Matěo 14 - Kawyaw RC

Pwa̤ploshi Jowǎ̤ni̤ sihî̌tè awi̤akè̌

¹ Bǎnuakha Herǒ htě apǒshipǒga bǎnu tapwa̤ gana̤de Běcǎ Ye̤shǔ awi̤akè̌.

² Dě a hî̌ apwa̤ma̤ta̤ toǒ, “A mî̌ pwa̤ploshi Jowǎ̤ni̤ pwǎ, a sihtûpwa̤gesǒ hǒ, dě a ma̤jò ta̤cǒklî̌kî̌yanu toǒ.”

^3-4 Khwǐherǒ cû̌phî̌ gesǒtû̌ akhi Mo̤herǒdè. A mî̌ apṳ Phǐlǐpo ama hǐnu akhû̌akhî, Jowǎ̤ni̤ hî̌htohî̌sǒ nû̌û, “Na cû̌phî̌ gesǒ nakhi hǐnu mî̌ ato ta ta̤sû̌ta̤tòwò tò̤.” A hî̌ nû̌û hǐnudě a nocû̌pṳ̂ coklomě akliphû̌ toǒ ta Jowǎ̤ni̤ dě a nodǒlò̤te̤ nû̌û apo̤kû.

⁵ Khwǐherǒ sò̌yṳ ma̤sikè Jowǎ̤ni̤ hǐnudě Yṳ̌daphû̌ toǒ yṳǎ ta Jowǎ̤ni̤ mî̌ pwa̤po̤ tapwa̤ akhû̌akhî, a ǐsha asîla̤ dě a ma̤sibǔ nû̌û tò̤.

⁶ Pò̤̌ta bǎ Khwǐherǒ ata̤ǒlò̤ amṳni̤ hèto̤hǒ akhanu, Mo̤herǒdè aphû̌mamǔ kalî̌ dě Khwǐherǒ alo̤mo̤ ta shǐtè̤mè̤ toǒ alo̤mo̤ dě Khwǐherǒ sò̌phlǒmo̤ jòjî̌꤮ tò̤ akhû̌akhî,

⁷ A olò̤ ta a sò̌yṳ kwi titètè̌꤮ nu, a glè ǐ nû̌û a hî̌ nû̌û hǐnu.

⁸ Dě bǎkwi mî̌titènu amo̤ hî̌ nû̌û dě a cû̌ hî̌ Khwǐherǒ, “Pe̤tṳ bǎ he pwa̤ploshi Jowǎ̤ni̤ agobo dě dò̌nṳ bǎ he ta ahǐkǒ htǒonu dîbataadû̌kû dě hèǐ he bǎo,” a hî̌ hǐnu.

⁹ Khwǐnu a sò̌phlǒmo̤ tò̤ pò̤̌ta a olò̤mèlò̤hto ashǐtè̤mè̤ toǒ alo̤mo̤ akhû̌akhî, a hî̌lò̤ akliphû̌ toǒ ta a glè cû̌ma̤pwǐ phijaû̌mamǔ htǒotapwa̤ kwi nû̌ûnu.

¹⁰ Asî cû̌ bǎ kò la̤dǒ kòyò apo̤kû dě a cû̌pe̤tṳge Jowǎ̤ni̤ agobo.

¹¹ Asî dò̌nṳ Jowǎ̤ni̤ a hǐkǒhtǒo dîbataadû̌akû dě a hèǐ nû̌ûta phijaû̌mamǔnu tapwa̤ dě phijaû̌mamǔhtǒo joge nû̌û amo̤ ǒ.

¹² Jowǎ̤ni̤ akhophijaû̌ toǒ hèphî̌ge nû̌û na̤klû ǒkèhtǒo dě ge lǔkè nû̌û. Htodě asî cû̌ pwe̤ǐ Běcǎ Ye̤shǔ.

Běcǎ Ye̤shǔ bǔǎ kòyò yè̤̌rî̌

¹³ Bǎ Běcǎ Ye̤shǔ gana̤de ta kò ma̤sihto Jowǎ̤ni̤ akhanu, a ta akhophijaû̌ toǒ cû̌ dò̌nṳ sǒkhli dě hǎhtò̌cû̌kè lǒkho tû̌ gûla̤sî̌tukǔ htě kò ǒ dǐpwǎ̤꤮ tò̤ tò̤glò. Dě bǎ kòyò saprṳ̂ gana̤de akhanu, a ǒ lǒkho bǎ wî̤kûnu toǒ dě a hǎhtò̌ cû̌kû̌ lǒkho ta khò̌lopo̤ khosûkhû̌ tokho.

¹⁴ Bǎ Běcǎ Ye̤shǔ ǒ sǒkhlikû hǎhtò̌ akhanu, a kè̌shǐ kòyò prṳ̂hodû̌ cû̌ ǒpo̤nǎwǐbò lo̤mo̤. Bǎ a kè̌shǐ asî akha a gwèbǎǐ asî dě a ma̤bǎbò kòyòsha bǎ asîklanu toǒ.

¹⁵ Bǎ lṳmṳhǎ lṳmṳ glèphǔlòte̤ akhanu, akhophijaû̌ toǒ hè nû̌ûǒ dě a hèhî̌ nû̌û, “Gûla̤ bǎotò̤glò mî̌ do ǒphǔ dǐdǒ꤮ tò̤, htohǒtò̤ lṳmṳkhǐpo̤lo̤ hǒ akhû̌akhî, ma̤pûhǐ asî cû̌ pwî̤ǎpwî̤o tû̌ lǒkho a la̤ǎla̤o dě doshǒnu toǒ akû dě nogemò̌ kòyò htǒotoǒ.”

¹⁶ Běcǎ Ye̤shǔ hî̌shǔ asî, “Lo̤bǎnoge asî tò̤. Kè̌ ǐǎǐo asî tacǎcǎnu.”

¹⁷ Dě asî hî̌shǔ nû̌û, “Pata ǒ pwǎpǒ̤ mû̌ yè̤̌ma ta tò̤phû̌ ginǐ̤plṳ̂ pwǎ.”

¹⁸ Dě a hî̌ asî, “Phî̌hè yǎ he ǒ bǎo.”

¹⁹ Dě a nohǎnòò̌lò̤ kòyònu toǒ mi̤khû̌. A phî̌ mû̌ yè̤̌ma ta tò̤phû̌ ginǐ̤plṳ̂htǒo dě a kè̌htò̌ mǒla̤ a hî̌bwǐhî̌sîrîhtò̌ Cǒmara htodě a bî̌phò̌ mû̌. Htodě a ǐlò̤ akhophijaû̌ toǒ aǒ. Dě akhophijaû̌ toǒ yṳ̂ǎlò̤ tṳtṳ nû̌ûta kòyò saprṳ̂ toǒ aǒ.

²⁰ Asî ǎ pǒǎpǒo ǎkǒobebò pṳ̂̌꤮ tapwa̤. Akhophijaû̌ toǒ phî̌htuplǒge a ǒkè toǒnu a ǒbepe ta phǒbě shǐginǐ̤ phǒbě.

²¹ Dǒcòcè̌pwǎ makhûwè̤pwa̤ htě a ǎshǎ htǒotoǒnu a phǔ꤮ ǒtû̌ yè̤̌rî̌. Mamǔ ta phijaû̌ toǒnu dǒto̤ yǎ tò̤.

Běcǎ Ye̤shǔ cû̌ dě shikhû̌

²² Asî htǔplǒ htohto ta Ye̤shǔ nocû̌nṳ htò̌dò̌bò akhophijaû̌ toǒ sǒkhli dě a nohǎhtò̌cû̌ wǐkè asî shikoǒbò̌kho. Dě bǎ akhophijaû̌ htò̌dò̌ sǒkhli akhanu, a dě a plûgebòkè kòyò saprṳ̂nu toǒ.

²³ A plûgehto kòyò saprṳ̂ dě, a cû̌htò̌ kwisaba tû̌ kholokhû̌ tapwǎ̤꤮ pa. Bǎ lṳmṳkhǐpo̤lo̤ akhanu, a ǒ tû̌ bǎnu tapwǎ̤ pa.

²⁴ Pwǎ̤ta bǎ sǒkhlinu tabǎ hǎhtò̌cû̌yî̤kè ta shikoǒkû akhanu, gili̤sǎ hèhtû̌bǎ asî dě shipěpǒ hèpla̤ gleglòbò asî sǒkhli.

²⁵ Bǎ shî û̌sayè̤ lṳmṳ glè̌ lîbû akhanu, Běcǎ Ye̤shǔ cû̌ shikhû̌ dě a hè asî ǒ.

²⁶ Bǎ akhophijaû̌ toǒ kè̌shǐ nû̌û cû̌ shikhû̌ akhanu, asî ǐsha gònò̤gèglè dě a yi̤kǒ lǒkho, “Kǒ꤮ kòyola.”

²⁷ Pò̤̌ta taplǎpa, Běcǎ Ye̤shǔ hî̌ asî, “Bè̌khubè̌hî lǒkho sî sò̌phlǒ. Ǐsha lǒkho pûma̤, htǒomî̌ he pwǎ.”

²⁸ Dě Petru hî̌, “Běcǎ, na dè mè̤mè̤̌ hî̌dě hî̌ he dě he hèkû̌ shikhû̌ dě na ǒ.”

²⁹ Dě a hî̌ nû̌û, “Hèmò̌.” Dě Petru hǎte̤ sǒkhlikû dě a hèto Ye̤shǔ a ǒ bǎ shikhû̌.

³⁰ Pò̤̌ta bǎ a kè̌shǐ gili̤sǎ shipěpǒ akhanu, a ǐsha ta a lòcǔ, dě a yi̤kǒ, “Běcǎ, ma̤jèpû he nî̌꤮.”

³¹ Běcǎ Ye̤shǔ yṳ̂hè acǔde taplǎpa a cǐhtò̌ nû̌û dě a hî̌ nû̌û, “Na ta̤yṳpî̌tî̌꤮ le, na sò̌phlǒ wò̌wè̌ ma̤tè?”

³² Bǎ asî htò̌nṳ dě sǒkhlikû akhanu, gili̤sǎǒkǔ hè.

³³ Bǎnuakha kòyò ǒ sǒkhlikûnu toǒ sabahtò̌ Běcǎ Ye̤shǔ dě a hî̌, “Na mî̌ Cǒmara aphû̌khû tapwa̤ mè̤mè̤̌ hǒ.”

Běcǎ ma̤bǎ ta̤shǐta̤sha dě Gena̤sarè̌ga

³⁴ Asî cû̌kǎbò̌hto shikoǒdû̌htǒo dě a cû̌to̤ lǒkho Gena̤sarè̌ga.

³⁵ Dophû̌shǒphû̌ bǎnu toǒ to̤mǎǐ Ye̤shǔ dě asî cû̌pwe̤ǐbò kòyò lǒ̤bò htě a ǒ lǒkho gakû bǎnu toǒ dě kò kaǎhèbò kòyòshǐ kòyòsha toǒ Ye̤shǔ ǒ.

³⁶ Asî kwigwèbǎǐ Běcǎ ta notè̌bǎpwǎ na hǐdopo̤to̤kòpwè̤ htǒonu ta pwa̤shǐpwa̤sha htǒotoǒnu tîkî̌phû̌pwǎ. Dě kòyò htě a tè̌bǎ nû̌û hǐdopo̤to̤kòpwè̤ toǒnu, a ta̤shǐta̤sha hǎmǎbòkè.