Mark 4 - Kwak'wala 4 Gospels Acts and Selections 1897

¹ La ītīd glīḵs‐ālā lāḵ uḵā sa zalātlī; wa hī mīs gāḵ k̤āpīkū‐wās lāk yisa klūma lā kīnum zī kias bagwānumā, lāgītl‐ts au‐um lā lāḵs lāḵa boat, kās lī qāḵsāla klīk lāḵā zalātlī; nāhwā mī sī da kīnum bagwānum hī lī da klamā‐īsī.

² La glīḵs‐ālā sa k̤īh‐īdātla wātldum nīkduma gīlā kāh dāḵwī, nīkia,

³ Hūklīlāla; dok, ḵī da zumīnūḵ lā, kās le zumā:

⁴ Gil mīs gwītl‐ālīsilas, la‐āsī da wa‐ūqī k̤wupālīs lāḵ uḵā sa tihyilā, gāḵa ā sī da pīpāklūmas kās humh‐īdīk.

⁵ Lī da wa‐ūqī k̤wupālīs lāḵā tīzigwīs ḵā kīsī khāyātsa tik̤iā; wa hīh‐īdā mīs k̤wāḵ‐īda, kā k̤īzīnāyas wunkīsī da tik̤iā.

⁶ Gil mī sī da klīsila īk̤igīla, la‐ās qumulhīda, kā īs k̤īyozīnāyī klūpikiā, au gītl ums lā hwuls‐īd.

⁷ Lī da wa‐ūq k̤wupukā ḵā kukunī, wa lī da kukunī k̤wāḵ‐īda, lā tākiaunum‐āk, kās kīyo gwītl lā k̤wāḵ‐īd hīma‐ūmas lāk.

⁸ Lī da wa‐ūq k̤wupālīs lāḵā ek āwīnāgwīs, gāḵ k̤wāḵ‐īda ā tsa hīmaūmas, la kī‐nāqila, lā gīḵ‐klaula ḵā yūdūhw sumgūstau punā, gla wa k̤uklaskum gūstau punā, gla wa lāk̤inda punā lāḵīs wāḵā‐ās dī.

⁹ Lā nīkia, yiḵā puspayū nūqā kās wuklilī, wīgā hyī hūklilā.

¹⁰ Gil mīs lā hīga‐galīsā, la‐ās wuklā sū sīs wa‐ūgwīsī gla wa mālūgwagiyū lāḵ qībātla‐āsā sīs nīkdumā gīlā ī.

¹¹ La nīk lāh dāḵwuk, la‐um glā zawe lūkl kās kauklilā ūsā ḵā tlītlinhyisī gīkā tsa Ike Gīkumī: wa lāh dāḵw glā ḵī da k̤īsī uḵnugwādis, nāhwā mīsik numāhyis‐dumā gīlī kāh dāḵwī:

¹² Yiḵs dūqilā‐yū nūq ma ī kās dūqila‐yū lāḵ, la k̤īs dāḵw dūqila: la wūklilā‐yū nūq um kās wūklilā‐yū lāḵ, la k̤īs dāḵw hūklīla; gwākutlāh dāḵwā ī klāyū lāḵ ḵīs qīxdum, glū kū dīgiklilūd tsū lāḵ ḵīs yekīnīh dāḵwī lāk.

¹³ La nīk lāh dāḵwuk, k̤īsas āyūsilā ḵūḵ qībātla‐as sāḵ sa? wa wīh‐īda zau tā klas āyūsilā‐kl ḵā ātl‐ūgwila nīkdumā.

¹⁴ Yiḵā zumīnūḵwī hī um zumā sa watldumī.

¹⁵ Wa gāh dāḵw mīs hī lī da tihyilā, yiḵ zāmāsā ḵā wātldumī, wa gilh dāḵw mīs lā wuklilāk, kās hīh‐īdā mī gāḵī satan, kās uḵ‐īdī ḵī da wātldum lāh dī wāh zumzākum lāḵ naukīh dāḵwās.

¹⁶ Wa gāh dāḵw mīs hī ḵād qīx ī da lā zume lāḵā tīzagwīs, yikīḵs lāh dāḵwa ī lā wuklilā ḵā wātldum, kās hīh‐īdih dāḵw mī uḵ‐īduk dādālāk ek̤īkulas:

¹⁷ Wa yih dāḵw kīḵs kīyosa ī klūpik lāḵ naukīh dāḵwas, kās numātl‐īd bīdāwī glākl tloqātla, kās gil mī tlālāwotl‐īd glū mīklā sū kā ī da wātldum, hīh‐īdih dāḵw mīs yāh‐īda.

¹⁸ Wa hī mīs ātl‐ūgwila yiḵā zumzāka lāḵā kukunī; ga um lāh dāḵw wuklilā ḵā wātldum.

¹⁹ Lūḵ da nāhwāḵ awīlulkī lāḵwā awīnāgwīsīḵ glū awīlulkulā kās k̤īkiyādī, glū muhwile ḵā nāhwā gāḵ gīgālīsil lāḵ naukīh dāḵwas, tukiūd ḵā wātldum, kās kīyosī lā egāsā.

²⁰ Wa hī mī sa zumgālīs lāḵā ekī awināgwīs; hīh dāḵw mī da lā wuklilā ḵā wātldum, kās dādālīk, lā k̤wāḵā; yūdūhw sumgūstau punā, k̤uklaskum gūstau punā, glū lāk̤inda punā lāḵīs wāḵa‐ās dī.

²¹ Lā nīk dākwuk, hīmā gāḵ‐yū gwītl tsī da nīgwāzī kās aumī kupsumlītlā sū‐wā, glū uḵā‐būlīlum lāḵā ga‐īlas, glū kās k̤īsī uḵāklilūdāyū lāḵīs uḵātla‐ās zīmāsa?

²² Kā īḵs kīyosa ī tāyaāqā yiḵā k̤īs kla īs nītl‐īdāyūkl, kīyos umḵa ā wīs k̤wilā‐klātla yiḵā k̤īsālasī īs lā khātlā.

²³ Kū pusbāyū nūq lāḵī ungwe bagwānum wīgā hyī hūklilā.

²⁴ La nīk lāh dāḵwuk, yāklaula kā īs wuglitlūs: yiḵīs munyumh dāḵw klā ūs hīmīs munsilā klūkl; lā klī k̤īnāqilā klī zawyī lūkl.

²⁵ Yiḵī da uḵnūgwād klā, hīmīs zaw sū klī, wa yiḵī da k̤īs klā uḵnūgwād‐kl, hīmīs tlīnumā sū klī lāḵīs lāh dī wāh ḵāklagīl uḵā.

²⁶ Lā nīkia, hīmīs gāḵ qīx ī gīkāsā sa Ike Gīkumī, yiḵs numāhyisa ī gla wa bagwānum gwītl‐ālīsilā sa zumza‐īmas lāḵā awīnāgwīs,

²⁷ Lā mīḵmīḵā ḵā kānūklī glū glāḵ‐glāḵwā ḵā nālā, lā k̤wāḵa‐nāqilī da zumza‐īmas, lā k̤īs k̤ekilāḵ k̤wāḵ‐īdih dum as.

²⁸ Kā ūḵ da tikieḵs k̤wāḵā masa; au ma wīs glā k̤ītumḵs gāla ī, lī da ūḵtau‐yī, lā wīs glī da zīzidanū lāḵā ūḵtau‐yī.

²⁹ Wa gil mīsī da zīzidanū lā klūpā, hīhīdāmīs yālāḵ‐īd kā lā k̤īklilīsāk, kā la‐īnī mas lastūd lāḵ humzunḵ‐ḵāk.

³⁰ Lā nīkiā, mā zints munyas klas gīkāsā sa Ike Gīkumī, mā zints numāhyizās klā untsās?

³¹ Hī dā gāḵ qīx ī da numskumstū bīdāwī zumālasa, yiḵs lā‐ī uḵālīzum lāḵā tikie sa awīnāgwīs wāh ma ī umāyākī sūḵ nāhwāḵ zumālas lāḵwā nāhwāḵ awīnāgwīs:

³² Wa gil mīs glā zumgālīsā, kās k̤wāḵ‐īdī, kās lī wālazakī sūḵ nāhwāḵ k̤wāsk̤waḵulā, gilsgiltā‐zīs klunākī, gāḵ mī sī da pīpāklūmasī quzuḵ‐klāwīk.

³³ Kīnumī sī da hī qetlā nīkdumā wātldums yiḵs lā ī nīk sa wātldum ī lāh dāḵwuk, lāḵīs hītl‐āzūtl dāḵwī kās āyūzitlā.

³⁴ La kīs nīk sa wātldum ī yiḵā kīyosī nīkduma kāh dāḵwī: la mīs glā a‐ūqsīlāh‐īd ḵīs disciples ayūzūdisa nāhwā lāh dāḵwuk.

³⁵ ¶ Wa lāḵīḵ da nālā yiḵs lā ī zāqā, la nīk daḵwuk, wīhyints lāwītl lāḵā upsūtī.

³⁶ Gil mīs yālāḵīt ḵā kīnum bagwānum, lāh dāḵw gluḵ‐īdis lāḵīs k̤wāḵsāla īnī um, lā mī sī da ātl‐ūgwila boat lā gla wī.

³⁷ La ās awīlāh‐īdī da nāla, lī da kulāyī qutluḵ‐sila ḵī da boat, lī da boat lā kūtānāqila.

³⁸ La mīs k̤wāḵsāla lāḵā ūḵ‐glāyī, mīḵuḵsal kulhw‐sumī ḵā kīnūtl: lāh dāḵw gwīhīduk kās nīkīk, At, k̤īsas awīlā‐gīlā kuntsū tlītlilāḵ?

³⁹ La ās zih‐īda, kās klūwilgātlī ḵā yaula, la nīk ḵā wāpī, k̤imāḵ‐īdaga: la mīs qātl yaula, la aul k̤imākulā.

⁴⁰ La nīk lāh dāḵwuk, māzīs kitlilāh dāḵwītla, k̤īs dāḵw deḵ mas ūqis‐īda ā?

⁴¹ Lāh dāḵwa ās aulā k̤ial zindih‐īda, la nīkiāya‐pāla, māzau ānā wīsūḵ bagwānum īnāyāḵs yikūḵs lamā āḵā ūḵ da yaulāḵ gla wa wāpīḵ nānākīgī umq?