Mark 5 - Kwak'wala 4 Gospels Acts and Selections 1897

¹ Wa gāḵ dāḵwa ās gāḵā‐wītl lāḵā upsūtā sa zalātl, lāḵ awīnāgwīsā sī da Gerasenes.

² Gil mīs gāḵ wutl‐tau lāḵā boat, hīh‐īdāmīs lā kākāyāla sū sa bagwānum gāyūtl zaulīsila lāḵ uḵā sa sa dīdigiyā uḵnūgwā tsa yāksāmī spirit,

³ Yiḵā hī um lā gūqāhyilī uḵā sa dīdigiyā; kīyos umḵa ā wīs qayūglāsuk yis numūqā bagwānum yitl‐īduk, yisa wāh mī kulka‐hyaul:

⁴ Wāh nāhwā ma ī gwunh‐īd tsū yiklītīd tsū sa dunum ī gla wa kulka‐hyaula, au nāhwā mīsī da kulka‐hyaula a‐utlzā matsūs, gla wī da dunum wāh yiklīdumk a‐utlzā ḵād, kīyos umḵa ā wīs numūq bagwānum qīh‐īdaas nūq naukumh‐īdā masuk.

⁵ Hīmunātla mīsī ḵūḵ kākanūklīḵ gla wūḵ nīnālāk, hī gāḵ lī da dīdigiyā glū lāḵī da na‐unge, qaqātl‐tse, buḵītā qilīx‐um sa tīsum.

⁶ Gil mīs dūḵ‐wāklilāḵ Jesus lāḵā qīsālā, la zilh‐wīd kās umyāḵ‐īdīk,

⁷ Lā qaqātl‐tse hāsil, nīkia, mā zin klūs, Jesus, yūkl Ḵwanūq sa Ike Gīkumī, la mun hawāḵulūkl kā ī da Ike Gīkumī, kās kīsa ūs tlālāwūtl‐īdā mas gāḵun.

⁸ Kā nīkīnāyasīk, kīlaga yūkl yāksum spirit lāwe lāḵwā bagwānumḵ.

⁹ La wuklāk, ungwā klās? la nīk yuk, hīmun glīkumī lūḵ‐lūḵwā; kā unūh wāḵā‐as.

¹⁰ La aul hawāḵulāk kā k̤īsīs lā qāqiyākās lāḵā āklī.

¹¹ Lā tā kīnumī da gwasū hī gāḵ lī da nuge hīmulā‐gilīsā.

¹² Lamīs nāhwā mī da devils hawāḵulāk, nīkia, lā lā hyinūh lāḵā gwasū, kunūh lī lālākā lāk.

¹³ Lī Jesus hītlkāla umk: wa gāḵī da yaīksāmī spirit lāwe, la lālākā lāḵā gwasū: lī da gwasū wīlā‐um lā zilhwāḵula lāḵā hiyimstā hī‐stal lāḵā zilātl, mātl punā ḵunt lūḵsumhīdīs wāḵa‐ās, lamīs wīla um wīhyinālīsum lāḵā zilātlī.

¹⁴ Wa yih dāḵw ḵī da aāḵsīlāh dek, lāh dāḵw zilh‐wīd hītl‐tsau, la zikiātlilas lāḵā town gla wa hī gāḵ lī da āklālālīs: wa gāḵ dāḵwa ās kās gāḵī dūqā ḵī da qīh‐īdaāsī.

¹⁵ Wa gāḵ dāḵw lāḵ Jesus, lāh dāḵw dūqilā ḵī da uḵnūgwadih de sa devils k̤waīsā, kūḵzawāqā, glūḵs la mā ī naukumh‐īda, yaumḵ uḵnūgwādih‐de sa lūḵ‐lūḵwā; wa lāh dāḵw zīndih‐īdis.

¹⁶ Wa lī da dūqileḵ nītlas lāh dāḵwuḵ qīh‐īdaāsā ḵā uḵnūgwādih de sī da devils, hīmīsī qīh‐īdaāsā sī da gwasūh dī.

¹⁷ Lāh dāḵw hawāḵulāk kā lālāgīs qīd lāḵ awīnāgwīs dāḵwas.

¹⁸ Wa yiḵs lā ī lāḵs lāḵā boat, gāḵaā sī da uḵnūgwādih‐de sa devils hawāḵulāk kās le k̤āpīh se lāḵ gla wī.

¹⁹ Kīs tā Jesus hītlkālāk, au um nīk yik, hāga nenāq lāḵīs nīnumūqa ūs, glū kās nītlā ūsā kī yis wālasī qīh‐īdaātsa Ike Gīkumī kās, gla wīs lā‐īnayā wos‐īdūs kās wāḵ‐īdī lūkl.

²⁰ La mīs kās‐īda, la zikiātlilas lāḵā tītown wālasī qīh‐īdaāts Jesus kā ī, lī da nāhwā bagwānum ḵunyās‐īdis.

²¹ ¶ Wa gil mīs lā ītāwītlī Jesus lāḵā upsūt gīḵsal lāḵā boat, gāḵaās k̤āpīkū wī da kīnum bagwānum lāk: hī tā lī uḵā sa zilātlī.

²² Gāḵaā sī da numūqī gāyūtl lāḵ gīgikumāya sa synagogue, glīkādis Jairus; hīh‐īdā mīs humhw‐wālīs lāk,

²³ Aulākial hawāḵulāk, nīkia, ḵun zidāk ḵwanūq la um lālaāla‐gilītlā, lamīsin hawāḵulūkl, kās gāḵa ūs wāḵ‐īd pāh‐īd tsūs āyasau kūs lāk, kā qilā mī lāḵs.

²⁴ Lamīsī Jesus gla wī; kīnum tī da bagwānum lāskumīk, lāh dāḵw tākiāpuk.

²⁵ Numūq tī da zidāk, yiḵā lā mātl‐unḵa giyū gwīl lāwela sū sa ulqā,

²⁶ Lāh da k̤īpun wūtl‐um tlālāwūtlilā matsū sa pīpatīnūḵ, wūtl‐um lā wīlā sīs dālāhdī, la hīweḵā ek‐īda, au um glātl ḵunglināqila.

²⁷ Yiḵs la ī k̤ālāḵ qīgīlasas Jesus, gāḵ lālākā ḵī da tākiāpīk lāḵ ulḵglāyas kās pāgaāklilīḵ qītlqeles:

²⁸ Kā īḵs nīkia ī, kunklū au um lāḵ wāh um pāh‐īduk qītlqeles, lamīsin ek‐īda umkl.

²⁹ Wa hīh‐īdā mīsī da gwakaulāh dek ulqā lā kiūtl‐īd, lamīs kauklātla umk lāḵīs ūqīnāyī yiḵs lamā ī ek‐īd lāḵīs zihk̤ūlumh dī.

³⁰ Lī Jesus hīh‐īda um wunātl āklilā ḵā tlāhwāyī lāwe lāk, hyilpilīs lāḵ nuk̤akīlīsā sī da kīnumī bagwānum, kās nīkī, ungwā zī da pāh‐īdeḵ gin qītlqelāg?

³¹ Lī disciplesas nīk yik, dūqila ma ākūsā ḵwā kīnumḵ bagwānum tākiāpūkl, las nīkia, ungwī pāh‐īdī gāḵun?

³² Lā mulmulsīlel kās dūḵ‐wāklilī ḵā pāhīdek.

³³ Lā āsī da zidākī kitlilā, ek ḵwunāla, kauklilā um ḵīs lā‐īnāyī ek‐īda, gāḵ humhwālīs lāk, kās nītlīk kīyos klīlk̤wālā‐yau.

³⁴ Lā nīk yik, ḵwanūq, la ums hītl‐tsīstā matsū sīs ūqizālazī yūs: hītlilḵ‐īdaga, wīga ek‐īd lāḵīs zih‐k̤ūlumh de ūs.

³⁵ Wa yiḵs kīs ma ī k̤wītl‐īda, gāḵ dāḵwa ā sī da geh‐īdī lāḵ gūqā sī da gīkumāya sa synagogue yiḵā nīkī, la um tlilīs ḵwanūqūs, māsīs wutlītl mā la gitālā ḵwā Gīkumāyīḵ?

³⁶ Aumīsī Jesus kīs k̤āsila ḵā gāḵī wātldum, nīk ḵī da gīkumāya sa synagogue, qālā nūtla, au umā ūqisuḵ.

³⁷ La kīs hītlk̤ālāḵ ūgwile bagwānum lāskumīk, hīgamī Peter, glū James, hīmīsī John yiḵ zāyes James.

³⁸ Gāḵ dāḵw lāḵ gūqā sī da gīkumāya sa synagogue, la dūqila ḵā kīnum k̤wāk̤wa‐saula.

³⁹ Gil mis la‐īklā, la nīk lāh dāḵwuk, māzīs hīgītl dāḵwā qīgīlī, k̤wāk̤wa‐saula gītlā, kīsa āḵs tlilūḵ da ginānum īḵ, au ma āḵs mīḵā.

⁴⁰ Lāh dāḵw dāsdātlas: la mīs glīḵs lā ī wīlawilsā masuk, uḵ‐īduḵ ūmpa sī da ginānum glū abumpas, gla wīs wa‐ūq maulā, kās lī la‐īkl lāḵ uḵ‐āsā sī da ginānum.

⁴¹ La ās dābātlzānund ḵā ginānum, kās nīkīk, Talitha cumi, yiḵī da nīkiāḵs nīkiā ī, zāzādākum, lamun nīkiūkl, glāḵwīdaga.

⁴² Hīgilītl mī sī da zāzādākumī glāḵwilītlā kās kāsilītlī; kā īḵs la mā ī mātl‐unḵa giyūgwīlīs k̤wīsa: lāh dāḵw aul ḵunyās‐īdis.

⁴³ Lā tloqal bulāh dāḵwuk kā kīyosīs bagwānum kautl‐āklilā lāḵ ḵīk, lā weḵā kā zaw sū wīsī da ginānum, kās humh‐īd tsa wa.