Ayan 15 - Жаңа Келисим

Он бесинши бап Жети периште ҳәм жети бәле

¹ Мен аспанда және уллы ҳәм таң қаларлық басқа бир белги көрдим. Бул – қолында соңғы жети бәле бар жети периште еди. Өйткени усы бәлелер менен Қудайдың ғәзеби жуўмақланатуғын еди.

² Сонда от аралас шийше теңиз сыяқлы бир нәрсени көрдим. Ҳайўанның, оның мүсининиң ҳәм атының саны үстинен жеңиске ерискенлер қолларына Қудайдың берген тарлы әсбапларын алып, шийше теңиздиң үстинде турған еди.

³ Олар Қудайдың хызметшиси Муўсаның ҳәм Қозының қосығын айтып турған еди: «Ҳәмме нәрсеге қүдиретли Қудай Ийе, Сениң ислериң уллы ҳәм әжайып, О, миллетлер Патшасы! Сениң жолларың ҳақыйқат ҳәм әдил.

⁴ Ийем, Сеннен қорқпайтуғын, атыңды алғысламайтуғын ким бар? Себеби тек жалғыз Сен ғана мухаддессең. Пүткил миллетлер келип, Сениң алдыңда табынады. Өйткени Сениң әдил ислериң аян болды».

⁵ Буннан соң мен қарап, аспандағы Ибадатхананың, яғный Гүўалық шатырының ашылғанын көрдим.

⁶ Қолында жети бәле бар жети периште жарқыраған аппақ кийим кийип, көкиреклерине алтын өңирше байлап, Ибадатханадан шықты.

⁷ Төрт мақлуқтың бири жети периштеге мәңгиге жасаўшы Қудайдың қәҳәрли ғәзебине толы жети алтын кесе берди.

⁸ Ибадатхана Қудайдың уллылығының ҳәм қүдиретиниң түтини менен толып кетти. Жети периштениң жети бәлеси тамамланбағанша, ҳеш ким Ибадатханаға кире алмады.