Ayan 15 - Мухаддес Китап

Жети периште ҳәм жети бәле

¹ Мен аспанда және уллы ҳәм таң қаларлық басқа бир белги көрдим. Бул – қолына соңғы жети бәлени услаған жети периште еди. Өйткени усы бәлелер менен Қудайдың ғәзеби жуўмақланатуғын еди.

² Сонда от аралас шийше теңиз сыяқлы бир нәрсени көрдим. Ҳайўанның, оның мүсининиң ҳәм атының саны үстинен жеңиске ерискенлер қолларына Қудайдың берген арфаларын алып, шийше теңиздиң үстинде турған еди.

³ Олар Қудайдың хызметшиси Муўсаның ҳәм Қозының қосығын айтып турған еди: «Қүдирети күшли Қудай Жаратқан Ийе, Сениң ислериң уллы ҳәм әжайып, О, миллетлер Патшасы! Сениң жолларың ҳақыйқат ҳәм әдил.

⁴ Жаратқан Ийе, Сеннен қорқпайтуғын, Атыңды алғысламайтуғын ким бар? Себеби тек жалғыз Сен ғана мухаддессең. Пүткил миллетлер келип, Сениң алдыңда табынады. Өйткени Сениң әдил ислериң аян болды».

⁵ Буннан соң аспандағы Ибадатхананың, яғный Келисим шатырының ашылғанын көрдим.

⁶ Қолында жети бәле бар жети периште жарқыраған аппақ зығыр кийим кийип, көкиреклерине алтын өңирше байлап, Ибадатханадан шықты.

⁷ Төрт мақлуқтың бири жети периштеге мәңги-бақый жасайтуғын Қудайдың қәҳәрли ғәзебине толы жети алтын кесе берди.

⁸ Ибадатхана Қудайдың уллылығының ҳәм қүдиретиниң түтини менен толып кетти. Жети периштениң жети бәлеси тамамланбағанша, ҳеш ким Ибадатханаға кире алмады.