Иоел 1 - Мухаддес Китап

¹ Петуел улы Иоелге Жаратқан Ийеден сөз түсти:

Шегирткелердиң жерди қаплап алыўы

² Ҳәй, ақсақаллар, тыңлаңлар, Елде жасап атырған ҳәр бир адам, қулақ салыңлар, Сизиң заманыңызда ямаса ата-бабаларыңыздың дәўиринде, Жүз берген бе еди усындай апат?

³ Айтып бериң бул ҳаққында балаларыңызға, Балаларыңыз баянлап берсин балаларына, Олардың балалары жеткизсин кейинги әўладына.

⁴ Шекшеклерден қалғанын шегирткелер жеди, Олардан аўысқанын қоңызлар жеди, Қоңызлардан аўысқанын қуртлар жеди.

⁵ Ҳәй, мәскүнемлер ояның ҳәм жылаң! Ҳәй, шарап ишиўшилер, шарабыңыз ушын дад салың! Өйткени таза шарабыңыз аўзыңыздан тартып алынды.

⁶ Бастырып келди жериме күшли ҳәм сансыз бир халық, Тислери арыслан тислерине уқсар, Арысландикиндей гүрек тислери де бар.

⁷ Ўайран қылды жүзим ағашларымды, Жалаңашлап таслады әнжир ағашларымды, Шақаларының қабықларын сылып таслады, Ҳәммеси аппақ талдай болып қалды.

⁸ Күйеўинен айырылып, аза кийим кийген, Жас келиншектей дад салың.

⁹ Жаратқан Ийениң Үйинде тоқтады ғәлле ҳәм ишимлик садақасы, Жаратқан Ийениң хызметиндеги руўханийлер аза тутып атыр.

¹⁰ Егислик майданлар босап қалды, дад салмақта далалар, Өйткени жоқ етилди бийдайлар, Таўысылды жаңа шарап, зәйтүн майы да ақпай, тоқтап қалды.

¹¹ Бийдай ҳәм арпа ушын қайғырың, ҳәй, дийханлар! Дад салың, ҳәй, бағманлар, Себеби атызыңыздың өнимлери жоқ болды.

¹² Жүзим шақалары қуўрады, әнжир ағашлары солыды, Анар, пальма, алма ағашлары, Барлық мийўе ағашлары қуўрады. Адамзаттың қуўанышы жоқ болды.

Тәўбеге шақырылыў

¹³ Руўханийлер, аза кийим кийип, жас төгиң, Қурбанлық орындағы хызметтегилер, дад салың, Ҳәй, Қудайымның хызметинде жүргенлер, Ибадатханаға келип, түнди аза кийим менен өткериң. Өйткени Қудайыңыздың Үйинде, Ғәлле ҳәм ишимлик садақасы қалмады.

¹⁴ Ораза ушын күн белгилең, Салтанатлы жыйналыс жәриялаң. Ақсақалларды ҳәм бул жерде жасайтуғынлардың ҳәммесин, Қудайыңыз Жаратқан Ийениң Үйине жыйнаң, Жаратқан Ийеге ҳәммеңиз жалбарының!

¹⁵ Сол күн, яғный Жаратқан Ийениң күни жақындур, Қүдирети күшли Қудайдың жиберетуғын апаты сыяқлы келеди сол күн.

¹⁶ Азық-аўқатымыз жоқ етилди көз алдымызда, Қудайымыздың Үйинде қуўаныш ҳәм шадлық тамам болған жоқ па?

¹⁷ Туқымлар ширип кетти кесеклер астында, Ғәлле өнимлери қуўрап қалғанлығы себепли, Ғәллеханалар босап, телеклер бузылды.

¹⁸ Ыңырсып атыр маллар! Гезип жүрипти падалар, Өйткени қуўрап қалған жайлаўдағы отлар, Қой сүриўлери де қыйналып қалған.

¹⁹ Жаратқан Ийе, Саған жалбарынаман. Өйткени жалын жалмады жайлаўларды, От өртеди даладағы барлық ағашларды.

²⁰ Ҳәттеки, жабайы ҳайўанлар да Саған жалбарынып атыр, Себеби сай ҳәм булақлар қурып қалды, От жалмады даладағы жайлаўларды.