Mark 3 - Kwak'wala 4 Gospels Acts and Selections 1897

¹ La ītīd la‐īkl lāḵā synagogue; numūq tī da tlilk̤iūtlzāna bagwānum hī gāḵ lī.

² Lāh dāḵw dūqātlāk kīs kla ī ek‐īdā masuk ḵā sabbath nāla, kās hītlā ḵa ās dāḵw lāḵuk kās sīnātuk.

³ La nīk ḵī da tlilk̤iūtlzāna bagwānum, glāḵ‐wukau lītl las.

⁴ La nīk lāh dāḵwuk, ek mā ī kā uḵsū‐wī sī da ekī qaīnī ḵā sabbath nāla, glū hī uḵsū‐wī yāksamā? wīnī da ekiā lāḵ qāqila‐unḵ glū tlilāmas duma? au mīs la k̤wīklātlāh dāḵwā.

⁵ Wa gil mīs lā dūqilkund tlāwīs dāḵwuk, zihyilīs naukāyī kā au‐īnīh dāḵw mas pāpīzā ḵīs nīnaukīh dāḵwī, la nīk ḵā bagwānum, sāh‐īdaga tsūs āyasau kūs: la sāh‐īdis; lī āyasaus nākumzauh‐īda.

⁶ Lī da Pharisees hūkūwilsa, wa hīh‐īdih dāḵw mīs la k̤wīḵul gla wa Herodians kās qīh‐īdaās dāḵw kā tlilīs.

⁷ Lī Jesus gla wīs disciples lāḵ uḵā sa zalātlī: lī da kīnum bagwānum ḵā geh‐īdī lāḵ Galilee lāskum īk, gla wa geh‐īdī lāḵ Judæa,

⁸ Hī mī sa geh‐īdī lāḵ Jerusalem gla wa geh‐īdī lāḵ Idumæa glū upsūtas Jordan; glūh dāḵwī da hī gāḵ lī uḵās Tyre glū Sidon, klūm kīnum bagwānumā, yiḵs lā ī khālāḵ ḵunḵunyāzīma qīgīlats, gāḵ dāḵw lāk.

⁹ La uḵkigātl ḵīs disciples, kā uḵ‐īd tsūwīs umā‐bīdāwā boat kā ī, kā ī da gāḵī kīnum bagwānum, gwāk̤utla āk tākiapuk.

¹⁰ Kā īḵs lā‐ī kīnum‐īs lā ek‐īdā matsūwā; lā‐gītl tsī da wāḵa‐ās māsa yāa‐yāksāla gāḵ nā‐nāhwā āk kās pāgaā‐klilī lāk.

¹¹ Gil nāhwāh dāḵw mā ī da ya‐īksāmī spirit dūḵ‐wāklilāk, gāḵ dāḵw huqumgālīsil lāk, qāglitiwī, nīkia, Sū‐um Ḵwanūq sa Ike Gīkumī.

¹² La nīk lāh dāḵwuk kā kīs kiasī lāḵs k̤ālāgīla mas lāḵs.

¹³ ¶ La lāgūstau lāḵā nuge, lā klīlāla kā gāk lāk ḵīs qayūwī kās klīlāla‐sū: wa lāh dāḵw lāk.

¹⁴ La ās uḵ‐īd ḵā mālūgwigiyū kā k̤āpīhsiyīs gla wī, glū kās yālākīs kās glīḵs‐ālī.

¹⁵ Glū kā uḵnūgwādī sīs tlāhwāya kā lāwelī sī ḵā devil‐sī:

¹⁶ Lā glīḵ‐īdis Peter lāḵ Simon;

¹⁷ Hīmīsī James ḵwanūqas Zebedee, hīmīsī John zāyes James; hīmīs glīḵ‐īd tsū sīs Boanerges, sāsums qunhwā nīkīḵs nīkia ī:

¹⁸ Hīmīsī Andrew, glū Philip, glū Bartholomew, glū Matthew, glū Thomas, glū James ḵwanūqas Alphæus, glū Thaddæus, glū Simon ḵā Cananæan,

¹⁹ Hīmīsī Judas Iscariot ḵā lūtla lāḵūdis.

²⁰ Wa gāḵ la‐īkl lāḵā gūqī; gāḵa ā ḵa ā sa kīnum bagwānum k̤āpīkū nāqil ītīda, kās kīyosītl lā qīh‐īdaās humh‐īdā.

²¹ Wa gil mī sī glīglaglaules la k̤ālā ḵīk, lāh dāḵwa ās kās lī dāh‐īda īḵs‐duk: kāḵs nīk dāḵwa ī nūtlumātlī lā.

²² Gla wī da scribes yiḵā gāḵī geh‐īd lāḵ Jerusalem nīkia, uḵnūgwāda zū ḵwās Beelzebub, hīmīsī gīkumāya sa devils lāwelā masītl tsū ḵwā ḵī da devils.

²³ La klīlālāh dāḵwuk kā gāḵ dāḵwīs lāk, la nīk lāh dāḵwuk yisa numāhyis‐dumā, wīhīdā zau lāḵī Satan qīdā‐masuḵ Satan?

²⁴ Glū kū gil um lāḵ qilyākaula lāḵī da numskumāq līlqilāklāya, kīyos lāḵ tā qīh‐īdaās lāḵs u‐līs lāḵ.

²⁵ Glū kū qilyākaula lāḵī da numskums gūqā, kīyos tā qīh‐īdaās lāḵ sa gūqī ek um gūgwīsā.

²⁶ Glū kū gil um lāḵī Satan nīk kās hekaulī qilyākaula, glū kās mātlzātlī, kīyos tā qīh‐īdaās lāḵs u‐līsā, au um glātl lā lāḵ kīyohwīda.

²⁷ Kīyos um ḵa ā wīs numūq bagwānum qa‐īglas nūq lāḵ gūqā sī da tloqīmasī bagwānumā, kās tlīnum‐īḵ māmīkias as, hī‐ga um kū la mā wīs glā lāḵ yitl‐īd ḵā tloqīmas bagwānum, lā lāḵ wīs glā tlīnum‐īlelāḵ gūqas.

²⁸ ¶ Aula kias tin nīkiūkl, nāhwā um lāḵī yekīnāyī dīgiklilū tsū‐kl lāḵ sāsum as bagwānum ī, gla wa nāhwā yāksum wātldumh dāḵws, ḵīs yākpāḵstā‐yū nāhwāh dāḵw kla.

²⁹ Wa yiglāḵ ungwā lāḵā bagwānum yākpāḵstā lāḵ ḵā Holy Spirit, kīs, klī dīgiklilūd tsū‐wīnūḵ‐kl lāk, lā glā tā lālas lāḵā hīmunīs kla k̤īlāgāyū‐kl.

³⁰ Kā īs nīk̤īnīh dāḵwī, uḵnūgwādūḵ sa yāksamī spirit.

³¹ ¶ Hī mīs gāḵ‐āts abumpas gla wīs nātl‐numwiyūt, glāh glosa, yālākum nūq lāk, kā klīlālāk.

³² Lī da kīnum bagwānum k̤wutsīstā lāk, lāh dāḵw nīk yik, dok, abās glū nātl‐numwiyūtī lāḵā k̤lāsunḵāyī uḵ‐īḵsdūkl.

³³ La nānākmīk nīkia, ungwā zin abumpā gla wun nātl‐numwiyūtā.

³⁴ La ās dūqil kund ḵā k̤wutsīstālek kās nīkī, dok, ḵun abump gla wun nātl‐numwiyūt!

³⁵ Kā īḵs hīma ī ungwā kla nānākīgī kluḵ naukāyā sa Ike Gīkumī, hī mun numwiyūtī, ghū wuk̤wī, glū abumpī.