira bhaamaraayika bhaaye bhakwangarire.’

¹¹ Ikaamirwe kweki ati, ‘Owugwira mu-mabhoko geebhwe, waasiga okwikuujura okuguru kwawo kw-igina.’”

¹² Yeesu ˆnaamusubhya ati, “Ikaamirwe ati, ‘Waasiga okusakya Raatabhugenyi Nyamuwanga waawo.’”

¹³ Bhunu Sitaani ꞉aamarire okusakya Yeesu, ˆnaamusiga okwamba.

Iinema ya Nyamuwanga itari ku-Bhaijirayeeri era

¹⁴ Kimwi Yeesu ˆnaasubha Gariraaya, eejuuywega na obhuturo bhwa Mwoyo Omutaakatiifu, amangʼana gaaye, ngaswerana mu-kyaro kiyo kyone kutyo.

¹⁵ ˆNaagenda ˆneeyigishaga abhaanu mu-masunagoogi geebhwe, abhaanu bhoone kutyo, mbamugungyaga.

¹⁶ Kimwi Yeesu ˆnaayika iika ewaabho Naajareeti, anu ꞉aakuriiye. Orusuku rwa Insabhaato, ˆneengira mw-isunagoogi rwa kutyo ꞉aariga anarire. ˆNaayambaara asome Riingʼana rya Nyamuwanga.

¹⁷ ˆNaayaanwa ekitabho kya omuragi Isaaya, ˆnaakifundukura, ˆnaagara anu akaamirwe ati,

¹⁸ “Mwoyo Omutaakatiifu wa Raatabhugenyi, ari amwi na anye, kwa okubha, aamarire okunsora nibhwire abhatobhu Amangʼana Amajomu. Antumire ku-bhanu bhabhoyerwe nibharaasishe obhwiyagaaro bhwebhwe, na okubhwira abhawofu ati abhatura okurora kweki, na bhoone kutyo bhanu abhanyansibhwa, nibhatuurye.

¹⁹ Na niraasishe abhaanu ati omwaka gwa iinema ya Raatabhugenyi nigwo gunu.”

²⁰ ꞉Eejire aamara okusoma amangʼana gayo, Yeesu ˆnaafundikira ekitabho, ˆnaasubhisha omuyereja, ˆneekara okwamba okwiyigisha. Abhaanu bhoone kutyo mw-isunagoogi muyo, ꞉bhaariga mbamwikomeeresha.

²¹ Niwe Yeesu ˆnaamba okubheeyigisha ˆnaabhabhwira ati, “Amakaamo Amataakatiifu ganu mwoongwa, reero inu gaakuumira mu-matwi geemwe.”

²² Bhunu Yeesu aaikaga amangʼana gayo, abhaanu bhoone kutyo mbaaika ati kaaika kujomu, mbagaruguurira muno amangʼana ga iinema ganu ꞉aariga ˆnaaika. Mbaamba okubhuushaanya ati, “Angu, unu atari mumura wa Yuusufu!”

²³ Yeesu ˆnaabhabhwira ati, “Amwi woori omutura okumbwira ati, ‘Omuragusi, woori nwiragure awe omwene.’ Na omuuja okumbwira ati, ‘Ganu kyunguuywe ati ꞉waariga nuukora Kaperinawumu eyo, nuugakore na ewaasu enu!’”

²⁴ Yeesu ˆnaaika ati, “Enibhabhwira ekimari, omuragi atakunyoora ekibharo mu-kyaro kya ewaabho.

²⁵ Nawe enibhabhwira ekimari ati, ꞉bhaariga bhariwo abhakimari bhaafu mu-kyaro kya Ijirayeeri ku-nsiku gya omuragi Eriya. Mu-kabhaga kayo ingubha itaaguuye myaka esatu na meesi gasansabha, injara niingira mu-kyaro kyone kutyo.

²⁶ Nawe, Eriya ꞉ataatumirwe okusakira mukimari wundi woonewoone, tari ꞉aatumirwe ku-mukimari wumwi era owa mu-musi gwa Sarepita, ayeeyi na Sidooni.

²⁷ Mu-kabhaga ka omuragi Erisha koone, ꞉bhaariga bhariwo abhagenge bhaafu mu-kyaro kya Ijirayeeri, nawe ꞉bhataawosiibhwe bhoone kutyo tari Naamaani era, omuunu unu ꞉aariga asookere mu-kyaro kya Siiriya!”

²⁸ Abhaanu bha mw-isunagoogi muyo ꞉bheejire bhoongwa amangʼana gayo, mbabhiiyirwa muno.

²⁹ Kimwi mbeemuka bhwangubhwangu bhawooye esungu. Mbagenda mbamukuura, mbamuyikya ku-kyoromoko kya ekiima kinu omusi gwebhwe ꞉gwariga guumbakirwe-ko, mbeenda bhamukuure ayiringitire ansi.

³⁰ Nawe, ˆnaatura agati mw-isangi rya abhaanu, ˆnaagenda gyaye.

Yeesu kaawosha abhaanu Kaperinawumu eyo

³¹ Kimwi Yeesu ˆnaagenda mu-musi gwa Kaperinawumu, mu-kyaro kya Gariraaya. Orusuku rwa Insabhaato, ˆneengira mw-isunagoogi, ˆnaamba okwigiyisha abhaanu.

³² Abhaanu mbaruguurira muno ameeyigisho gaaye, kwa okubha amangʼana gaaye ꞉gaariga gari na obhuturo.

³³ Mw-isunagoogi muyo, ꞉aariga arimo muunu wumwi awungirwe ekiwi, nkirira, nkyamura obhuraka nkyaika ati,

³⁴ “Awe Yeesu wa Naajareeti, owukyenda-koki? Waaja okukimara-wo? Anye nikumenyere ati uri niga, ni awe Omutaakatiifu unu usorerwe na Nyamuwanga!”

³⁵ Yeesu ˆnaasiiga ekiwi kiyo ˆnaakibhwira ati, “Jibhira! Usooke ku-muunu unu!” Kimwi, ekiwi kiyo nkigwisha omuunu uyo ansi, mu-meeso ga abhaanu bhayo bhoone kutyo. Kimwi nkimusooka-ko kitamuwutaasiishe.

³⁶ Abhaanu bhoone kutyo, mbaruguura muno, mbabhuushaanyaga ati, “Ni mangʼanaki ganu? Ndora kaasiiga ebhiwi kwa obhuturo bhisooke mu-bhaanu, mbibhasooka-mo!”

³⁷ Amangʼana gayo, ngaswerana mu-kyaro kiyo kyone kutyo.

Yeesu kaawosha bhaanu bhaafu

³⁸ Yeesu ˆnaasooka mw-isunagoogi, ˆnaagenda ewa Simooni, ˆnaanyoora nyaabhuko Simooni arwaye ari na omuswija. Mbasabha Yeesu amuwoshe.

³⁹ Niwe Yeesu ˆnaayambaara ayeeyi na nyaabhuko Simooni, ˆnaasiiga omuswija guyo gumusooke-ko. Kimwi omuswija ngumuwa-ko. Niwe omugasi uyo ˆneemuka, ˆnaamba okubhayaana ebhyokurya.

⁴⁰ Anu riisuubha ꞉ryaguuye, abhaanu bhoone kutyo bhanu ꞉bhaariga bhari na abharwaye, mbareetera Yeesu abharwaye bheebhwe, bhari na marwara ga mbaga nyafu. Yeesu ˆnaatuura amabhoko gaaye ku-muunu wumwiwumwi, ˆnaabhawosha bhoone kutyo.

⁴¹ Na ebhiwi ꞉bhyasookere mu-bhaanu bhaafu mbimwayaga mbyaikaga ati, “Awe uri Mwana wa Nyamuwanga!” Ebhiwi bhiyo ꞉bhyaaikaga kutyo kwa okubha ꞉bhyariga bhimenyere ati Yeesu niwe Kiriisitu, nawe Yeesu ˆnaabhigaanya bhisige okwaika kweki.

Yeesu keeyinda mu-kyaro kya Abhayawudi

⁴² Mbukya mwejo, Yeesu ˆnaasooka ayo, ˆneebhereera ˆnaagenda anu bhatari abhaanu. Abhaanu bhaafu mbamwagara, bhunu bhaamurorere, mbeenda okumugaanya asige okubhasiga.

⁴³ Nawe, Yeesu ˆnaabhabhwira ati, “Eyeendwa nigende mu-misi egindi gyone, nibhabhwire Amangʼana Amajomu aga obhukama bhwa Nyamuwanga, kwa okubha ꞉naatumirwe ku-nsonga iyo.”

⁴⁴ Niwe, Yeesu ˆnaagenderera okutura mu-kyaro kya Ebhuyawudi, ˆnaaraasishaga abhaanu mu-masunagoogi geebhwe.