လံာ်စီၤပၤခံဘ့ၣ်တဘ့ၣ် 1 - Sgaw Mason Bible

¹ ဒီးစီၤအၤဃာ်သံအလီၢ်ခံန့ၣ် မိၤအးပူထီၣ်အံၣ်စရ့ လးလီၤ.

² ဒီးစီၤအဃၤစယၤလီာ်တဲာ်လၢတၢ်ထူၣ်ဖျိ လၢဒၢး လၢထးခီတဒၢးလၢၡၤမရံအပူၤ, ဒီးဆါထီၣ်ဝဲ, ဒီးမၢ လီၤကလူးတဖၣ်, ဒီးစံးဘၣ်အီၤ, ယကမူဒံးလၢတၢ် ဆါအံၤဧါန့ၣ်လဲၤသံကွၢ်လၢဧ့ကြိၣ်အကစၢ် ဘဧၤလး စဘူာ်န့ၣ်တက့ၢ်.

³ ဒီးယွၤအကလူးစံးလၢ ပှၤတံးၡဘးဖိစီၤအ့ၤလံယၤ, ဂဲၤဆၢထၢၣ်, လဲၤသဂၢၢ်ထီၣ်ပှၤၡၤမရံအစီၤပၤအကလူး တဖၣ်ဒီးစံးဘၣ်အီၤ, မ့ၢ်ကစၢ်တအိၣ်ဘၣ်လၢအံၣ်စရ့ လးအပူၤဘၣ်ဒီး, သုလဲၤသံကွၢ်တၢ်လၢဧ့ကြိၣ်အကစၢ် ဘဧၤလးစဘူာ်န့ၣ်တမ့ၢ်ဘၣ်ဧါ.

⁴ မၤသးဒ်န့ၣ်ဒီးယွၤ စံးဒ်အံၤ, နတယုၢ်လီၤဘၣ်လၢလီၢ်မံလၢနလဲၤထီၣ်လၢ အဖီခိၣ်ဘၣ်. နကသံသပှၢ်တၢၢ်လီၤ. ဒီးစီၤအ့ၤလံယၤ ဟးထီၣ်ကွံာ်ဝဲလီၤ.

⁵ ဒီးကလူးတဖၣ်ဟဲက့ၤကဒါက့ၤဆူအအိၣ်, ဒီးအဝဲ ဒၣ်စံးဘၣ်အီၤ, တၢ်အံၤသုဟဲကဒါက့ၤမ့ၢ်အဘၣ်မနုၤ လဲၣ်.

⁶ ဒီးအဝဲသ့ၣ်စံးဆၢအီၤ, ပှၤဟဲသဂၢၢ်ပှၤတဂၤ, ဒီးစံး ဘၣ်ပှၤ, လဲၤတၢ်, က့ၤကဒါက့ၤဆူစီၤပၤလၢအမၢလီၤ သု, ဒီးစံးဘၣ်အီၤ, ယွၤစံးဒ်အံၤ, မ့ၢ်ကစၢ်တအိၣ်ဘၣ် လၢအံၣ်စရ့လးအပူၤဒီး, နမၢလီၤတၢ်သံကွၢ်လၢဧ့ကြိၣ် အကစၢ်ဘဧၤလးစဘူာ်တမ့ၢ်ဘၣ်ဧါ. မၤသးဒ်န့ၣ်ဒီး နတယုၢ်လီၤလၢလီၢ်မံ လၢနလဲၤထီၣ်လၢအဖီခိၣ်ဘၣ်. ဒီးနကသံသပှၢ်တၢၢ်လီၤ.

⁷ ဒီးအဝဲဒၣ်စံးဘၣ်အီၤ, ပှၤလၢအဟဲသဂၢၢ်သု ဒီးစံး ဘၣ်သုလၢတၢ်ကတိၤန့ၣ်မ့ၢ်အမၤအသးဒ်လဲၣ်.

⁸ ဒီးအဝဲသ့ၣ်စံးဝဲဒၣ်, မ့ၢ်ပှၤအိၣ်ဒီးအဆူၣ်အါအါက လဲာ်ဒီးကံၢ်တူာ်အယီၢ်ဒ့ဒီးအယီၢ်တကိးတၢ်ဖံးလီၤ. ဒီး စံးဝဲဒၣ်, မ့ၢ်ဝဲလၢပှၤတံးၡဘးဖိစီၤအ့ၤလံယၤလီၤ.

⁹ ဒီးစီၤပၤမၢလီၤပှၤယဲၢ်ဆံအခိၣ်အိၣ်ဒီး အပှၤယဲၢ်ဆံ ဆူအအိၣ်လီၤ. ဒီးလဲၤဝဲဆူအအိၣ်, ဒီးကွၢ်ကွၢ်, ဆ့ၣ်နီၤ ဝဲလၢကစၢၢ်ဒီခိၣ်, ဒီးစံးဝဲဒၣ်, ယွၤအပှၤကညီဧၢ, စီၤပၤစံးဝဲဒၣ်, ဟဲလီၤတက့ၢ်.

¹⁰ ဒီးစီၤအ့ၤလံယၤစံးဆၢတၢ်, ဒီးစံးဘၣ်ပှၤယဲၢ်ဆံအ ခိၣ်, ယမ့မ့ၢ်ယွၤအပှၤကညီဒီး, မ်မ့ၣ်အူဟဲလီၤလၢမူ ခိၣ်ဒီးအီၣ်ကွံာ်နၤ, ဒီးနပှၤယဲၢ်ဆံန့ၣ်တက့ၢ်. ဒီးမ့ၣ်အူ ဟဲလီၤလၢမူခိၣ်, ဒီးအီၣ်ကွံာ်အီၤ, ဒီးအပှၤယဲၢ်ဆံလီၤ.

¹¹ မၤကဒီးတစုမၢလီၤ ပှၤယဲၢ်ဆံအခိၣ်တဂၤဒၣ်အိၣ်ဒီး အပှၤယဲၢ်ဆံလီၤ. ဒီးအဝဲဒၣ်ကတိၤတၢ်ဒီးစံးဝဲဒၣ်, ယွၤ အပှၤကညီဧၢ, စီၤပၤစံးဝဲဒၣ်, ဟဲလီၤချ့ချ့တက့ၢ်.

¹² ဒီးစီၤအ့ၤလံယၤစံးဆၢတၢ်ဒီးစံးဘၣ်အီၤ, ယမ့မ့ၢ်ယွၤ အပှၤကညီဒီး, မ်မ့ၣ်အူဟဲလီၤလၢမူခိၣ်, ဒီးအီၣ်ကွံာ် နၤ, ဒီးနပှၤယဲၢ်ဆံတက့ၢ်. ဒီးယွၤအမ့ၣ်အူဟဲလီၤလၢ မူခိၣ်, ဒီးအီၣ်ကွံာ်အီၤဒီးအပှၤယဲၢ်ဆံလီၤ.

¹³ မၤကဒီးတစု, မၢလီၤပှၤယဲၢ်ဆံအခိၣ်သၢဂၤတဂၤဒီး အပှၤယဲၢ်ဆံလီၤ. ဒီးပှၤယဲၢ်ဆံအခိၣ်သၢဂၤတဂၤလဲၤ ထီၣ်, ဒီးဟဲ, ဒီးချံးလီၤအခီၣ်လၢစီၤအ့ၤလံယၤအမဲာ် ညါ, ဒီးဃ့ကညးတၢ်, ဒီးစံးလၢအီၤ, ယွၤအပှၤကညီဧၢ, မ်ယသးသမူ, ဒီးနခ့နပှၤယဲၢ်ဆံအသးသမူအံၤကဲထီၣ် တၢ်လုၢ်ဒိၣ်ပှ့ၤဒိၣ်လၢနမဲာ်ညါတက့ၢ်.

¹⁴ ကွၢ်ကွၢ်,မ့ၣ်အူ ဟဲလီၤလၢမူခိၣ်, ဒီးအီၣ်ကွံာ်ပှၤယဲၢ်ဆံအခိၣ်ခံဂၤလၢ အခီၣ်ထံးန့ၣ်, ဒီးအပှၤယဲၢ်ဆံတဖၣ်န့ၣ်လီၤ.ဒီးခဲကနံၣ် အံၤ,မ်ယသးကဲထီၣ်တၢ်လုၢ်ဒိၣ်ပှ့ၤဒိၣ်လၢနမဲာ်တက့ၢ်.

¹⁵ ဒီးယွၤအကလူးစံးဘၣ် စီၤအ့ၤလံယၤ, လဲၤလီၤဒီး အီၤတက့ၢ်, ပျံၤအီၤတဂ့ၤ. ဒီးဂဲၤဆၢထၢၣ်, ဒီးလဲၤလီၤဝဲ ဒီးအီၤဆူစီၤပၤအအိၣ်လီၤ.

¹⁶ ဒီးစံးဘၣ်အီၤ, ယွၤစံးဝဲဒ်အံၤ, မ့ၢ်နမၢလီၤကလူးတ ဖၣ်ဒ်သိးအကသံကွၢ်တၢ်လၢ ဧ့ကြိၣ်အကစၢ်ဘဧၤလး စဘူာ်လီၤ. (မ့ၢ်ကစၢ်လၢပကသံကွၢ်တၢ်ကတိၤတအိၣ် ဘၣ်လၢအံၣ်စရ့လးအပူၤတမ့ၢ်ဘၣ်ဧါ.) မၤသးဒ်န့ၣ်ဒီး နတယုၢ်လီၤဘၣ်လၢလီၢ်မံ လၢနလဲၤထီၣ်လၢအဖီခိၣ် ဘၣ်, ဒီးနကသံသပှၢ်တၢၢ်လီၤ.

¹⁷ ဒီးသံဝဲဒ်ယွၤအကလုၢ်အကထါလၢ စီၤအ့ၤလံယၤ ကတိၤတၢ်အသိး, ဒီးစီၤယဟိရၣ်ကဲစီၤပၤလၢအလီၢ်, လၢယူဒၤအစီၤပၤ စီၤယဟိၡၤဖးအဖိခွါစီၤယဟိရၣ်အ နံၣ်ပှဲၤထီၣ်ခံနံၣ်တနံၣ်န့ၣ်လီၤ. အဂ့ၢ်ဒ်အံၤ, အဖိခွါတ အိၣ်ဘၣ်.

¹⁸ ဒီးတၢ်အိၣ်လီၤတဲာ်ဘၣ်ဃးဒီး စီၤအဃၤစယၤလၢ အမၤဝဲတဖၣ်န့ၣ် ကွဲးအသးလၢအံၣ်စရ့လးအစီၤပၤအ လံာ်ကွဲးနီၣ်တၢ်အပူၤ, တမ့ၢ်ဘၣ်ဧါ.