၂ ယိၤဟၣ် 1 - Sgaw Mason Bible

¹ ယၤပှၤသးပှၢ်အံၤ, ယစံးဘၣ်နီၢ်ကူၤရံလၢတၢ်ဃုထၢ အီၤ, ဒီးအဖိတဖၣ်လၢယအဲၣ်အီၤလၢတၢ်မ့ၢ်တၢ်တီအ ပူၤ,ဒီးတမ့ၢ်ဘၣ်ထဲယၤဘၣ်, မ့ၢ်စ့ၢ်ကီးကယဲၢ်ပှၤလၢအ သ့ၣ်ညါတၢ်မ့ၢ်တၢ်တီ,

² လၢတၢ်မ့ၢ်တၢ်တီလၢအအိၣ် လၢပပူၤ, ဒီးလၢအကအိၣ်ဒီးပှၤလီၤထူလီၤယိာ်အဃိ,-

³ တၢ်ဘျုးတၢ်ဖှိၣ်, တၢ်သူၣ်ကညီၤတၢ်သးကညီၤ,တၢ်ဃူ တၢ်ဖိးလၢပၢ်ယွၤ, ဒီးပၢ်အဖိခွါယ့ၣ်ရှူးခရံာ်လၢတၢ်မ့ၢ် တၢ်တီဒီးတၢ်အဲၣ်တၢ်ကွံအပူၤန့ၣ်ကအိၣ်ဒီးပှၤလီၤ.

⁴ ယထံၣ်န့ၢ်လံနဖိတနီၤ လဲၤတၢ်လၢတၢ်မ့ၢ်တၢ်တီအ ပူၤ,ဒ်ပဒိးန့ၢ်တၢ်မၤလိာ်လၢပၢ်အသိးန့ၣ်ဒီး, ယသးခုဒိၣ် မးလီၤ.

⁵ ဒီးခဲကနံၣ်အံၤ,နီၢ်ကူၤရံဧၢ,ယဃ့ကညးနၤ, တ မ့ၢ်ဘၣ်ဒ်ယကွဲးတၢ်မၤလိာ်အသီအသိးဘၣ်,မ့ၢ်တၢ်လၢ ပန့ၢ်ဘၣ်လၢအခီၣ်ထံးန့ၣ်, လၢပကအဲၣ်လိာ်ကွံလိာ်ပ သးလီၤ.

⁶ ဒီးတၢ်အံၤမ့ၢ်တၢ်အဲၣ်တၢ်ကွံလၢပကလဲၤတၢ် ဒ်အတၢ်မၤလိာ်တဖၣ်အသိးန့ၣ်လီၤ. တၢ်မၤလိာ်န့ၣ်မ့ၢ် တၢ်အံၤ,လၢပကလဲၤလၢအပူၤ, ဒ်ပနၢ်ဟူလၢအခီၣ်ထံး အသိးန့ၣ်လီၤ.

⁷ အဂ့ၢ်ဒ်အံၤ, ပှၤလီတၢ်အါဂၤလဲၤထီၣ် ဆူဟီၣ်ခိၣ်ချၢ, လၢအတအၢၣ်လီၤအီလီၤဘၣ်လၢ ယ့ၣ်ရှူးခရံာ်ဟဲလၢပဖံးပညၣ်အပူၤဘၣ်. အဝဲန့ၣ်မ့ၢ်ပှၤ လီတၢ်တဂၤန့ၣ်ဒီးပှၤဂ့ၢ်လိာ်ဘှီလိာ်ခရံာ်န့ၣ်လီၤ.

⁸ ဒ်သိးသုသုတဒုးဟါမၢ်သုတၢ်မၤတဖၣ်တဂ့ၤ, ဒီးဒ် သိးသုကန့ၢ်ဘၣ်တၢ်ဘျုးတၢ်ဖှိၣ်အလၢအပှဲၤဒီး, ပလီၢ် သုသးတက့ၢ်.

⁹ ကယဲၢ်ပှၤလၢအမၤကမၣ်တၢ်, ဒီးတ အိၣ်တဆိးဘၣ်လၢ ခရံာ်အတၢ်သိၣ်တၢ်သီအပူၤဘၣ် န့ၣ်, တအိၣ်ဘၣ်ဒီးယွၤဘၣ်. ပှၤလၢအအိၣ်ဝဲဆိးဝဲလၢ ခရံာ်အတၢ်သိၣ်တၢ်သီအပူၤန့ၣ်, မ့ၢ်အအိၣ်ဒီးပၢ်ဒီးဖိခွါ န့ၣ်လီၤ.

¹⁰ ပှၤတဂၤဂၤမ့ၢ်ဟဲဆူသုအိၣ်, ဒီးတဟဲစိာ်ဘၣ်တၢ်သိၣ်တၢ်သီအံၤဘၣ်ဒီး, တူၢ်လိာ်အီၤလၢသုဟံၣ်ပူၤတဂ့ၤ. ဒီးစံး တၢ်အမုာ်မ်အအိၣ်ဒီးနၤတက့ၢ်န့ၣ်,တဂ့ၤ.-

¹¹ အဂ့ၢ်ဒ်အံၤ, ပှၤလၢအစံး, တၢ်အမုာ်မ်အအိၣ်ဒီးအီၤတ က့ၢ်န့ၣ်, မ့ၢ်အဘၣ်ဃးဒီးအဝဲဒၣ် အမၤတၢ်လၢအအၢ န့ၣ်လီၤ.

¹² မ့ၢ်တၢ်ကွဲးန့ၢ်သုအဂ့ၢ်အကျိၤအိၣ်အါမံၤဒီး, တၢ်တ မိၣ်ကွဲးဘၣ်ယသးလၢစးခိဒီးကသံၣ်ထံဘၣ်.မ့မ့ၢ်ယမုၢ် လၢ်လၢယကဟဲဆူသုအိၣ်,ဒီးကတိၤလိာ်ပသးလၢထး ခိၣ်သကိးထးခိၣ်,ဒ်သိးပတၢ်သူၣ်ခုသးခုကလၢထီၣ်ပှဲၤ ထီၣ်လီၤ.

¹³ နဒီပုၢ်ဝဲၢ်မုၣ်လၢတၢ်ဃုထၢအီၤအဖိတဖၣ် န့ၣ်ကတိၤဒိၣ်နၤလီၤ.